ಇಂದಿನ ಇತಿಹಾಸ History Today ನವೆಂಬರ್ 03

 ಇಂದಿನ ಇತಿಹಾಸ  History Today ನವೆಂಬರ್ 03

2020: ನವದೆಹಲಿ: ಕೋವಿಡ್-೧೯ ಸಾಂಕ್ರಾಮಿಕದ ಹಿನ್ನೆಲೆಯಲ್ಲಿ ತನ್ನ ೧೯೪ ಸದಸ್ಯರ ಸಾಮಾನ್ಯ ಸಭೆಯನ್ನು ಇಂಟರ್ ಪೋಲ್ ಇದೇ ಮೊದಲ ಬಾರಿಗೆ ಮುಂದೂಡಿತು. ಕೊರೊನಾವೈರಸ್ ಕಾಯಿಲೆ (ಕೋವಿಡ್ -೧೯) ಸಾಂಕ್ರಾಮಿಕ ಸಂಬಂಧಿತ ಕಾರಣ ಪ್ರಪಂಚದಾದ್ಯಂತ ಸಂಭವಿಸಿದ ಸಾವುಗಳ ಹಿನ್ನೆಲೆಯಲ್ಲಿ ಯುನೈಟೆಡ್ ಅರಬ್ ಎಮಿರೇಟ್ಸ್‌ನಲ್ಲಿ (ಯುಎಇ)  ಡಿಸೆಂಬರ್ ತಿಂಗಳಲ್ಲಿ ನಡೆಯಬೇಕಾಗಿದ್ದ ತನ್ನ ೮೯ ನೇ ಸಾಮಾನ್ಯ ಸಭೆಯನ್ನು (ಜಿಎ) ಮುಂದೂಡಲು ಇಂಟರ್‌ಪೋಲ್ 2020 ನವೆಂಬರ್ 03ರ ಮಂಗಳವಾರ ನಿರ್ಧರಿಸಿತು.  ಎಲ್ಲಾ ೧೯೪ ಸದಸ್ಯ ರಾಷ್ಟ್ರಗಳ ವಾರ್ಷಿಕ ಸಭೆಯಲ್ಲಿ ಭಯೋತ್ಪಾದನೆ, ಸಂಘಟಿತ ಅಪರಾಧಗಳು ಪೊಲೀಸಿಂಗ್ ಮತ್ತು ಕ್ರಿಮಿನಲ್ ನೆಟ್‌ವರ್ಕ್‌ಗಳ ಸಹಕಾರ್‍ದ ಬಗ್ಗೆ ಚರ್ಚೆ ನಡೆಯಬೇಕಾಗಿತ್ತು. ಇಂಟರ್ಪೋಲ್‌ನ ಕಾರ್ಯಕಾರಿ ಸಮಿತಿಯು ಈ ವರ್ಷ ವಿಶ್ವದ ಎಲ್ಲಿಯಾದರೂ ೮೯ ನೇ ಸಾಮಾನ್ಯ ಸಭೆಯನ್ನು ನಡೆಸುವುದು ಭೌತಿಕವಾಗಿ ಅಸಾಧ್ಯವೆಂದು ತೀರ್ಮಾನಿಸಿತು. "ಕಾನೂನು, ತಾಂತ್ರಿಕ ಮತ್ತು ವ್ಯವಸ್ಥಾಪನಾ ಕಾರಣಗಳಿಂದಾಗಿ, ಪ್ರಸ್ತುತ ವರ್ಚುವಲ್ ಸಾಮಾನ್ಯ ಸಭೆಗೆ ಹೊರತಾಗಿ ಬೇರೆ ಯಾವುದೇ ಕಾರ್ಯಸಾಧ್ಯವಾದ ಆಯ್ಕೆಗಳಿಲ್ಲ’ ಎಂದು ಇಂಟರ್‌ಪೋಲ್ ಹೇಳಿಕೆಯಲ್ಲಿ ತಿಳಿಸಿದೆ.  (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ಪಾಟ್ನಾ: ರಾಜ್ಯದ ಜನರು ’ಭಾರತ್ ಮಾತಾ ಕಿ ಜೈ’ ಅಥವಾ ’ಜೈ ಶ್ರೀ ರಾಮ್’ ಎಂದು ಜಪಿಸುವುದನ್ನು ಬಿಹಾರದಲ್ಲಿ ’ಜಂಗಲ್ ರಾಜ್’ ತಂದವರು