ಇಂದಿನ ಇತಿಹಾಸ History Today ನವೆಂಬರ್ 12

 ಇಂದಿನ ಇತಿಹಾಸ  History Today ನವೆಂಬರ್ 12

2020: ನವದೆಹಲಿ: ಕೊರೋನವೈರಸ್ ಸಾಂಕ್ರಾಮಿಕ ರೋಗದ ಹಿನ್ನೆಲೆಯಲ್ಲಿ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಆರ್ಥಿಕತೆ ಪುನಃಶ್ಚೇತನಕ್ಕಾಗಿ ಹೊಸ ಉದ್ಯೋಗ ಸೃಷ್ಟಿ ಯೋಜನೆ, ರೈತರಿಗೆ ರಸಗೊಬ್ಬರ ಸಬ್ಸಿಡಿ, ರಿಯಲ್ ಎಸ್ಟೇಟ್ ಕ್ಷೇತ್ರಕ್ಕೆ ಬೆಂಬಲ ಸಹಿತವಾಗಿ ಹಲವಾರು ಕ್ರಮಗಳನ್ನು 2020 ನವೆಂಬರ್ 12ರ ಗುರುವಾರ ಪ್ರಕಟಿಸಿದರು. ಇದು ಶನಿವಾರ ಆರಂಭವಾಗುವ ದೀಪಾವಳಿಗೆ ಮುನ್ನ ಕೇಂದ್ರ ಸರ್ಕಾರದ ಇನ್ನೊಂದು ಪ್ರಚೋದಕ ಕೊಡುಗೆಯಾಗಿದೆ. "ನಾನು ಆತ್ಮನಿರ್ಭರ ಭಾರತ ಉದ್ಯೋಗ ಯೋಜನೆಯನ್ನು (ಆತ್ಮ ನಿರ್ಭರ ಭಾರತ ರೋಜ್‌ಗಾರ್ ಯೋಜನಾ) ಘೋಷಿಸುತ್ತಿದ್ದೇನೆ, ಇದು ಕೋವಿಡ್ -೧೯ ಚೇತರಿಕೆಯ ಹಂತದಲ್ಲಿ ಹೊಸ ಉದ್ಯೋಗಾವಕಾಶಗಳನ್ನು ಸೃಷ್ಟಿಸಲು ಉತ್ತೇಜನ ನೀಡುತ್ತದೆ. ಇಪಿಎಫ್‌ಒ ನೋಂದಾಯಿತ ಸಂಸ್ಥೆಗಳಲ್ಲಿ ತಿಂಗಳಿಗೆ ೧೫ ಸಾವಿರ ರೂ.ಗಿಂತ ಕಡಿಮೆ ವೇತನದಲ್ಲಿ ಉದ್ಯೋಗ ಸೇರುವವರಿಗೆ ಇದು ಅನ್ವಯವಾಗುತ್ತದೆ’ ಎಂದು ಸೀತಾರಾಮನ್ ಹೇಳಿದರು. "ಇದು ೨೦೨೦ ಅಕ್ಟೋಬರ್ ೧ರಿಂದ ಜಾರಿಗೆ ಬರಲಿದೆ. ಅವುಗಳನ್ನು ಎರಡು ವರ್ಷಗಳವರೆಗೆ ಯೋಜನೆ ಅನ್ವಯಿಸುವುದು’ ಎಂದು ಅವರು ಹೇಳಿದರು. ಆರ್ಥಿಕ ಚೇತರಿಕೆಯ ವಿವರಗಳನ್ನು ನೀಡಿದ ಅವರು, ಕಾಂಪೋಸಿಟ್ ಕೊಳ್ಳುವಿಕೆ ವ್ಯವಸ್ಥಾಪಕರ ಸೂಚ್ಯಂಕ (ಪಿಎಂಐ) ಅಕ್ಟೋಬರಿನಲ್ಲಿ ಶೇ ೫೮.೯ ಕ್ಕೆ ಏರಿತು, ಹಿಂದಿನ ತಿಂಗಳಲ್ಲಿ ಇದು ಶೇ ೫೪.