ಇಂದಿನ ಇತಿಹಾಸ History Today ಜೂನ್ 25

ಇಂದಿನ ಇತಿಹಾಸ  History Today ಜೂನ್  25

2020: ನವದೆಹಲಿ:  ಪೂರ್ವ ಲಡಾಖ್‌ನ ಗಲ್ವಾನ್ ಕಣಿವೆಯಲ್ಲಿನ ನೈಜ ನಿಯಂತ್ರಣ ರೇಖೆಯ (ಎಲ್‌ಎಸಿ) ಉದ್ದಕ್ಕೂ ಸೈನಿಕರ ಜಮಾವಣೆ, ಸೇನಾ ವಾಹನಗಳು, ಮಣ್ಣು ಸಾಗಣೆ ಯಂತ್ರೋಪಕರಣಗಳ ಓಡಾಟು ಮತ್ತು ಕಟ್ಟಡಗಳ ನಿರ್ಮಾಣ ಕಾರ್‍ಯ ಮುಂದುವರೆದಿದ್ದು, ಸೇನಾ ಜಮಾವಣೆ ಸ್ಥಗಿತಗೊಂಡಿಲ್ಲ ಎಂಬುದು ಉಪಗ್ರಹ ಚಿತ್ರಗಳಿಂದ ಖಚಿತಗೊಂಡಿದೆ ಎಂದು ಇಬ್ಬರು ಹಿರಿಯ ಅಧಿಕಾರಿಗಳು  2020 ಜೂನ್ 25ರ ಗುರುವಾರ ತಿಳಿಸಿದರು.  ಜೂನ್ ೨೨ರಂದು ಈ ಪ್ರದೇಶದ ಉಪಗ್ರಹ ಚಿತ್ರಗಳನ್ನು ತೆಗೆಯಲಾಗಿದೆ. ಜೂನ್ ೧೫ರ ರಾತ್ರಿ ಈ ಪ್ರದೇಶದಲ್ಲಿ ಭಾರತ ಮತ್ತು ಚೀನೀ ಸೈನಿಕರ ಮಧ್ಯೆ ಘರ್ಷಣೆಗಳು ಸಂಭವಿಸಿದ್ದು, ಭಾರತದ ೨೦ ಮಂದಿ ಯೋಧರು ಹುತಾತ್ಮರಾಗಿದ್ದು, ಚೀನೀ ಪಡೆಗಳ ಅಸಂಖ್ಯಾತ ಸೈನಿಕರು ಸಾವನ್ನಪ್ಪಿದ್ದರು.  ಘರ್ಷಣೆ ಸಂಭವಿಸಿದ್ದ ಪಹರೆ ಪಾಯಿಂಟ್ (ಪಿಪಿ) ೧೪ ರ ಸಮೀಪ ಚೀನೀ ಪಡೆಗಳ ಹೊಸ ರಚನೆಯನ್ನು ಭಾರತೀಯ ಸೇನೆಯು ಗಮನಿಸಿದೆ ಎಂದು ಅಧಿಕಾರಿ ನುಡಿದರು.  ಎರಡೂ ಬೆಳವಣಿಗೆಗಳ ಬಗ್ಗೆ ಸೇನೆಯಿಂದ ಯಾವುದೇ ಅಧಿಕೃತ ಹೇಳಿಕೆ ಬಂದಿಲ್ಲ. ಭಾರತ ಮತ್ತು ಚೀನಾ ಘರ್ಷಣೆ ಪ್ರದೇಶಗಳಿಂದ ಹಿಂದೆ ಸರಿಯಲು ಸೋಮವಾರ ಒಪ್ಪಿಕೊಂಡಿವೆ.  