ಇಂದಿನ ಇತಿಹಾಸ History
Today
ಅಕ್ಟೋಬರ್ 01
2020: ನವದೆಹಲಿ
: ಮುಂದಿನ ತಿಂಗಳಿಗೆ ನಿಗದಿಯಾಗಿರುವ ಏಳನೇ ಪ್ರಯೋಗದ ನಂತರ ಭಾರತವು ನಿರ್ಭಯ್ ಸಬ್ ಸಾನಿಕ್ ಕ್ರೂಸ್ ಕ್ಷಿಪಣಿಯನ್ನು ಭಾರತೀಯ ಸೇನೆ ಮತ್ತು ನೌಕಾಪಡೆಗೆ ಔಪಚಾರಿಕವಾಗಿ ಸೇರ್ಪಡೆ ಮಾಡಲಿದೆ. ಆದರೆ ಚೀನಾದ ಪಿಎಲ್‌ಎಯೊಂದಿಗೆ ಮುಖಾಮುಖಿಯಾಗಿರುವ ಭಾರತೀಯ ಸೈನಿಕರ ನೆರವಿಗಾಗಿ ಈಗಾಗಲೇ ಸೀಮಿತ ಸಂಖ್ಯೆಯ ಕ್ಷಿಪಣಿಗಳನ್ನು ವಾಸ್ತವ ನಿಯಂತ್ರಣ ರೇಖೆಗೆ ಸ್ಥಳಾಂತರಿಸಲಾಗಿದೆ. ೧,೦೦೦ ಕಿ.ಮೀ ವ್ಯಾಪ್ತಿಯ ಘನ ರಾಕೆಟ್ ಬೂಸ್ಟರ್ ಕ್ಷಿಪಣಿಯು ಒಂದೇ ಶಾಟ್ ಕಿಲ್ ಅನುಪಾತವನ್ನು ಶೇಕಡಾ ೯೦ ಕ್ಕಿಂತ ಹೆಚ್ಚು ಹೊಂದಿದೆ. ಇದನ್ನು ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ಅಭಿವೃದ್ಧಿಪಡಿಸಿದೆ. ೪೦೦ ಕಿ.ಮೀ ದೂರದಲ್ಲಿರುವ ಗುರಿಗಳನ್ನು ಹೊಡೆಯಬಲ್ಲ ವಿಸ್ತೃತ ಶ್ರೇಣಿಯ ಮೇಲ್ಮೈಯಿಂದ ಮೇಲ್ಮೈಗೆ ಹಾರಬಲ್ಲ ಬ್ರಹ್ಮೋಸ್ ಸೂಪರ್ ಸಾನಿಕ್ ಕ್ರೂಸ್ ಕ್ಷಿಪಣಿಯನ್ನು ಭಾರತ ಪರೀಕ್ಷಿಸಿದ ಕೆಲವೇ ಗಂಟೆಗಳ ನಂತರ ನಿರ್ಭಯ್ ಕ್ಷಿಪಣಿ ಕುರಿತ ವಿಚಾರವನ್ನು ಸುದ್ದಿ ಮೂಲಗಳು 2020 ಅಕ್ಟೋಬರ್
01ರ ಗುರುವಾರ ವರದಿ ಮಾಡಿದವು. ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ನೇತೃತ್ವದ ರಕ್ಷಣಾ ಸ್ವಾಧೀನ ಮಂಡಳಿ ನಿರ್ಭಯ್ ಸಬ್ ಸಾನಿಕ್ ಕ್ಷಿಪಣಿಯ ಔಪಚಾರಿಕ ಸೇರ್ಪಡೆಯನ್ನು ತೆರವುಗೊಳಿಸಿದೆ. ಆದಾಗ್ಯೂ, ಹೊಸ ಕ್ಷಿಪಣಿಯನ್ನು ನಿಯೋಜಿಸಲು ಮಿಲಿಟರಿ ಔಪಚಾರಿಕತೆಗಾಗಿ ಕಾಯಲಿಲ್ಲ ಮತ್ತು ಚೀನಾ ವಿರುದ್ಧ ಎಲ್‌ಎಸಿಯನ್ನು ರಕ್ಷಿಸಲು ಅವುಗಳಲ್ಲಿ ಕೆಲವನ್ನು ಈಗಾಗಲೇ ರವಾನಿಸಿದೆ. ೦.