೬ ರಷ್ಟಿತ್ತು. ಇದು ೯ ವರ್ಷಗಳಲ್ಲೇ ಅತ್ಯಂತ ಪ್ರಬಲ ಏರಿಕೆ ಎಂದು ವಿವರಿಸಿದರು. ಇಂಧನ ಬಳಕೆಯ ಬೆಳವಣಿಗೆಯು ಅಕ್ಟೋಬರಿನಲ್ಲಿ ವರ್ಷಕ್ಕೆ ಶೇ ೧೨ ಕ್ಕೆ ಏರಿಕೆಯಾದರೆ, ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಸಂಗ್ರಹವು ಶೇಕಡಾ ೧೦ ರಷ್ಟು ಏರಿಕೆಯಾಗಿ ೧.೦೫ ಲಕ್ಷ ಕೋಟಿ ರೂ.ಗೆ ತಲುಪಿದೆ. ದೈನಂದಿನ ರೈಲ್ವೆ ಸರಕು ಸಾಗಣೆ ಸರಾಸರಿ ಶೇಕಡಾ ೧೨ರಷ್ಟು ಇದ್ದುದು ಶೇಕಡಾ ೨೦ರಷ್ಟು ಹೆಚ್ಚಿದೆ. ಬ್ಯಾಂಕ್ ಸಾಲ ಶೇಕಡಾ ೫.೧ರಷ್ಟು ಸುಧಾರಿಸಿದೆ ಎಂದು ಅವರು ನುಡಿದರು.  (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ಪಾಟ್ನಾ: ಸಾರ್ವಜನಿಕರು ನಮ್ಮೊಂದಿಗಿದ್ದಾರೆ. ಮಹಾ ಮೈತ್ರಿಗೆ (ಮಹಾ ಘಟಬಂಧನ್) ಜಯವಾಗಿದೆ’ ಎಂದು ಬಿಹಾರ ವಿಧಾನಸಭಾ ಚುನಾವಣಾ ಫಲಿತಾಂಶ ಬಳಿಕ 2020 ನವೆಂಬರ್ 12ರ ಗುರುವಾರ ನೀಡಿದ ಮೊದಲ ಪ್ರತಿಕ್ರಿಯೆಯಲ್ಲಿ ರಾಷ್ಟ್ರೀಯ ಜನತಾ ದಳ (ಆರ್‌ಜೆಡಿ) ಮುಖಂಡ ತೇಜಸ್ವೀ ಯಾದವ್ ಹೇಳಿದರು. ತಮ್ಮ ಪಕ್ಷವು ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ ಏಕೈಕ ದೊಡ್ಡ ಪಕ್ಷವಾಗಿ  ಹೊರಹೊಮ್ಮಿದೆ ಎಂದು ಗುರುವಾರ ತೇಜಸ್ವೀ ಯಾದವ್ ಅವರು ಸುದ್ದಿಗಾರರ ಜೊತೆ ಮಾತನಾಡುತ್ತಾ ನುಡಿದರು. ’ಬೇರೊಬ್ಬರು ಮುಖ್ಯಮಂತ್ರಿ ಕುರ್ಚಿಯ ಮೇಲೆ ಕುಳಿತಿದ್ದರೂ ಸಹ, ಜನರ ಆದೇಶವು ನಮ್ಮ ಪರವಾಗಿದೆ ಎಂದು ನುಡಿದ ಯಾದವ್, ಮಹಾ ಘಟಬಂಧನ್ (ಮಹಾ ಮೈತ್ರಿ) ಪರವಾಗಿ ಮತ ಚಲಾಯಿಸಿದ್ದಕ್ಕಾಗಿ ಬಿಹಾರದ ಜನರಿಗೆ ಧನ್ಯವಾದ ಅರ್ಪಿಸಿದರು. ‘ಜನಾದೇಶವು ಮಹಾ ಘಟಬಂಧನ್ ಪರವಾಗಿದೆ, ಆದರೆ ಚುನಾವಣಾ ಆಯೋಗದ ಫಲಿತಾಂಶವು ಎನ್‌ಡಿಎ ಪರವಾಗಿದೆ. ಇದು ಮೊದಲ ಬಾರಿಗೆ ಸಂಭವಿಸಿಲ್ಲ. ೨೦೧೫ ರಲ್ಲಿ, ಮಹಾ ಘಟಬಂಧನ್ ರಚನೆಯಾದಾಗ, ಮತಗಳು ನಮ್ಮ ಪರವಾಗಿದ್ದವು ಆದರೆ ಅಧಿಕಾರ ಪಡೆಯಲು ಬಿಜೆಪಿ ಹಿಂಬಾಗಿಲಿನ ಪ್ರವೇಶವನ್ನು ಮಾಡಿತು’ ಎಂದು ತೇಜಸ್ವೀ ನುಡಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ರಿಪಬ್ಲಿಕ್ ಟಿವಿ ಸಂಪಾದಕ ಅರ್ನಬ್ ಗೋಸ್ವಾಮಿ ಅವರಿಗೆ ಮಧ್ಯಂತರ ಜಾಮೀನು ನೀಡಿದ್ದಕ್ಕಾಗಿ ಸುಪ್ರಿಂಕೋರ್ಟನ್ನು ಟೀಕಿಸಿ ಸರಣಿ ಟ್ವೀಟ್‌ಗಳನ್ನು ಪ್ರಕಟಿಸಿದ ಹಾಸ್ಯನಟ ಕುನಾಲ್ ಕಮ್ರಾ ಈಗ ಸುಪ್ರೀಂಕೋರ್ಟ್ ನಿಂದನೆಯ ಆರೋಪಕ್ಕೆ ಗುರಿಯಾಗಿದ್ದ ನ್ಯಾಯಾಂಗ ನಿಂದನೆ ಮೊಕದ್ದಮೆ ಎದುರಿಸಬೇಕಾಗಿ ಬಂದಿದೆ. ಸ್ಟ್ಯಾಂಡ್-ಅಪ್ ಕಾಮಿಕ್ ಕುನಾಲ್ ಕಮ್ರಾ ವಿರುದ್ಧ ಕ್ರಿಮಿನಲ್ ನ್ಯಾಯಾಂಗ ನಿಂದನೆ ಮೊಕದ್ದಮೆ ಹೂಡಲು ಬಯಸಿದ ಕಾನೂನು ವಿದ್ಯಾರ್ಥಿ ಮತ್ತು ಇಬ್ಬರು ವಕೀಲರಿಗೆ ಖಟ್ಲೆ ದಾಖಲಿಸಲು ಅಟಾರ್ನಿ ಜನರಲ್ ಕೆ.ಕೆ. ವೇಣುಗೋಪಾಲ್ 2020 ನವೆಂಬರ್ 12ರ ಗುರುವಾರ ಒಪ್ಪಿಗೆ ನೀಡಿದರು. "ಜನರು ಸುಪ್ರೀಂ ಕೋರ್ಟ್ ಮೇಲೆ ಅಸಮರ್ಥನೀಯ ದಾಳಿ ಮಾಡುವುದನ್ನು ಜನರು ಅರ್ಥಮಾಡಿಕೊಳ್ಳಲು ಇದು ಸಕಾಲ ಮತ್ತು ಇಂತಹ ಅಪರಾಧವು ನಿರ್ದಯವಾಗಿ ಶಿಕ್ಷೆಗೆ ಕಾರಣವಾಗುತ್ತದೆ’ ಎಂದು  ವೇಣುಗೋಪಾಲ್ ಹೇಳಿದರು. ಹಾಸ್ಯನಟನ ಟ್ವೀಟ್‌ಗಳು ಕೆಟ್ಟ ಅಭಿರುಚಿಯವು ಮಾತ್ರವಲ್ಲ, ಹಾಸ್ಯ ಮತ್ತು ತಿರಸ್ಕಾರದ ನಡುವಿನ ಗಡಿಯನ್ನು ಸ್ಪಷ್ಟವಾಗಿ ದಾಟಿವೆ ಎಂದು ಅಟಾರ್ನಿ ಜನರಲ್ ಹೇಳಿದರು. "ಈ ಟ್ವೀಟ್ ಭಾರತದ ಸರ್ವೋಚ್ಚ ನ್ಯಾಯಾಲಯ ಮತ್ತು ಅದರ ನ್ಯಾಯಮೂರ್ತಿಗಳ ವಿರುದ್ಧದ ಸಂಪೂರ್ಣ ಪ್ರಚೋದನೆಯಾಗಿದೆ’ ಎಂದೂ ವೇಣುಗೋಪಾಲ್ ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ಭಾರತ ಮತ್ತು ಆಸಿಯಾನ್‌ನ ಕಾರ್ಯತಂತ್ರದ ಸಹಭಾಗಿತ್ವವು ನಾವು ಹಂಚಿಕೊಂಡಿರುವ ಐತಿಹಾಸಿಕ, ಭೌಗೋಳಿಕ ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಆಧರಿಸಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು  ೧೭ ನೇ ಆಸಿಯಾನ್-ಭಾರತ ಶೃಂಗಸಭೆಯನ್ನು ಉದ್ದೇಶಿಸಿ 2020 ನವೆಂಬರ್ 12ರ ಗುರುವಾರ ಮಾತನಾಡುತ್ತಾ ಹೇಳಿದರು. ‘ಆಸಿಯಾನ್ ಯಾವಾಗಲೂ ನಮ್ಮ ಆಕ್ಟ್ ಈಸ್ಟ್ ಪಾಲಿಸಿಯ ತಿರುಳು. ಭಾರತದ ಹಿಂದೂ ಮಹಾಸಾಗರ- ಶಾಂತ ಸಾಗರ (ಇಂಡೋ ಪೆಸಿಫಿಕ್) ಉಪಕ್ರಮ ಮತ್ತು ಆಸಿಯಾನ್‌ನ ಔಟ್ ಲುಕ್ ಆನ್ ಇಂಡೋ ಪೆಸಿಫಿಕ್ ನಡುವೆ ಹಲವು ಹೋಲಿಕೆಗಳಿವೆ’ ಎಂದು ಪ್ರಧಾನಿ ಹೇಳಿದರು. ಪ್ರಧಾನಿ ಮೋದಿ ಅವರು ಕೋವಿಡ್ -೧೯ ಸಾಂಕ್ರಾಮಿಕ ರೋಗದ ಬಗ್ಗೆ ಮಾತನಾಡುತ್ತಾ, ಇತರ ವರ್ಷಗಳಂತೆ, ಈ ವರ್ಷ ಸಭೆಯ ಯಾವುದೇ ‘ಕುಟುಂಬ ಫೋಟೋ’ ಇರುವುದಿಲ್ಲ ಎಂದು ಹೇಳಿದರು. "ನಾವು ಪ್ರತಿ ವಲಯದಲ್ಲೂ ಭಾರತ ಮತ್ತು ಆಸಿಯಾನ್ ನಡುವಿನ ಸಂಪರ್ಕವನ್ನು ಹೆಚ್ಚಿಸಲು ಬಯಸುತ್ತೇವೆ" ಎಂದು ಪ್ರಧಾನಿ ಹೇಳಿದರು. ಸಭೆ ವರ್ಚುಯಲ್ ಆಗಿದ್ದರೂ, ಇದು ನಮ್ಮ ನಡುವಿನ ಅಂತರವನ್ನು ನಿವಾರಿಸುವ ಪ್ರಯತ್ನವಾಗಿದೆ ಎಂದು ಪ್ರಧಾನಿ ಮೋದಿ ಹೇಳಿದರು. ಆಗ್ನೇಯ ಏಷ್ಯಾ ರಾಷ್ಟ್ರಗಳ ಸಂಘ (ಆಸಿಯಾನ್) ಈ ಪ್ರದೇಶದ ಪ್ರಮುಖ ಗುಂಪುಗಳಲ್ಲಿ ಒಂದಾಗಿದೆ. ಇಂಡೋನೇಷ್ಯಾ, ಮಲೇಷ್ಯಾ, ಫಿಲಿಪೈನ್ಸ್, ಸಿಂಗಾಪುರ್, ಥೈಲ್ಯಾಂಡ್, ಬ್ರೂನಿ, ವಿಯೆಟ್ನಾಂ, ಲಾವೋಸ್, ಮ್ಯಾನ್ಮಾರ್ ಮತ್ತು ಕಾಂಬೋಡಿಯಾ ಇದರ ಸದಸ್ಯರಾಗಿದ್ದಾರೆ. ಭಾರತ, ಅಮೆರಿಕ, ಚೀನಾ, ಜಪಾನ್ ಮತ್ತು ಆಸ್ಟ್ರೇಲಿಯಾ ಇದರ ಸಂವಾದ ಪಾಲುದಾರರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ಐದು ಎಸ್ -೪೦೦ ವಾಯು ರಕ್ಷಣಾ ವ್ಯವಸ್ಥೆಗಳ ವಿತರಣೆಯನ್ನು ತ್ವರಿತಗೊಳಿಸುವಂತೆ ಭಾರತವು ಮಾಡಿರುವ ಮನವಿಯನ್ನು ರಷ್ಯಾ ಪರಿಗಣಿಸಲಿದ್ದು, ಮೊದಲ ತಂಡವನ್ನು ೨೦೨೧ ರ ಅಂತ್ಯದ ವೇಳೆಗೆ ನವದೆಹಲಿಗೆ ಹಸ್ತಾಂತರಿಸಲಾಗುವುದು ಎಂದು ರಷ್ಯಾದ ರಾಜತಾಂತ್ರಿಕರು 2020 ನವೆಂಬರ್ 12ರ ಗುರುವಾರ ತಿಳಿಸಿದರು. ಉಭಯ ದೇಶಗಳು ಕಾ -೨೨೬ ಬಹುಪಯೋಗಿ ಹೆಲಿಕಾಪ್ಟರುಗಳ ಒಪ್ಪಂದವನ್ನು ಅಂತಿಮಗೊಳಿಸಲು ಸನ್ನಿಹಿತವಾಗಿವೆ. ಇದು ಮೇಕ್ ಇನ್ ಇಂಡಿಯಾ ಮತ್ತು ಆತ್ಮನಿರ್ಭರ ಭಾರತ (ಸ್ವಾವಲಂಬಿ ಭಾರತ) ಉಪಕ್ರಮಗಳಿಗೆ ಅನುಗುಣವಾಗಿ ಘಟಕಗಳ ಸ್ಥಳೀಕರಣವನ್ನು ಸಾಧ್ಯವಾದಷ್ಟು ಖಚಿತಪಡಿಸುತ್ತದೆ ರಷ್ಯಾ ಮಿಷನ್  ಉಪ ಮುಖ್ಯಸ್ಥ ರೋಮನ್ ಬಾಬುಷ್ಕಿನ್ ಹೇಳಿದರು. ಎಸ್ -೪೦೦ ವಾಯು ರಕ್ಷಣಾ ವ್ಯವಸ್ಥೆಗಳಿಗಾಗಿ ಮಾಡಿಕೊಳ್ಳಲಾದ ೫.೪ ಬಿಲಿಯನ್ ಡಾಲರ್ ಒಪ್ಪಂದವನ್ನು ವೇಳಾಪಟ್ಟಿಯ ಪ್ರಕಾರ ಜಾರಿಗೆ ತರಲಾಗುತ್ತಿದ್ದು, ಮುಂದಿನ ವರ್ಷದ ಅಂತ್ಯದ ವೇಳೆಗೆ ಮೊದಲ ತಂಡ ಭಾರತವನ್ನು ತಲುಪಲಿದೆ. "ಎಸ್ -೪೦೦ ವಿತರಣೆಯನ್ನು ತ್ವರಿತಗೊಳಿಸಲು ಭಾರತೀಯ ಕಡೆಯಿಂದ ವಿನಂತಿಯಿದ್ದು ಇದನ್ನು ಪೂರೈಸಲು ನಾವು ನಮ್ಮ ಕೈಲಾದಷ್ಟು ಪ್ರಯತ್ನಿಸುತ್ತೇವೆ" ಎಂದು ಬಾಬುಷ್ಕಿನ್ ಹೇಳಿದರು. ಅಮೆರಿಕದ ವಿರೋಧಿಗಳನ್ನು