2020: ಕೋಚಿ/ ನವದೆಹಲಿ: ಸುಪ್ರೀಂಕೋರ್ಟ್ ಆದೇಶದ ನಾಲ್ಕು ತಿಂಗಳುಗಳ ಬಳಿಕ ಕೇರಳದ ಕೋಚಿಯಲ್ಲಿ ಜಲಾಭಿಮುಖವಾಗಿ ತಲೆಎತ್ತಿ ನಿಂತಿದ್ದ ಒಟ್ಟು ೧೫೮ ಫ್ಲ್ಯಾಟ್‌ಗಳಿದ್ದ ಎರಡು ಕಟ್ಟಡಗಳನ್ನು ನಿಯಂತ್ರಿತ ಸ್ಫೋಟದ ಮೂಲಕ ಕ್ಷಣಮಾತ್ರದಲ್ಲಿ ನೆಲಸಮ ಗೊಳಿಸುವುದರೊಂದಿಗೆ ತೀವ್ರ ವಿವಾದಕ್ಕೆ ಗುರಿಯಾಗಿದ್ದ ಮರಡು ಫ್ಲ್ಯಾಟ್‌ಗಳು 2020 ಜನವರಿ 11ರ ಶನಿವಾರ ನೆನಪಿನ ಅಂಗಳಕ್ಕೆ ಸರಿದವು. ಬಹುಅಂತಸ್ತಿನ ನಾಲ್ಕು ಕಟ್ಟಡಗಳ ಪೈಕಿ ಎಚ್ ೨೦ ಹೋಲಿ ಫೈತ್ ಮತ್ತು ಆಲ್ಫಾ ಸೆರೇನ್ ಹೆಸರಿನ ಕಟ್ಟಡಗಳು ಶನಿವಾರ ಇಸ್ಪೇಟು ಎಲೆಗಳಿಂದ ನಿರ್ಮಿಸಿದ ಕಟ್ಟಡದಂತೆ ದಪದಪನೆ ಕೆಳಕ್ಕುರುಳಿ, ಇಡೀ ಪ್ರದೇಶದಲ್ಲಿ ದೂಳಿನ ಕಾರ್ಮೋಡ ಆವರಿಸಿತು. ಸುಪ್ರೀಂಕೋರ್ಟ್ ಆದೇಶದಂತೆ ಜಲಾಭಿಮುಖಿ ಅಪಾರ್ಟ್‌ಮೆಂಟ್‌ಗಳ ನೆಲಸಮ ಕಾರ್ಯಾಚರಣೆಯನ್ನು ಈದಿ ನ ಆರಂಭಿಸಿದ ಆಡಳಿತವು ಬೆಳಗ್ಗೆ ೧೧ ಗಂಟೆಗೆ ಎಚ್೨೦ ಹೋಲಿಫೈತ್ ಹೆಸರಿನ ಕಟ್ಟಡವನ್ನು ನಿಯಂತ್ರಿತ ಸ್ಫೋಟದ ಮೂಲಕ ಕೆಲವೇ ಕ್ಷಣಗಳಲ್ಲಿ ಧರೆಗೆ ಉರುಳಿಸಿತು. ಮೊದಲ ಕಟ್ಟಡ ದೂಳೀಪಟವಾದ ಬೆನ್ನಲ್ಲೇ ಆಲ್ಫಾ ಸೆರೇನ್ ಹೆಸರಿನ ಇನ್ನೊಂದು ಕಟ್ಟಡವನ್ನು ಉರುಳಿಸಲಾಯಿತು. ಉಳಿದ ಜೈನ್ ಕೋರಲ್ ಕೇವ್ ಮತ್ತು ಗೋಲ್ಡನ್ ಕಯಲೋರಂ ಹೆಸರಿನ ಅಪಾರ್ಟ್‌ಮೆಂಟ್‌ಗಳ ನೆಲಸಮ ಕಾರ್ಯಾಚರಣೆಯನ್ನು 2020 ಜನವರಿ 11ರ ಭಾನುವಾರ ಕೈಗೆತ್ತಿಕೊಳ್ಳಲಾಗುವುದು. ವಸತಿ ಹಾಗೂ ವಾಣಿಜ್ಯ ಕಟ್ಟಡಗಳು ಸೇರಿದಂತೆ ಅಕ್ರಮ ಕಟ್ಟಡಗಳ ಧ್ವಂಸ ಕಾರ್ಯಾಚರಣೆಯಲ್ಲಿ ಭಾರತದಲ್ಲೇ ಅತ್ಯಂತ ಬೃಹತ್ ಪ್ರಮಾಣದ ನೆಲಸಮ ಕಾರ್ಯಾಚರಣೆ ಇದಾಗಿತ್ತು. (ವಿವರಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)
2020: ಬೆಂಗಳೂರು: ಕೆಲವು ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ಹಿರಿಯ ಸಾಹಿತಿ, ಸಂಶೋಧಕ, ಕನ್ನಡ ಹೋರಾಟಗಾರ ಡಾ. ಎಂ.ಚಿದಾನಂದಮೂರ್ತಿ ಅವರು 2020 ಜನವರಿ 11ರ