೭ ಮ್ಯಾಕ್ ವೇಗದಲ್ಲಿ ಚಲಿಸುವ ಈ ಕ್ಷಿಪಣಿಯು ಭೂಪ್ರದೇಶ-ಅಪ್ಪುಗೆ ಮತ್ತು ಸಮುದ್ರ-ಸ್ಕಿಮ್ಮಿಂಗ್ ಸಾಮರ್ಥ್ಯವನ್ನು ಹೊಂದಿದೆ. ಇದು ಪತ್ತೆ ಮತ್ತು ಪ್ರತಿ-ಕ್ರಮಗಳನ್ನು ತಪ್ಪಿಸಲು ಸಹಾಯ ಮಾಡುತ್ತದೆ. (ವಿವರಗಳಿಗೆ ಇಲ್ಲಿ
ಕ್ಲಿಕ್ ಮಾಡಿರಿ)
2020: ನವದೆಹಲಿ
: ಸಾಮೂಹಿಕ ಅತ್ಯಾಚಾರಕ್ಕೆ ಒಳಗಾಗಿ ಸಾವನ್ನಪ್ಪಿದ ಉತ್ತರ ಪ್ರದೇಶದ ಮಹಿಳೆಯ ಕುಟುಂಬದ ಭೇಟಿ ಸಲುವಾಗಿ ಹತ್ರಾಸ್‌ಗೆ ಮೆರವಣಿಗೆಯಲ್ಲಿ ತೆರಳಲು ಯತ್ನಿಸಿದ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಮತ್ತು ಅವರ ಸಹೋದರಿ ಪ್ರಿಯಾಂಕಾ ಗಾಂಧಿ ವಾದ್ರಾ ಅವರನ್ನು ಉತ್ತರ ಪ್ರದೇಶ ಪೊಲೀಸರು 2020 ಅಕ್ಟೋಬರ್
01ರ ಗುರುವಾರ ಯಮುನಾ ಎಕ್ಸ್‌ಪ್ರೆಸ್ ವೇ ಬಳಿಯಲ್ಲಿ ವಶಕ್ಕೆ ತೆಗೆದುಕೊಂಡರು. ಹೆದ್ದಾರಿಯಲ್ಲಿ ಪೊಲೀಸರು ತಮ್ಮನ್ನು ತಡೆದಾಗ ಉಭಯ ನಾಯಕರೂ ಮಹಿಳೆಯ ಕುಟುಂಬವನ್ನು ಭೇಟಿಯಾಗಲು ಹತ್ರಾಸ್‌ಗೆ ತೆರಳಲು ನಿರ್ಧರಿಸಿದ್ದರು. ಈ ವಾರದ ಆರಂಭದಲ್ಲಿ ಸಾಮೂಹಿಕ ಅತ್ಯಾಚಾರಕ್ಕೆ ಒಳಗಾಗಿದ್ದ ಉತ್ತರ ಪ್ರದೇಶದ ಮಹಿಳೆ ದೆಹಲಿಯ ಆಸ್ಪತ್ರೆಯೊಂದರಲ್ಲಿ ಸಾವನ್ನಪ್ಪಿದ್ದರು. ಪೊಲೀಸರು ತಮ್ಮನ್ನು ನೆಲಕ್ಕೆ ತಳ್ಳಿ, ಲಾಠಿಯಿಂದ ಹೊಡೆದರು ಎಂದು ಕಾಂಗ್ರೆಸ್ ಪಕ್ಷದ ಮಾಜಿ ಅಧ್ಯಕ್ಷರೂ ಆದ ರಾಹುಲ್ ಗಾಂಧಿ ಬಳಿಕ ಆಪಾದಿಸಿದರು. ಘಟನಾ ಸ್ಥಳದ ಚಿತ್ರಗಳು ರಾಹುಲ್ ಗಾಂಧಿಯನ್ನು ಪೊಲೀಸರು ತಡೆಹಿಡಿದಿರುವುದನ್ನು ತೋರಿಸಿದವು, ಆದರೆ ಚಿತ್ರದ ಒಂದು ಚೌಕಟ್ಟು ರಾಹುಲ್ ಅವರು ನೆಲಕ್ಕೆ ಬಿದ್ದುದನ್ನು ಮತ್ತು ಪೊಲೀಸರು ಅವರನ್ನು ತಳ್ಳುತ್ತಿರುವುದನ್ನು ತೋರಿಸಿತು. ತತ್ ಕ್ಷಣವೇ ಸ್ಥಳಕ್ಕೆ ಧಾವಿಸಿದ ಕಾಂಗ್ರೆಸ್ ಕಾರ್‍ಯಕರ್ತರು ರಾಹುಲ್ ಗಾಂಧಿಯವರನ್ನು ಎತ್ತಿಕೊಂಡು ಹೋಗಲು ಯತ್ನಿಸಿದರು. ನಾಲ್ಕು ಅಥವಾ ಹೆಚ್ಚಿನ ಸಂಖ್ಯೆಯ ಜನರು ಸೇರುವುದನ್ನು ನಿಷೇಧಿಸುವ ಸೆಕ್ಷನ್ ೧೪೪ ಜಾರಿಯಲ್ಲಿ ಇರುವ ಕಾರಣ ರಾಹುಲ್ ಮತ್ತು ಪ್ರಿಯಾಂಕಾ ಅವರ ಮೆರವಣಿಗೆಯನ್ನು ತಡೆಯಲಾಯಿತು ಎಂದು ಪೊಲೀಸರು ಪ್ರತಿಪಾದಿಸಿದರು.
(ವಿವರಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)
2020: ನವದೆಹಲಿ
: ಲಡಾಖ್‌ನಲ್ಲಿ ೧೯೫೯ರ ಗರಿಷ್ಠ ಕಾರ್ಟೋಗ್ರಾಫಿಕಲ್ ಹಕ್ಕಿನ ಆಧಾರದಲ್ಲಿ ೧,೫೯೭ ಕಿಮೀ ಉದ್ದದ ವಾಸ್ತವಿಕ ನಿಯಂತ್ರಣ ರೇಖೆಯ (ಎಲ್‌ಎಸಿ) ಪ್ರತಿಪಾದನೆಯನ್ನು ಪುನರುಚ್ಚರಿಸುವುದರೊಂದಿಗೆ ಚೀನೀ ಸೇನೆಯು ಪಶ್ಚಿಮ ವಲಯದಲ್ಲಿ ಭಿನ್ನಾಭಿಪ್ರಾಯಗಳು ಇರುವ ಇತರ ಆರು ಪ್ರದೇಶಗಳ ಮೇಲೆ ಒತ್ತಡ ಹಾಕಲು ಯೋಜನೆ ರೂಪಿಸಿದೆ ಎಂದು ರಾಷ್ಟ್ರೀಯ ಭದ್ರತಾ ಯೋಜಕರು ಶಂಕಿಸಿದ್ದಾರೆ. ಈ ಅಂದಾಜಿನ ಬಗ್ಗೆ ಎಚ್ಚರಿಕೆ ತಾಳಿರುವ ಭಾರತೀಯ ಸೇನೆಯು ಚೀನಾದ ಪೀಪಲ್ಸ್ ಲಿಬರೇಶನ್ ಆರ್ಮಿಯ (ಪಿಎಲ್‌ಎ) ಇಂತಹ ಯಾವುದೇ ಯತ್ನಗಳನ್ನು ಪೂರ್ವಭಾವಿಯಾಗಿಯೇ ತಡೆಯುವ ನಿಟ್ಟಿನಲ್ಲಿ ಎಚ್ಚರಿಕೆ ವಹಿಸಿದೆ ಎಂದು ಸುದ್ದಿ ಮೂಲಗಳು 2020 ಅಕ್ಟೋಬರ್