ದಮನಿಸುವ ನಿರ್ಬಂಧಗಳ ಕಾಯ್ದೆಯ (ಸಿಎಎಟಿಎಸ್‌ಎ) ಅಡಿಯಲ್ಲಿನ ಅಮೆರಿಕದ  ನಿರ್ಬಂಧಗಳ ಸಾಧ್ಯತೆಯ ಹೊರತಾಗಿಯೂ, ಭಾರತ-ಚೀನಾ ಗಡಿ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಕೆಲವು ಭಾಗಗಳಿಂದ ವಾಯು ರಕ್ಷಣಾ ವ್ಯವಸ್ಥೆಗಳನ್ನು ತ್ವರಿತವಾಗಿ ತಲುಪಿಸಲು ಭಾರತ ಕೋರಿದೆ. ಕಳೆದ ವರ್ಷ ಎಸ್ -೪೦೦ ಗಳಿಗಾಗಿ ಭಾರತ ಮೊದಲ ಬಾರಿಗೆ ೮೫೦ ಮಿಲಿಯನ್ ಡಾಲರ್ ಪಾವತಿ ಮಾಡಿದೆ. ೨೦೦ ಕಾಮೋವ್ ಕಾ -೨೨೬ ಹೆಲಿಕಾಪ್ಟರ್‌ಗಳನ್ನು ಪೂರೈಸುವ ಒಪ್ಪಂದವನ್ನು ಭಾರತ ಮತ್ತು ರಷ್ಯಾ ಅಂತಿಮಗೊಳಿಸಲು ಸಜ್ಜಾಗಿವೆ. ಅವುಗ ಪೈಕಿ ೧೪೦ನ್ನು ಭಾರತದಲ್ಲಿ "ಗರಿಷ್ಠ ಪ್ರಮಾಣದಲ್ಲಿ ಸ್ಥಳೀಯವಾಗಿ’ ಉತ್ಪಾದಿಸಲಾಗುವುದು ಎಂದು ಬಾಬುಷ್ಕಿನ್ ಹೇಳಿದರು. ೨ ಬಿಲಿಯನ್ ಡಾಲರ್ ಒಪ್ಪಂದವು "ಪರಿಗಣನೆಯ ಅಂತಿಮ ಹಂತದಲ್ಲಿದೆ" ಎಂದು ಅವರು ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ:  ಲೆಹ್ ಭಾಗವನ್ನು ಲಡಾಖ್ ಕೇಂದ್ರಾಡಳಿತ ಪ್ರದೇಶದ ಭಾಗವಾಗಿ ತೋರಿಸುವ ಬದಲು ಜಮ್ಮು ಮತ್ತು ಕಾಶ್ಮೀರದ ಭಾಗವಾಗಿ ತೋರಿಸಿದ್ದಕ್ಕಾಗಿ ಕೇಂದ್ರ ಸರ್ಕಾರವು 2020 ನವೆಂಬರ್ ೯ ರ ಸೋಮವಾರ ಟ್ವಿಟ್ಟರ್ ಗೆ ನೋಟಿಸ್ ಜಾರಿ ಮಾಡಿದೆ. ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಹೊರಡಿಸಿರುವ ನೋಟಿಸ್, ಮೈಕ್ರೋಬ್ಲಾಗಿಂಗ್ ಸೈಟ್‌ಗೆ ಐದು ದಿನಗಳಲ್ಲಿ ವಿವರಣೆ ನೀಡಲು ಸೂಚನೆ ನೀಡಿದೆ ಎಂದು ಸುದ್ದಿ ಸಂಸ್ಥೆಯ ವರದಿ ತಿಳಿಸಿದೆ. ಭಾರತದ ಪ್ರಾದೇಶಿಕ ಸಮಗ್ರತೆಗೆ ಅಗೌರವ ತೋರಿದ ಕಾರಣ ಅದರ ವಿರುದ್ಧ ಕಾನೂನು