ಅಮೆರಿಕದ  ಮ್ಯಾಕ್ಸಾರ್ ಟೆಕ್ನಾಲಜೀಸ್ ಸಂಸ್ಥೆ ಬಿಡುಗಡೆ ಮಾಡಿದ ಹೊಸ ಉಪಗ್ರಹ ಚಿತ್ರವು ಗಲ್ವಾನ್ ಕಣಿವೆಯಲ್ಲಿ ಪಿಎಲ್‌ಎ ಶಿಬಿರಗಳನ್ನು ಸ್ಥಾಪಿಸಿದ್ದಲ್ಲದೆ ತನ್ನ ಸೇನಾ ಸ್ಥಾನಗಳನ್ನು ಹೆಚ್ಚಿಸಿದೆ ಎಂಬ ಹೇಳಿಕೆಯನ್ನು ಬೆಂಬಲಿಸುತ್ತದೆ. ಮ್ಯಾಕ್ಸಾರ್ ಚಿತ್ರಗಳಲ್ಲಿ ಒಂದು ಪಿಪಿ -೧೪ ಬಳಿ ಹೊಸ ಮತ್ತು ದೊಡ್ಡ ವೀಕ್ಷಣಾ ಠಾಣೆಯನ್ನು ಸೂಚಿಸುತ್ತದೆ. ೧೬ ಬಿಹಾರ ರೆಜಿಮೆಂಟ್‌ನ ಹತ್ಯೆಗೀಡಾದ ಕರ್ನಲ್ ಸಂತೋಷ್ ಬಾಬು ನೇತೃತ್ವದ ಭಾರತೀಯ ತಂಡವು ಜೂನ್ ೧೫ ರಂದು ಈ ಪ್ರದೇಶದಲ್ಲಿ ವೀಕ್ಷಣಾ ಪೋಸ್ಟ್ ಸೇರಿದಂತೆ ಕೆಲವು ರಚನೆಗಳನ್ನು ಕೆಡವಿಹಾಕಿತ್ತು. ಹಿರಿಯ ಭಾರತೀಯ ಮತ್ತು ಚೀನಾದ ಮಿಲಿಟರಿ ಕಮಾಂಡರ್‌ಗಳು ಎಲ್‌ಎಸಿಯ ಚೀನಾದ ಬದಿಯಲ್ಲಿರುವ ಮೊಲ್ಡೊದಲ್ಲಿ ೧೧ ಗಂಟೆಗಳ ಸಭೆಯಲ್ಲಿ ಎಲ್ಲಾ ಘರ್ಷಣೆ ಪ್ರದೇಶಗಳಿಂದ "ಪರಸ್ಪರ ಒಮ್ಮತವನ್ನು" ತಲುಪಿದ ದಿನವಾದ ಜೂನ್ ೨೨ ರಂದೇ ಈ ಉಪಗ್ರಹ ಚಿತ್ರಗಳನ್ನು ತೆಗೆಯಲಾಗಿದೆ. (ವಿವರಗಳಿಗೆ  ಇಲ್ಲಿ  ಕ್ಲಿಕ್  ಮಾಡಿರಿ)

2020:  ನವದೆಹಲಿ: ಸಿಬಿಎಸ್‌ಇ ೧೦ ನೇ ತರಗತಿ ಪರೀಕ್ಷೆಯನ್ನು ನಡೆಸುವುದಿಲ್ಲ ಮತ್ತು ೧೨ ನೇ ತರಗತಿಯ ವಿದ್ಯಾರ್ಥಿಗಳಿಗೆ ಪರಿಸ್ಥಿತಿಗಳು ಅನುಕೂಲಕರವಾದ ನಂತರ ಪರೀಕ್ಷೆಗಳಿಗೆ ಹಾಜರಾಗಲು ಅವಕಾಶ ನೀಡಲಾಗುವುದು ಎಂದು ಸಾಲಿಸಿಟರ್ ಜನರಲ್  2020 ಜೂನ್  25ರ ಗುರುವಾರ ಸುಪ್ರೀಂ ಕೋರ್ಟ್‌ಗೆ ತಿಳಿಸಿದರು.  ೧೨ ನೇ ತರಗತಿ ವಿದ್ಯಾರ್ಥಿಗಳಿಗೆ ಪರೀಕ್ಷೆಗಳಲ್ಲಿ ಹಾಜರಾಗಲು ಅಥವಾ ಕಳೆದ ಮೂರು ಪರೀಕ್ಷೆಗಳ ಆಧಾರದ ಮೇಲೆ ಮೌಲ್ಯಮಾಪನ ತೆಗೆದುಕೊಳ್ಳಲು ಆಯ್ಕೆ ಸಿಗುತ್ತದೆ. ಜುಲೈ ೧೫ ರೊಳಗೆ ಮೌಲ್ಯಮಾಪನ ಫಲಿತಾಂಶಗಳು ಹೊರಬರುತ್ತವೆ ಎಂದು ಸಾಲಿಸಿಟರ್ ಜನರಲ್ ನ್ಯಾಯಾಲಯಕ್ಕೆ ಹೇಳಿದರು.  ಆಂತರಿಕ ಮೌಲ್ಯಮಾಪನದ ಸರಿಯಾದ ಯೋಜನೆಯನ್ನು ಕೇಂದ್ರವು ಶುಕ್ರವಾರದೊಳಗೆ ಬಿಡುಗಡೆ ಮಾಡಲಿದೆ. ಸಾಲಿಸಿಟರ್ ಜನರಲ್ ಅವರ ಹೇಳಿಕೆಯ ಬಳಿಕ ಪೀಠವು ಈ ವಿಷಯದ ವಿಚಾರಣೆಯನ್ನು ಜೂನ್ ೨೬ ಕ್ಕೆ ಮುಂದೂಡಿತು.  ಯೋಜನೆಯ ಬಗ್ಗೆ ಮಾತನಾಡುತ್ತಾ, ಈ ಯೋಜನೆಯನ್ನು ಸ್ಪಷ್ಟವಾಗಿ ವಿವರಿಸಬೇಕು ಎಂದು ಸುಪ್ರೀಂಕೋರ್ಟ್ ಸೂಚಿಸಿತು.  * ಮೌಲ್ಯಮಾಪನವು ಭವಿಷ್ಯದ ಕೋರ್ಸ್‌ಗಳಿಗೆ ಪ್ರವೇಶದ ಆಧಾರವಾಗಿರುತ್ತದೆ, * ಪರಿಸ್ಥಿತಿಗಳು ಅನುಕೂಲಕರವಾಗಿದೆಯೆ ಎಂದು ನಿರ್ಣಯಿಸಲು ಸಮಯ-ಚೌಕಟ್ಟು, * ಭವಿಷ್ಯದಲ್ಲಿ ಅಂತಹ ಪರೀಕ್ಷೆಯನ್ನು ಕೇಂದ್ರ ಮಟ್ಟದಲ್ಲಿ ತೆಗೆದುಕೊಳ್ಳುವ ನಿರ್ಧಾರ ಮತ್ತು ರಾಜ್ಯಗಳಿಗೆ ಬಿಡುವುದಿಲ್ಲ _ ಈ ವಿಚಾರಗಳ ಬಗ್ಗೆ ಸ್ಪಷ್ಟತೆ ಇರಬೇಕು ಎಂದು ಹೇಳಿದ ಪೀಠವು, ಎಲ್ಲ ಅನುಮಾನ ತೆರವುಗೊಳಿಸುವ ಹೊಸ ಪ್ರಮಾಣಪತ್ರವನ್ನು ಕೇಂದ್ರ ಸಲ್ಲಿಸಿದ ಬಳಿಕ ಶುಕ್ರವಾರ ವಿಚಾರಣೆ ನಡೆಸಲಾಗುವುದು ಎಂದು ತಿಳಿಸಿತು.  ಪರೀಕ್ಷೆಗಳನ್ನು ನಡೆಸುವಲ್ಲಿ ವಿಳಂಬವಾಗುವುದರಿಂದ ವಿಶ್ವವಿದ್ಯಾಲಯಗಳ ಪ್ರವೇಶ ಪ್ರಕ್ರಿಯೆಯೊಂದಿಗೆ ಘರ್ಷಣೆಯಾಗುವ ಸಂಭವವಿದೆ, ಆದ್ದರಿಂದ ಯೋಜನೆಯಲ್ಲಿ ಸ್ಪಷ್ಟತೆ ಇರಬೇಕು ಎಂದು ಸುಪ್ರೀಂಕೋರ್ಟ್ ಹೇಳಿತು. (ವಿವರಗಳಿಗೆ  ಇಲ್ಲಿ  ಕ್ಲಿಕ್  ಮಾಡಿರಿ)