01ರ ಗುರುವಾರ ಹೇಳಿವೆ. ಸೇನಾ ಭೂಪಟಗಳಲ್ಲಿ ಹಸಿರು ರೇಖೆ (ಗ್ರೀನ್ ಲೈನ್) ಎಂಬುದಾಗಿ ವಿವರಿಸಲಾಗಿರುವ ೧೯೫೯ರ ರೇಖೆಯನ್ನು ಆಗಿನ ಚೀನಾ ಪ್ರಧಾನಿ ಚೌ ಎನ್ ಲೈ ಅವರು ಭಾರತದ ಪ್ರಧಾನಿ ಜವಾಹರಲಾಲ್ ನೆಹರೂ ಅವರಿಗೆ ೧೯೫೯ರ ನವೆಂಬರ್ ೭ರಂದು ಕಳುಹಿಸಿದ್ದರು. ಬಳಿಕ ಇದನ್ನು ೧೯೬೨ ರ ನವೆಂಬರ್ ೧೫ ರಂದು ಆಫ್ರಿಕನ್-ಏಷ್ಯನ್ ರಾಷ್ಟ್ರಗಳ ಮುಖ್ಯಸ್ಥರನ್ನು ಉದ್ದೇಶಿಸಿ ಬರೆದ ಪತ್ರಕ್ಕೆ ಸೇರಿಸಲಾಗಿತ್ತು. ತಜ್ಞರ ಮಟ್ಟದ ಗುಂಪು ಪಾಶ್ಚಿಮಾತ್ಯ ವಲಯದ ಸ್ಪಷ್ಟೀಕರಣ ಮತ್ತು ದೃಢೀಕರಣದ ಅನಿರ್ದಿಷ್ಟ ಕಸರತ್ತಿನ ಸಮಯದಲ್ಲಿ, ಭಾರತ ಮತ್ತು ಚೀನಾವು ಗಮನಾರ್ಹವಾದ ೧೨ ಕ್ಷೇತ್ರಗಳಲ್ಲಿ ಭಿನ್ನಾಭಿಪ್ರಾಯಗಳನ್ನು ಹೊಂದಿವೆ ಎಂಬುದು ಸ್ಪಷ್ಟವಾಗಿದೆ. ಪಾಶ್ಚಿಮಾತ್ಯ ವಲಯದ ನಕ್ಷೆಗಳನ್ನು ೨೦೦೨ರ ಜೂನ್ ೧೭ರಂದು ವಿನಿಮಯ ಮಾಡಿಕೊಳ್ಳಬೇಕಾಗಿತ್ತು ಆದರೆ ಚೀನಿಯರು ಕೊನೆಯ ಕ್ಷಣದಲ್ಲಿ ಹಿಂದೆ ಸರಿದಿದ್ದರು. (ವಿವರಗಳಿಗೆ
ಇಲ್ಲಿ ಕ್ಲಿಕ್ ಮಾಡಿರಿ)
2020: ಶ್ರಿನಗರ
: ಉತ್ತರ ಕಾಶ್ಮೀರದ ನೌಗಾಮ್ ವಿಭಾಗದಲ್ಲಿ 2020 ಅಕ್ಟೋಬರ್ 01ರ
ಗುರುವಾರ ಬೆಳಗ್ಗೆ ಪಾಕಿಸ್ತಾನ ನಡೆಸಿದ ಕದನ ವಿರಾಮ ಉಲ್ಲಂಘನೆಯಲ್ಲಿ ಭಾರತೀಯ ಸೇನೆಯ ಇಬ್ಬರು ಸೈನಿಕರು ಹುತಾತ್ಮರಾಗಿದ್ದಾರೆ ಮತ್ತು ನಾಲ್ವರು ಗಾಯಗೊಂಡಿದ್ದಾರೆ ಎಂದು ಸೇನೆಯ ಅಧಿಕಾರಿಯೊಬ್ಬರು ತಿಳಿಸಿದರು.
ನೈಜ ನಿಯಂತ್ರಣ ರೇಖೆಯಲ್ಲಿ (ಎಲ್‌ಒಸಿ) ಗುರುವಾರ ಬೆಳಗ್ಗೆ ಪಾಕಿಸ್ತಾನವು ಅಪ್ರಚೋದಿತ ಕದನ ವಿರಾಮ ಉಲ್ಲಂಘನೆ ನಡೆಸಿತು ಎಂದು ಸೇನೆ ತಿಳಿಸಿದೆ. ಗಾಯಗೊಂಡ ಸೈನಿಕರನ್ನು ಸ್ಥಳಾಂತರಿಸಲಾಗುತ್ತಿದೆ. ಕುಪ್ವಾರಾದ ನೌಗಾಮ್ ವಿಭಾಗದ ನಿಯಂತ್ರಣ ರೇಖೆಯ ಉದ್ದಕ್ಕೂ ಪಾಕಿಸ್ತಾನವು ಅಪ್ರಚೋದಿತ ಕದನ ವಿರಾಮ ಉಲ್ಲಂಘನೆಗೆ ಚಾಲನೆ ನೀಡಿದೆ ಎಂದು ಸೇನೆಯ ವಕ್ತಾರ ರಾಜೇಶ್ ಕಾಲಿಯಾ ಹೇಳಿಕೆಯಲ್ಲಿ ತಿಳಿಸಿದರು. ‘ಇಬ್ಬರು ಸೈನಿಕರು ಮಾರಣಾಂತಿಕ ಸ್ಥಿತಿಯಲ್ಲಿದ್ದಾರೆ. ಒಟ್ಟು ನಾಲ್ಕು ಸೈನಿಕರು ಗಾಯಗೊಂಡಿದ್ದು ಅವರನ್ನು ಸ್ಥಳಾಂತರಿಸಲಾಗಿದೆ. ಪಾಕ್ ಸೇನೆಗೆ ಸೂಕ್ತ ಉತ್ತರ ನೀಡಲಾಗುತ್ತಿದೆ’ ಎಂದು ವಕ್ತಾರರು ನುಡಿದರು. ಎಲ್‌ಒಸಿಯಲ್ಲಿ ಬೆಳಗ್ಗ್ಗೆಯಿಂದ ಬಿಟ್ಟು ಬಿಟ್ಟು ಕದನ ವಿರಾಮದ ಉಲ್ಲಂಘನೆ ನಡೆಯುತ್ತಿದೆ. ಫಿರಂಗಿ ಗುಂಡಿನ ದಾಳಿಯ ಜೊತೆಗೆ ಇತರ ಶಸ್ತ್ರಾಸ್ತ್ರಗಳಿಂದಲೂ ದಾಳಿ ನಡೆಯುತ್ತಿದೆ’ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದರು. ಹುತಾತ್ಮರಾಗಿರುವ ಸೈನಿಕರನ್ನು ಯುನಿಟ್ ೧೫ ಸಿಖ್ ಲೈಟ್ ಕಾಲಾಳುಪಡೆಯ ಹವಾಲ್ದಾರ್ ಕುಲದೀಪ್ ಮತ್ತು ೮ ಜಮ್ಮು ಮತ್ತು ಕಾಶ್ಮೀರ ರೈಫಲ್ಸ್‌ನ ರೈಫಲ್ ಮ್ಯಾನ್ ಶುಭಮ್ ಎಂದು ಗುರುತಿಸಲಾಯಿತು. (ವಿವರಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)
2020: ನವದೆಹಲಿ
: ಹಿರಿಯ ಕಾಂಗ್ರೆಸ್ ಮುಖಂಡ ಅಹ್ಮದ್ ಪಟೇಲ್ ಅವರಿಗೆ ಕೊರೋನಾ ಸೋಂಕು ತಗುಲಿದ್ದು, 2020 ಅಕ್ಟೋಬರ್