ಶನಿವಾರ ಮುಂಜಾನೆ ೩:೪೫ ರ ಸಮಯದಲ್ಲಿ ವಿಧಿವಶರಾದರು. ಚಿ.ಮೂ. ಎಂಬುದಾಗಿಯೇ ಅವರು ಜನಪ್ರಿಯರಾಗಿದ್ದರು. ಇಂದು ಬೆಳಗ್ಗೆ ೯ ಗಂಟೆಯ ನಂತರ ವಿಜಯನಗರದ ಆರ್ ಪಿಸಿ ಲೇಔಟಿನ ಸ್ವಗೃಹದಲ್ಲಿ ಅಂತಿಮ ದರ್ಶನಕ್ಕೆ ವ್ಯವಸ್ಥೆ ಮಾಡಲಾಯಿತು. ಚಿದಾನಂದಮೂರ್ತಿ ೧೯೩೧ ಮೇ ೧೦ರಂದು ದಾವಣಗೆರೆ ಜಿಲ್ಲೆಯ ಚನ್ನಗಿರಿ ತಾಲೂಕಿನ ಹಿರೆಕೊಗಳೂರಿ ನಲ್ಲಿ ಜನಿಸಿದ್ದರು. ಅವರಿಗೆ ೮೮ ವರ್ಷ ವಯಸ್ಸಾಗಿತ್ತು, ವಯೋಸಹಜ ಖಾಯಿಲೆಯಿಂದ ಬಳಲುತ್ತಿದ್ದರು. ಚಿಕಿತ್ಸೆ ಫಲಕಾರಿಯಾಗದೆ ಬೆಂಗಳೂರಿನ ಖಾಸಗಿ ಆಸ್ಪತ್ರೆಯಲ್ಲಿ ಈದಿನ ಕೊನೆಯುಸಿರೆಳೆದರು. ಸಾಹಿತ್ಯ, ಸಂಶೋಧನೆ ಮತ್ತು ಇತಿಹಾಸ ಕ್ಷೇತ್ರದಲ್ಲಿ ಸೇವೆ ಸಲ್ಲಿಸಿರುವ ಚಿದಾನಂದಮೂರ್ತಿಯವರಿಗೆ ರಾಜ್ಯೋತ್ಸವ ಪ್ರಶಸ್ತಿ ಸೇರಿ ಹಲವು ಪ್ರಶಸ್ತಿಗಳು ಲಭಿಸಿದ್ದವು. ಕನ್ನಡಕ್ಕೆ ಶಾಸ್ತ್ರೀಯ ಸ್ಥಾನಮಾನ ಸಿಗಬೇಕೆಂದು ಹೋರಾಟ ಮಾಡಿದವರಲ್ಲಿ ಚಿ.ಮೂ ಪ್ರಮುಖರು.
ಹಂಪಿ ಸ್ಮಾರಕಗಳ ರಕ್ಷಣೆಗಾಗಿ ಚಿದಾನಂದಮೂರ್ತಿ ನಿರಂತರ ಹೋರಾಟ ಮಾಡಿದ್ದರು. ಸಂಶೋಧಕರಾಗಿ ಹಲವು ಸಾಧನೆಗಳನ್ನು ಮಾಡಿದ್ದಾರೆ. ಪ್ರಾಧ್ಯಾಪಕರಾಗಿಯೂ ಚಿಮೂ ಸೇವೆ ಸಲ್ಲಿಸಿದ್ದರು. (ವಿವರಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)
2020: ಮುಂಬೈ: ಮುಂಬೈಗೆ ಸಮೀಪದ ತಾರಾಪುರದಲ್ಲಿನ ರಾಸಾಯನಿಕ ವಲಯದ ರಸಗೊಬ್ಬರ ಕಾರ್ಖಾನೆ ಒಂದರಲ್ಲಿ 2020 ಜನವರಿ 11ರ ಶನಿವಾರ ಸಂಜೆ ತಡವಾಗಿ ಸ್ಫೋಟ ಸಂಭವಿಸಿದ್ದು, ಕನಿಷ್ಠ ೮ ಮಂದಿ ಸಾವನ್ನಪ್ಪಿದ್ದಾರೆ ಎಂದು ಭೀತಿ ಪಡಲಾಯಿತು. ಘಟನೆಯಲ್ಲಿ ಕನಿಷ್ಠ ೫ ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ. ಕಾರ್ಖಾನೆಯಲ್ಲಿ ಉತ್ಪಾದನಾ ಕಾರ್ಯ ನಡೆಯುತ್ತಿದ್ದಾಗ ಸ್ಫೋಟ ಸಂಭವಿಸಿತು ಎನ್ನಲಾಯಿತು. (ವಿವರಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)
No comments:
Post a Comment