2020: ನವದೆಹಲಿ: ಕೇಂದ್ರದಲ್ಲಿ ಕಾಂಗ್ರೆಸ್ ನೇತೃತ್ವದ ಸರ್ಕಾರ ವಿಧಿಸಿದ್ದ ತುರ್ತು ಪರಿಸ್ಥಿತಿಯನ್ನು ವಿರೋಧಿಸಿದ ಜನರಿಗೆ  2020 ಜೂನ್  25ರ ಗುರುವಾರ  ಗೌರವ ಸಲ್ಲಿಸಿದ ಪ್ರಧಾನಿ ನರೇಂದ್ರ ಮೋದಿ, ’ಅವರ ತ್ಯಾಗವನ್ನು ದೇಶ ಎಂದಿಗೂ ಮರೆಯುವುದಿಲ್ಲ’ ಎಂದು ಹೇಳಿದರು.  "ನಿಖರವಾಗಿ ೪೫ ವರ್ಷಗಳ ಹಿಂದೆ ದೇಶದಲ್ಲಿ ತುರ್ತು ಪರಿಸ್ಥಿತಿಯನ್ನು ವಿಧಿಸಲಾಯಿತು. ಆ ಸಮಯದಲ್ಲಿ ಪ್ರಜಾಪ್ರಭುತ್ವವನ್ನು ರಕ್ಷಿಸಲು ಹೋರಾಡಿದ ಜನರಿಗೆ ನಾನು ವಂದಿಸುತ್ತೇನೆ. ಅವರ ತ್ಯಾಗವನ್ನು ದೇಶ ಎಂದಿಗೂ ಮರೆಯುವುದಿಲ್ಲ’ ಎಂದು ಪ್ರಧಾನಿ ಮೋದಿ ಹಿಂದಿಯಲ್ಲಿ ಟ್ವೀಟ್ ಮಾಡಿದರು.  ೧೯೭೫ರ ಜೂನ್ ೨೫ರಂದು ಆಗಿನ ಪ್ರಧಾನಿ ಇಂದಿರಾಗಾಂಧಿ ನೇತೃತ್ವದ ಸರ್ಕಾರ ರಾಷ್ಟ್ರವ್ಯಾಪಿ ತುರ್ತು ಪರಿಸ್ಥಿತಿಯನ್ನು ಜಾರಿಗೊಳಿಸಿತ್ತು.  ಪ್ರಧಾನಿ ಮೋದಿ ಅವರು ಟ್ವೀಟಿಗೆ ಕಳೆದ ವರ್ಷ ತಮ್ಮ ಮನ್ ಕಿ ಬಾತ್ ರೇಡಿಯೋ ವಿಳಾಸದ ಕ್ಲಿಪ್ ಅನ್ನು ಲಗತ್ತಿಸಿದ್ದಾರೆ. ಅದರಲ್ಲಿ ಅವರು ತುರ್ತುಪರಿಸ್ಥಿತಿ ಯುಗದ ಬಗ್ಗೆ ಮಾತನಾಡಿದ್ದರು. ಆ ಸಮಯದಲ್ಲಿ ಕೇಂದ್ರದ ಕಾಂಗ್ರೆಸ್ ಸರ್ಕಾರದ ನೇತೃತ್ವವನ್ನು ಆಗಿನ ಪ್ರಧಾನಿ ಇಂದಿರಾ ಗಾಂಧಿ ವಹಿಸಿದ್ದರು.  ಗೃಹ ಸಚಿವ ಅಮಿತ್ ಶಾ ಅವರು ಕಾಂಗ್ರೆಸ್ ಪಕ್ಷಕ್ಕೆ ಕೆಲವು ಪ್ರಶ್ನೆಗಳನ್ನು ಕೇಳಿದ್ದಲ್ಲದೆ, ಮತ್ತು ವಿರೋಧ ಪಕ್ಷಕ್ಕೆ ಕೆಲವು ಸಲಹೆಗಳನ್ನು ನೀಡಿದ ಕೆಲವು ಗಂಟೆಗಳ ನಂತರ ಪ್ರಧಾನಿ ಮೋದಿ ಅವರ ಟ್ವೀಟ್ ಬಂದಿತು. ”ತುರ್ತು ಪರಿಸ್ಥಿತಿ ಕಾಲದ ಮನಸ್ಥಿತಿ ಈಗಲೂ ಏಕೆ ಉಳಿದಿದೆ? ಒಂದು ರಾಜವಂಶಕ್ಕೆ ಸೇರದ ನಾಯಕರು ಏಕೆ ಮಾತನಾಡಲು ಸಾಧ್ಯವಾಗುತ್ತಿಲ್ಲ? ಕಾಂಗೆಸ್ಸಿನಲ್ಲಿ ನಾಯಕರು ಏಕೆ ನಿರಾಶರಾಗುತ್ತಿದ್ದಾರೆ? ಎಂಬ ಪ್ರಶ್ನೆಯನ್ನು ಭಾರತದ ವಿರೋಧ ಪಕ್ಷಗಳಲ್ಲಿ ಒಂದಾಗಿರುವ ಕಾಂಗ್ರೆಸ್ ತನಗೆ ತಾನೇ ಕೇಳಿಕೊಳ್ಳಬೇಕು ಇಲ್ಲದಿದ್ದರೆ, ಜನರೊಂದಿಗೆ ಅವರ ಸಂಪರ್ಕ ಕಡಿತಗೊಳ್ಳುತ್ತಲೇ ಹೋಗುತ್ತದೆ’ ಎಂದು ಅಮಿತ್ ಶಾ ಟ್ವೀಟ್ ಮಾಡಿದ್ದರು. (ವಿವರಗಳಿಗೆ  ಇಲ್ಲಿ  ಕ್ಲಿಕ್  ಮಾಡಿರಿ)

2020: ನವದೆಹಲಿ: ಅಗಸ್ಟಾ ವೆಸ್ಟ್ ಲ್ಯಾಂಡ್ ಹಗರಣದಲ್ಲಿ ೭೦ ಮಿಲಿಯನ್ (೭೦ ದಶಲಕ್ಷ) ಯೂರೋ ಲಂಚದ ಹಣ ಪಡೆದ ನೈಜ ಫಲಾನುಭವಿಗಳ ಸುತ್ತ ತನ್ನ ಕುಣಿಕೆಯನ್ನು ಬಿಗಿಗೊಳಿಸಲು ಜಾರಿ ನಿರ್ದೇಶನಾಲಯ (ಇಡಿ) ಮತ್ತು ಕೇಂದ್ರೀಯ ತನಿಖಾ ದಳ (ಸಿಬಿಐ) ಯತ್ನ ನಡೆಸುತ್ತಿದ್ದು, ಇದೇ ಹಿನ್ನೆಲೆಯಲ್ಲಿ 2020 ಜೂನ್ 24ರ ಬುಧವಾರ  ಎಂಜಿಎಫ್ ಆಡಳಿತ ನಿರ್ದೇಶಕ ಶ್ರವಣ್ ಗುಪ್ತ ಆವರಣಗಳ ಮೇಲೆ ಜಾರಿ ನಿರ್ದೇಶನಾಲಯ ದಾಳಿ  ನಡೆಸಿದೆ.  ರಿಯಾಲ್ಟಿ ಸಂಸ್ಥೆ ಎಂಜಿಫ್ ಆಡಳಿತ ನಿರ್ದೇಶಕ ಶ್ರವಣ್ ಗುಪ್ತ ಆವರಣಗಳ ಮೇಲಿನ ದಾಳಿಯು ನಿರ್ದಿಷ್ಟ ಕಾಲಘಟ್ಟದಲ್ಲಿ ಹಲವಾರು ಸಂಸ್ಥೆಗಳ ಮೂಲಕ ಹರಿದು ಹೋಗಿರುವ ಹಣದ ಮಾರ್ಗವನ್ನು ಪತ್ತೆ ಹಚ್ಚುವ ಬಗ್ಗೆ ಗಮನ ಹರಿಸಿದೆ ಎಂದು ಜಾರಿ ನಿರ್ದೇಶನಾಲಯ ಅಧಿಕಾರಿಗಳು ತಿಳಿಸಿದ್ದಾರೆ.  ಬೆನ್ನಲ್ಲೇ, ಐವರು ಹಿರಿಯ ಸರ್ಕಾರಿ ಅಧಿಕಾರಿಗಳು ಮತ್ತು ಬ್ರಿಟಿಷ್ ಮಧ್ಯವರ್ತಿ ಕ್ರಿಸ್ಟಿಯನ್ ಮೈಕೆಲ್ ವಿರುದ್ಧ ದೋಷಾರೋಪ ಪಟ್ಟಿ (ಚಾರ್ಜ್‌ಶೀಟ್) ಸಲ್ಲಿಸಲೂ ಸಿಬಿಐ ಸಜ್ಜಾಗಿದ್ದು, ಈ ಮುನ್ನವೇ ಅದು ಕಾನೂನು ಕ್ರಮಕ್ಕಾಗಿ ಸರ್ಕಾರದ ಅನುಮತಿ ಕೋರಿತ್ತು.  ಮುಂದಿನ ಕೆಲವು ತಿಂಗಳುಗಳಲ್ಲಿ ಹಗರಣಕ್ಕೆ ಸಂಬಂಧಿಸಿದಂತೆ ಮಹತ್ವದ ಬೆಳವಣಿಗೆಗಳು ಆಗಲಿವೆ ಎಂದು ಉಭಯ ತನಿಖಾ ಸಂಸ್ಥೆಗಳ ಅಧಿಕಾರಿಗಳು ಹೇಳಿದ್ದಾರೆ. ಹಿಂದಿನ ಎಂಆರ್ ಎಂಜಿಎಫ್ ಸಂಸ್ಥೆಯ ನಿರ್ದೇಶಕರಾಗಿದ್ದ ಗುಪ್ತ ಅವರನ್ನು ೨೦೦೯ರಲ್ಲಿ ಐರೋಪ್ಯ ಮಧ್ಯವರ್ತಿ ಗೈಡೊ ಹಶ್ಚಕೆ ಅವರಿಂದ ಇನ್ನೊಂದು ಕಂಪೆನಿಯ ಸ್ವತಂತ್ರ ನಿರ್ದೇಶಕರಾಗಿ ನೇಮಕ ಮಾಡಿದ ಬಗ್ಗೆ ತೀವ್ರ ತನಿಖೆ ನಡೆಸಲಾಗುತ್ತಿದೆ. ಇಟಲಿಯಲ್ಲಿ ವಾಸವಾಗಿದಾರೆ ಎನ್ನಲಾಗಿರುವ ಹಶ್ಚಕೆ ಅವರಿಗಾಗಿ ತನಿಖಾ ಸಂಸ್ಥೆಗಳು ಹುಡುಕಾಡುತ್ತಿವೆ. ಗುಪ್ತ ಅವರನ್ನು ಈ ಹಿಂದೆ ೨೦೧೬ರಲ್ಲಿ ಪ್ರಶ್ನಿಸಲಾಗಿತ್ತು. (ವಿವರಗಳಿಗೆ  ಇಲ್ಲಿ  ಕ್ಲಿಕ್  ಮಾಡಿರಿ)

2020: ನವದೆಹಲಿ: ಭಾರತವು ಗುರುವಾರ ಕೋವಿಡ್-೧೯ ಪ್ರಕರಣಗಳಲ್ಲಿ ಅತಿ ಹೆಚ್ಚು ಏಕದಿನ ಹೆಚ್ಚಳವನ್ನು ದಾಖಲಿಸಿದ್ದು, ೧೬,೦೦೦ ಕ್ಕೂ ಹೆಚ್ಚು  ಕೊರೋನವೈರಸ್ ಸೋಂಕುಗಳನ್ನು ದಾಖಲಿಸಿದೆ. ಇದರೊಂದಿಗೆ ಒಟ್ಟು ಸೋಂಕಿತರ ಸಂಖ್ಯೆ ೪.೭೩ ಲಕ್ಷಕ್ಕೆ ಏರಿದೆ.  