01ರ ಗುರುವಾರ ಅವರು ತಮ್ಮ ನವದೆಹಲಿ ನಿವಾಸದಲ್ಲಿ ಸ್ವಯಂ ಪ್ರತ್ಯೇಕತೆ ಆರಂಭಿಸಿದರು. ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಸುದ್ದಿ ಪ್ರಕಟಿಸಿದ ಪಟೇಲ್, ಇತ್ತೀಚೆಗೆ ತನ್ನೊಂದಿಗೆ ಸಂಪರ್ಕಕ್ಕೆ ಬಂದ ಎಲ್ಲರನ್ನೂ ಸ್ವಯಂ-ಪ್ರತ್ಯೇಕಿಸಲು ಒತ್ತಾಯಿಸಿದರು. ’ನನಗೆ ಕೋವಿಡ್-೧೯ ಪಾಸಿಟಿವ್ ವರದಿ ಬಂದಿದೆ. ಇತ್ತೀಚೆಗೆ ನನ್ನೊಂದಿಗೆ ನಿಕಟ ಸಂಪರ್ಕಕ್ಕೆ ಬಂದ ಎಲ್ಲರನ್ನೂ ಸ್ವಯಂ ಪ್ರತ್ಯೇಕವಾಸ ಮಾಡಲು ನಾನು ವಿನಂತಿಸುತ್ತೇ’ ಎಂದು ಅವರು ಟ್ವೀಟ್ ಮಾಡಿದರು. ಕಾಂಗ್ರೆಸ್ ನಾಯಕ ಅಭಿಷೇಕ್ ಮನು ಸಿಂಘ್ವಿ ಮತ್ತು ತರುಣ್ ಗೊಗೊಯ್, ರಾಜ್ಯಸಭೆಯ ಉಪಸಭಾಪತಿ ಎಂ.ವೆಂಕಯ್ಯ ನಾಯ್ಡು, ಕೇಂದ್ರ ಸಚಿವರಾದ ಅಮಿತ್ ಶಾ, ನಿತಿನ್ ಗಡ್ಕರಿ ಮತ್ತು ಪ್ರಹ್ಲಾದ್ ಪಟೇಲ್ ಅವರು ಕೋವಿಡ್ -೧೯ ಸೋಂಕು ತಗುಲಿದ ಇತರ ನಾಯಕರು. ಏತನ್ಮಧ್ಯೆ, ಭಾರತವು ಗುರುವಾರ ೮೬,೮೨೧ ಹೊಸ ಕೊರೋನವೈರಸ್ ಪ್ರಕರಣಗಳನ್ನು ದಾಖಲಿಸಿದೆ.ಇದರೊಂದಿಗೆ ಭಾರತದ ಒಟ್ಟು ಕೊರೋನಾ ಪ್ರಕರಣಗಳ ಸಂಖ್ಯೆ ೬೩,೧೨,೫೮೪ ಕ್ಕೆ ತಲುಪಿದೆ ಎಂದು ಆರೋಗ್ಯ ಸಚಿವಾಲಯದ ಮಾಹಿತಿ ಬೆಳಿಗ್ಗೆ ೮ ಗಂಟೆಗೆ ತಿಳಿಸಿತು. ಕಳೆದ ೨೪ ಗಂಟೆಗಳಲ್ಲಿ ವೈರಸ್‌ನಿಂದಾಗಿ ೧,೧೮೧ ಹೊಸ ಸಾವುಗಳು ಸಂಭವಿಸಿವೆ. ಒಟ್ಟು ಸಾವಿನ ಸಂಖ್ಯೆ ೯೮,೬೭೮ ಕ್ಕೆ ತಲುಪಿದೆ. (ವಿವರಗಳಿಗೆ ಇಲ್ಲಿ
ಕ್ಲಿಕ್ ಮಾಡಿರಿ)
2020: ನವದೆಹಲಿ
: ರಾಷ್ಟ್ರಪತಿ, ಉಪರಾಷ್ಟ್ರಪತಿ ಮತ್ತು ಪ್ರಧಾನ ಮಂತ್ರಿಯವರ ಹಾರಾಟಕ್ಕಾಗಿ ಬಳಸಲಾಗುವ ಕಸ್ಟಮ್ ನಿರ್ಮಿತ ಬಿ ೭೭೭ ವಿಮಾನ 2020 ಅಕ್ಟೋಬರ್