ಕ್ರಮಗಳನ್ನು ಏಕೆ ಕೈಗೊಳ್ಳಬಾರದು ಎಂಬುದಕ್ಕೆ ಉತ್ತರ ನೀಡುವಂತೆ ನೋಟಿಸ್ ಸೂಚನೆ ಕೊಟ್ಟಿದೆ. ಟ್ವಿಟರ್‌ನ ಜಾಗತಿಕ ಉಪಾಧ್ಯಕ್ಷರಿಗೆ ಭಾರತದ ರಾಷ್ಟ್ರೀಯ ಸೈಬರ್ ಸಮನ್ವಯ ಕೇಂದ್ರದ ನಿರ್ದೇಶಕರು ಈ ನೋಟಿಸ್ ಕಳುಹಿಸಿದ್ದಾರೆ ಎಂದು ವರದಿ ತಿಳಿಸಿದೆ. "ಸಾರ್ವಜನಿಕ ಸಂಭಾಷಣೆಯನ್ನು ಪೂರೈಸುವಲ್ಲಿ ಭಾರತ ಸರ್ಕಾರ ಮತ್ತು ಎಲೆಕ್ಟ್ರಾನಿಕ್ಸ್ ಮತ್ತು ಐಟಿ ಸಚಿವಾಲಯದೊಂದಿಗೆ ಸಹಭಾಗಿತ್ವಕ್ಕೆ ಟ್ವಿಟ್ಟರ್ ಬದ್ಧವಾಗಿದೆ. ನಾವು ಪತ್ರಕ್ಕೆ ಸರಿಯಾಗಿ ಪ್ರತಿಕ್ರಿಯಿಸಿದ್ದೇವೆ ಮತ್ತು ನಮ್ಮ ಪತ್ರವ್ಯವಹಾರದ ಭಾಗವಾಗಿ ಜಿಯೋ-ಟ್ಯಾಗ್ ಸಮಸ್ಯೆಗೆ ಸಂಬಂಧಿಸಿದ ಇತ್ತೀಚಿನ ಬೆಳವಣಿಗೆಗಳೊಂದಿಗೆ ಸಮಗ್ರ ನವೀಕರಣವನ್ನು ಹಂಚಿಕೊಂಡಿದ್ದೇವೆ’ ಎಂದು ಟ್ವಿಟರ್ ವಕ್ತಾರರು ಹೇಳಿದರು. ಟ್ವಿಟ್ಟರ್ ಈ ಹಿಂದೆ  ಲೆಹ್ ಭಾಗವನ್ನು ಚೀನಾದ ಭಾಗವಾಗಿ ತೋರಿಸಿತ್ತು. ಇದರ ವಿರುದ್ಧ ಸಚಿವಾಲಯದ ಕಾರ್ಯದರ್ಶಿಯವರು ಟ್ವಿಟ್ಟರ್ ಸಿಇಒ ಜ್ಯಾಕ್ ಡಾರ್ಸಿಗೆ ಆಕ್ಷೇಪಣೆ ಸಲ್ಲಿಸಿದ್ದರು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಟ್ವಿಟ್ಟರ್ ದೋಷವನ್ನು ಸರಿಪಡಿಸಿದೆ. ಆದರೆ ಲೆಹ್ ಅನ್ನು ಕೇಂದ್ರಾಡಳಿತ ಪ್ರದೇಶವಾದ ಲಡಾಖ್‌ನ ಭಾಗವಾಗಿ ತೋರಿಸಲು ಇದು ಇನ್ನೂ ನಕ್ಷೆಯನ್ನು ಸರಿಪಡಿಸಿಲ್ಲ. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

ಇಂದಿನ ಇತಿಹಾಸ  History Today ನವೆಂಬರ್ 12 (2019+ ಹಿಂದಿನವುಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)

-ಸಂಗ್ರಹ: ನೆತ್ರಕೆರೆ ಉದಯಶಂಕರ