2020 ಜೂನ್ 25ರ ಗುರುವಾರ ಒಂದೇ ದಿನ ಅತ್ಯಧಿಕ ಅಂದರೆ ೪೧೮ ರಷ್ಟು ದಾಖಲಾಗಿದೆ ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿತು.  ಕೊರೋನವೈರಸ್ ಪ್ರಕರಣಗಳು ೧೪,೦೦೦ ಕ್ಕಿಂತ ಹೆಚ್ಚಾಗಿರುವುದು ಇದು ಸತತ ಆರನೇ ದಿನವಾಗಿದೆ. ಜೂನ್ ೨೦ ರಂದು ದೇಶವು ೧೪,೫೧೬ ಪ್ರಕರಣಗಳ ಹೆಚ್ಚಳ ದಾಖಲಿಸಿತ್ತು. ಜೂನ್ ೨೧ ರಂದು, ೧೫,೪೧೩ ಪ್ರಕರಣಗಳ ಹೆಚ್ಚಳವಾಗಿದೆ; ಜೂನ್ ೨೨ ರಂದು ೧೪,೮೨೧ ಪ್ರಕರಣಗಳು, ಜೂನ್ ೨೩ ರಂದು ೧೪,೯೩೩ ಪ್ರಕರಣಗಳು ಮತ್ತು ಜೂನ್ ೨೪ ರಂದು ೧೫,೯೬೮ ಪ್ರಕರಣಗಳು ದಾಖಲಾಗಿವೆ.  ಇದರ ಪರಿಣಾಮವಾಗಿ, ಜೂನ್ ೨೦ ರಿಂದ ಭಾರತ ೯೨,೫೭೩ ಪ್ರಕರಣಗಳನ್ನು ಮತ್ತು ಜೂನ್ ೧ ರಿಂದ ಈ ತಿಂಗಳು ೨.೮೨ ಲಕ್ಷ ಪ್ರಕರಣಗಳನ್ನು ಸೇರಿಸಿದೆ. ಗುರುವಾರ ಬೆಳಿಗ್ಗೆ ೮ ಗಂಟೆಗೆ ನವೀಕರಿಸಿದ ಆರೋಗ್ಯ ಸಚಿವಾಲಯದ ಮಾಹಿತಿಯು, ದಿನನಿತ್ಯದ ೧೬,೯೨೨ ಪ್ರಕರಣಗಳೊಂದಿಗೆ ಒಟ್ಟು ಸೋಂಕಿನ ಪ್ರಕರಣಗಳ ಸಂಖ್ಯೆ ೪,೭೩,೧೦೫ಕ್ಕೆ ತಲುಪಿದೆ ಎಂದು ತೋರಿಸಿತು. ೪೧೮ ಹೊಸ ಸಾವುಗಳೊಂದಿಗೆ ಒಟ್ಟು ಸಾವುಗಳು ೧೪೮೮೪ ಕ್ಕೆ ಏರಿದವು. ಆದಾಗ್ಯೂ, ಮಾಹಿತಿಯ ಪ್ರಕಾರ, ಚೇತರಿಕೆ ಪ್ರಮಾಣವು ಶೇಕಡಾ ೫೭.೪೩ ಕ್ಕೆ ಏರಿದೆ. ಸಕ್ರಿಯ ಪ್ರಕರಣಗಳ ಸಂಖ್ಯೆ ೧,೮೬,೫೧೪ ಆಗಿದ್ದು, ೨,೭೧,೬೯೬ ಜನರು ಚೇತರಿಸಿಕೊಂಡಿದ್ದಾರೆ.  (ವಿವರಗಳಿಗೆ  ಇಲ್ಲಿ  ಕ್ಲಿಕ್  ಮಾಡಿರಿ)