01ರ ಗುರುವಾರ ಅಮೆರಿಕದಿಂದ ದೆಹಲಿಗೆ ಬಂದಿದೆ ಎಂದು ಸರ್ಕಾರಿ ಅಧಿಕಾರಿಗಳು ತಿಳಿಸಿದರು. ವಿಮಾನ ತಯಾರಕ ಬೋಯಿಂಗ್ ವಿಮಾನವನ್ನು ಜುಲೈ ತಿಂಗಳಲ್ಲಿ ಏರ್ ಇಂಡಿಯಾಕ್ಕೆ ತಲುಪಿಸಲು ಮೊದಲು ನಿರ್ಧರಿಸಲಾಗಿತ್ತು. ಆದರೆ ಅದರ ವಿತರಣೆಯು ಕೋವಿಡ್ -೧೯ ಸಾಂಕ್ರಾಮಿಕದ ಕಾರಣ ಜುಲೈಯಲ್ಲಿ ಮತ್ತು ತಾಂತ್ರಿಕ ಕಾರಣಗಳಿಂದಾಗಿ ಆಗಸ್ಟ್ ತಿಂಗಳಲ್ಲಿ - ಹೀಗೆ ಎರಡು ಬಾರಿ ವಿಳಂಬವಾಯಿತು ಎಂದು ಅಧಿಕಾರಿಗಳು ಹೇಳಿದರು. ವಿಮಾನದ ಕರೆ ಚಿಹ್ನೆಯಾದ ’ಏರ್ ಇಂಡಿಯಾ ಒನ್’ ಗುರುವಾರ ಮಧ್ಯಾಹ್ನ ೩ ಗಂಟೆ ಸುಮಾರಿಗೆ ಟೆಕ್ಸಾಸ್‌ನಿಂದ ದೆಹಲಿ ವಿಮಾನ ನಿಲ್ದಾಣಕ್ಕೆ ಬಂದಿಳಿದಿದೆ ಎಂದು ಅವರು ಹೇಳಿದರು. ಬೋಯಿಂಗ್‌ನಿಂದ ವಿಮಾನವನ್ನು ಸ್ವೀಕರಿಸಲು ರಾಷ್ಟ್ರೀಯ ವಿಮಾನ ವಾಹಕದ ಹಿರಿಯ ಅಧಿಕಾರಿಗಳು ಆಗಸ್ಟ್ ಪೂವಾರ್ಧದಲ್ಲಿ ಅಮೆರಿಕಕ್ಕೆ ತೆರಳಿದ್ದರು ಎಂದು ಅಧಿಕಾರಿಗಳು ನುಡಿದರು. ವಿವಿಐಪಿಗಳ ಪ್ರಯಾಣಕ್ಕಾಗಿ ಕಸ್ಟಮ್ ನಿರ್ಮಿತ ಮತ್ತೊಂದು ಬಿ ೭೭೭ ವಿಮಾನವನ್ನು ನಂತರದ ದಿನಗಳಲ್ಲಿ ಬೋಯಿಂಗ್‌ನಿಂದ ಸ್ವೀಕರಿಸುವ ಸಾಧ್ಯತೆಯಿದೆ ಎಂದು ಅವರು ಹೇಳಿದರು. ವಿವಿಐಪಿ ಪ್ರಯಾಣಕ್ಕಾಗಿ ಮರುಹೊಂದಿಸಲು ಬೋಯಿಂಗ್‌ಗೆ ಕಳುಹಿಸುವ ಮುನ್ನ ಈ ಎರಡು ವಿಮಾನಗಳು ೨೦೧೮ ರಲ್ಲಿ ಕೆಲವು ತಿಂಗಳುಗಳ ಕಾಲ ಏರ್ ಇಂಡಿಯಾದ ವಾಣಿಜ್ಯ ನೌಕೆಯ ಭಾಗವಾಗಿದ್ದವು. (ವಿವರಗಳಿಗೆ
ಇಲ್ಲಿ ಕ್ಲಿಕ್ ಮಾಡಿರಿ)
No comments:
Post a Comment