2020: ನವದೆಹಲಿ: ಲಡಾಖ್‌ನ ಗಲ್ವಾನ್ ಕಣಿವೆಯಲ್ಲಿ ಹಿಂಸಾತ್ಮಕ ಘರ್ಷಣೆ ಸಂಭವಿಸಲು ಚೀನಾವೇ ಹೊಣೆ ಎಂದು ಭಾರತ ಗುರುವಾರ ಖಂಡತುಂಡವಾಗಿ ಹೇಳಿತು.  ಒಪ್ಪಿದ ಎಲ್ಲ ಒಪ್ಪಂದಗಳನ್ನೂ ಉಲ್ಲಂಘಿಸಿ ಚೀನಾವು ನೈಜ ನಿಯಂತ್ರಣ ರೇಖೆಯ (ಎಲ್‌ಎಸಿ) ಉದ್ದಕ್ಕೂ ಸೇನೆ ಜಮಾವಣೆ ಮಾಡಿದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ವಕ್ತಾರ ಅನುರಾಗ್  ಶ್ರೀವಾಸ್ತವ  2020 ಜೂನ್ 25ರ ಗುರುವಾರ ಹೇಳಿದರು.  "ಮೇ ಆರಂಭದಿಂದಲೂ, ಚೀನಾದ ಕಡೆಯವರು ಎಲ್‌ಎಸಿಯ ಉದ್ದಕ್ಕೂ ಸೇನೆ ಮತ್ತು ಶಸ್ತ್ರಾಸ್ತ್ರಗಳನ್ನು ಸಂಗ್ರಹಿಸುತ್ತಿದ್ದಾರೆ, ಇದು ಎಲ್ಲಾ ಒಪ್ಪಂದಗಳಿಗೆ ವಿರುದ್ಧವಾಗಿದೆ’ ಎಂದು ಶ್ರೀವಾಸ್ತವ ನುಡಿದರು. ಭಾರತವು ಬಹಳ ದಿನಗಳಿಂದ ಗಲ್ವಾನ್ ಕಣಿವೆಯಲ್ಲಿ ಗಸ್ತು ತಿರುಗುತ್ತಿದೆ. ಆದರೆ ಯಥಾಸ್ಥಿತಿಯನ್ನು ಬದಲಾಯಿಸಲು ಎಂದಿಗೂ ಪ್ರಯತ್ನಿಸಲಿಲ್ಲ. ಆದರೆ ಚೀನಾದ ನಡೆನುಡಿ ಇದಕ್ಕೆ ಅನುಗುಣವಾಗಿ ಇರಲಿಲ್ಲ ಎಂದು ಶ್ರೀವಾಸ್ತವ ಹೇಳಿದರು. ಬುಧವಾರ, ಚೀನಾ, ಮೊದಲ ಬಾರಿಗೆ, ಭಾರತೀಯ ಸೈನಿಕರೊಂದಿಗಿನ ಹಿಂಸಾತ್ಮಕ ಘರ್ಷಣೆಯಲ್ಲಿ ತನ್ನ ಬದಿಯಲ್ಲಿ ಸಾವುನೋವುಗಳು ಸಂಭವಿಸಿರುವುದನ್ನು ಒಪ್ಪಿಕೊಂಡಿತ್ತು. ಆದರೆ "ಸಂಖ್ಯೆಗಳು ತುಂಬಾ ಹೆಚ್ಚಿಲ್ಲ" ಎಂದು ಹೇಳಿತು. (ವಿವರಗಳಿಗೆ  ಇಲ್ಲಿ  ಕ್ಲಿಕ್  ಮಾಡಿರಿ)

ಇಂದಿನ ಇತಿಹಾಸ  History Today ಜೂನ್  25 (2019+ ಹಿಂದಿನವುಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)

-ಸಂಗ್ರಹ: ನೆತ್ರಕೆರೆ ಉದಯಶಂಕರ