ಬಯಸುವುದಿಲ್ಲ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು 2020 ನವೆಂಬರ್ 03ರ ಮಂಗಳವಾರ ಸಹರ್ಸಾದಲ್ಲಿ ಚುನಾವಣಾ ಸಭೆಯನ್ನು ಉದ್ದೇಶಿಸಿ ಮಾತನಾಡುತ್ತಾ ಹೇಳಿದರು. ನವೆಂಬರ್ ೭ ರಂದು ನಡೆಯಲಿರುವ ವಿಧಾನಸಭಾ ಚುನಾವಣೆಯ ಮೂರನೇ ಮತ್ತು ಅಂತಿಮ ಹಂತಕ್ಕಾಗಿ,  ದಿನದ ಎರಡನೇ ಭಾಷಣದಲ್ಲಿ, ಪ್ರತಿಪಕ್ಷಗಳು ತಂದ ’ಜಂಗಲ್ ರಾಜ್’ ಅಥವಾ ’ಅರಾಜಕತೆ’ಯನ್ನು ತಿರಸ್ಕರಿಸುವಂತೆ ಪ್ರಧಾನಿ ಮತದಾರರನ್ನು ಒತ್ತಾಯಿಸಿದರು. ’ನೀವು ಭಾರತ್ ಮಾತಾ ಕಿ ಜೈ ಅಥವಾ ಜೈ ಶ್ರೀ ರಾಮ್ ಎಂದು ಹೇಳಲು ಇಷ್ಟಪಡದ ಜನರ ಗುಂಪು ಇದೆ. ಅವರೆಲ್ಲರೂ ಈಗ ಒಗ್ಗೂಡಿ ಬಿಹಾರದ ಜನರಿಂದ ಮತಗಳನ್ನು ಕೇಳುತ್ತಿದ್ದಾರೆ. ಬಿಹಾರ ಚುನಾವಣೆಯಲ್ಲಿ  ಅಂತಹ ಜನರಿಗೆ ಸೂಕ್ತವಾದ ಉತ್ತರವನ್ನು ನೀಡುವ ಅವಶ್ಯಕತೆಯಿದೆ’ ಎಂದು ಪ್ರಧಾನಿ ಮೋದಿ ಸಹರ್ಸಾದಲ್ಲಿ ಹೇಳಿದರು. ಪೂರ್ವ ರಾಜ್ಯದಲ್ಲಿ ಬಿಹಾರ ವಿಧಾನಸಭಾ ಚುನಾವಣೆಯ ಎರಡನೇ ಹಂತದಲ್ಲಿ ಮತದಾನ ನಡೆಯುತ್ತಿದ್ದು, ಬಿಹಾರ ಮತ್ತೆ ರಾಷ್ಟ್ರೀಯ ಪ್ರಜಾತಾಂತ್ರಿಕ ಮೈತ್ರಿಕೂಟಕ್ಕೆ (ಎನ್‌ಡಿಎ) ಮತ ಚಲಾಯಿಸಲಿದೆ ಎಂದು ಮೋದಿ ಪ್ರತಿಪಾದಿಸಿದರು. ರಾಜ್ಯದ ಅಭಿವೃದ್ಧಿ ಹಾಗೂ ಬಡವರಿಗಾಗಿ ಕೆಲಸ ಮಾಡಲು ಎನ್‌ಡಿಎ ಸರ್ಕಾರ ಬದ್ಧವಾಗಿದೆ ಎಂದು ಸಹರ್ಸಾದಲ್ಲಿ ಪ್ರಧಾನಿ ಹೇಳಿದರು. ಭಾರತ್ ಮಾತಾ ಕಿ ಜೈ ಎಂದು ಜಪಿಸುವಂತೆ ಜನರನ್ನು ಒತ್ತಾಯಿಸುವ ಮೂಲಕ ಭಾಷಣವನ್ನು ಪ್ರಾರಂಭಿಸಿದ ಪ್ರಧಾನಿ, "ಬಿಹಾರದ ಜನರು ಎನ್‌ಡಿಎ ಸರ್ಕಾರವನ್ನು ರಚಿಸಲು ನಿರ್ಧರಿಸಿದ್ದಾರೆ’ ಎಂದು ಹೇಳಿ, ಮೈಥಿಲಿಯಲ್ಲಿ ಕೆಲವು ಸಾಲುಗಳನ್ನು ಹೇಳಿದರು. ‘ಬಿಹಾರದ ಪ್ರತಿಯೊಬ್ಬ ನಾಗರಿಕನು ಬಿಹಾರದ ಸಾಮರ್ಥ್ಯಕ್ಕೆ ವಿರುದ್ಧವಾಗಿ ಜಂಗಲ್ ರಾಜ್ ಮಾಡಿದ ದ್ರೋಹವನ್ನು ಚೆನ್ನಾಗಿ ತಿಳಿದಿದ್ದಾನೆ. ಬಡವರ ಹೆಸರನ್ನು ಪದೇ ಪದೇ ಜಪಿಸುವವರು ಬಡವರನ್ನು ಚುನಾವಣೆಯಿಂದ ದೂರವಿಡುತ್ತಿದ್ದರು. ಬಿಹಾರದ ಬಡವರಿಗೆ ತಮ್ಮದೇ ಆದ ಸರ್ಕಾರ ರಚಿಸುವ ಹಕ್ಕು ಇರಲಿಲ್ಲ’ ಎಂದು ಅವರು ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ’ಲವ್ ಜಿಹಾದ್’ ತಡೆಗಾಗಿ ಕಾನೂನು ರೂಪಿಸುವುದಾಗಿ ಉತ್ತರ ಪ್ರದೇಶ ಮತ್ತು ಹರಿಯಾಣ ರಾಜ್ಯಗಳು ಪ್ರಕಟಿಸಿದ ಬೆನ್ನಲ್ಲೇ ಕರ್ನಾಟಕ ಮತ್ತು ಮಧ್ಯಪ್ರದೇಶ ಕೂಡಾ ಈ ನಿಟ್ಟಿನಲ್ಲಿ ಸಾಗಿವೆ. ಮದುವೆ ಸಲುವಾಗಿ ಧಾರ್ಮಿಕ ಮತಾಂತರವನ್ನು ನಿಷೇಧಿಸುವ ಕಾನೂನು ರಾಜ್ಯದಲ್ಲಿ ಜಾರಿಗೆ ಬರಲಿದೆ ಎಂದು ಕರ್ನಾಟಕ ಪ್ರವಾಸೋದ್ಯಮ ಸಚಿವ ಮತ್ತು ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿ ಟಿ ರವಿ 2020 ನವೆಂಬರ್ 03ರ ಮಂಗಳವಾರ ಹೇಳಿದರು. ಇದೇ ಮಾದರಿಯ ಪ್ರಕಟಣೆಯನ್ನು ಮಧ್ಯಪ್ರದೇಶದ ಮುಖ್ಯಮಂತ್ರಿ ಶಿವರಾಜ್ ಸಿಂಗ್ ಚೌಹಾಣ್ ಮಾಡಿದರು. ’ಜಿಹಾದಿಗಳು’ ರಾಜ್ಯದ ಮಹಿಳೆಯರ ಘನತೆಯನ್ನು ತೆಗೆದುಹಾಕಿದಾಗ ಸರ್ಕಾರ ಮೌನವಾಗಿರುವುದಿಲ್ಲ ಎಂದು ಕರ್ನಾಟಕ ಸಚಿವ ಸಿಟಿ ರವಿ ಹೇಳಿದರು. ವಿವಾಹದ ಉದ್ದೇಶಕ್ಕಾಗಿ ಧರ್ಮವನ್ನು ಪರಿವರ್ತಿಸುವುದು ಕಾನೂನುಬಾಹಿರ ಎಂದು ಅಲಹಾಬಾದ್ ಹೈಕೋರ್ಟ್ ಅಭಿಪ್ರಾಯಪಟ್ಟ ಕೆಲವೇ ದಿನಗಳ ನಂತರ ಈ ಹೇಳಿಕೆ ಬಂದಿತು. ಈ ಹಿಂದೆ ಬಿಜೆಪಿ ಆಡಳಿತದ ರಾಜ್ಯಗಳಾದ ಉತ್ತರ ಪ್ರದೇಶ, ಹರಿಯಾಣ ಮತ್ತು ಮಧ್ಯಪ್ರದೇಶಗಳು ’ಲವ್ ಜಿಹಾದ್’ ವಿರುದ್ಧ ಕಾನೂನು ತರುವ  ಉದ್ದೇಶವನ್ನು ಪ್ರಕಟಿಸಿದ್ದವು. "ಅಲಹಾಬಾದ್ ಹೈಕೋರ್ಟ್ ಆದೇಶದಂತೆ, ಕರ್ನಾಟಕವು ಮದುವೆಗಾಗಿ ಧಾರ್ಮಿಕ ಮತಾಂತರವನ್ನು ನಿಷೇಧಿಸುವ ಕಾನೂನನ್ನು ಜಾರಿಗೆ ತರಲಿದೆ. ಜಿಹಾದಿಗಳು ನಮ್ಮ ಸಹೋದರಿಯರ ಘನತೆಯನ್ನು ತೆಗೆದುಹಾಕಿದಾಗ ನಾವು ಮೌನವಾಗಿರುವುದಿಲ್ಲ’ ಎಂದು ರವಿ ಟ್ವೀಟ್ ಮಾಡಿದ್ದಾರೆ. ಯಾವುದೇ ಮತಾಂತರದ ಕೃತ್ಯದಲ್ಲಿ ಭಾಗಿಯಾದ ಯಾರಾದರೂ ಕಠಿಣ ಮತ್ತು ತ್ವರಿತ ಶಿಕ್ಷೆಯನ್ನು ಎದುರಿಸಬೇಕಾಗುತ್ತದೆ ಎಂದು ಅವರು ಹೇಳಿದರು. ಅಕ್ಟೋಬರ್ ೩೧ ರಂದು ಅಲಹಾಬಾದ್ ಹೈಕೋರ್ಟ್ ತನ್ನ ಆದೇಶದಲ್ಲಿ ಕೇವಲ ವಿವಾಹದ ಉದ್ದೇಶದಿಂದ ನಡೆಯುವ ಧಾರ್ಮಿಕ ಮತಾಂತರವು ಮಾನ್ಯವಲ್ಲ ಎಂದು ಹೇಳಿದೆ. ಉತ್ತರಪ್ರದೇಶದಲ್ಲಿ ಹೊಸದಾಗಿ ವಿವಾಹಿತರಾದ ದಂಪತಿ ರಕ್ಷಣೆ ಕೋರಿ ಸಲ್ಲಿಸಿದ ಮನವಿಯನ್ನು ನ್ಯಾಯಾಲಯವು ತಳ್ಳಿಹಾಕಿತ್ತು. ತಮ್ಮ ವೈವಾಹಿಕ ಜೀವನಕ್ಕೆ ತೊಂದರೆ ಮಾಡದಂತೆ ಪೊಲೀಸರು ಮತ್ತು ಮಹಿಳೆಯ ತಂದೆಗೆ ನಿರ್ದೇಶನ ನೀಡುವಂತೆ ವಿವಾಹಿತ ದಂಪತಿ ನ್ಯಾಯಾಲಯವನ್ನು ಕೋರಿದ್ದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ಸಾರ್ವಜನಿಕ ವಲಯದ ಯಾವುದೇ ಬ್ಯಾಂಕುಗಳಲ್ಲೂ ಸೇವಾ ಶುಲ್ಕ ಹೆಚ್ಚಳ ಆಗಿಲ್ಲ ಎಂಬುದಾಗಿ ಕೇಂದ್ರ ವಿತ್ತ ಸಚಿವಾಲಯವು 2020 ನವೆಂಬರ್ 03ರ ಮಂಗಳವಾರ ಸ್ಪಷ್ಟ ಪಡಿಸಿತು. ಇದೇ ವೇಳೆಗೆ ಬ್ಯಾಂಕ್ ಆಫ್ ಬರೋಡಾ ತನ್ನ ಸೇವಾ ಶುಲ್ಕ ಹೆಚ್ಚಳದ ಕ್ರಮವನ್ನು ಹಿಂಪಡೆಯಿತು. ಬ್ಯಾಂಕ್ ಆಫ್ ಬರೋಡಾ ಖಾತೆಯಲ್ಲಿ ತಿಂಗಳೊಂದಕ್ಕೆ ಉಚಿತ ನಗದು ಠೇವಣಿ ವಹಿವಾಟು ಸಂಖ್ಯೆಗೆ ಸಂಬಂಧಿಸಿದಂತೆ ಮಾಡಿದ ಬದಲಾವಣೆಗಳನ್ನು ಹಿಂಪಡೆಯಲು ನಿರ್ಧರಿಸಿತು. ತಿಂಗಳ ಅವಧಿಯಲ್ಲಿ ಉಚಿತ ನಗದು ಠೇವಣಿ ಮತ್ತು ಹಣ ವಾಪಸ್ ಪಡೆಯುವ ವಹಿವಾಟಿನ ಸಂಖ್ಯೆಗೆ ಸಂಬಂಧಿಸಿದಂತೆ ೨೦೨೦ ರ ನವೆಂಬರ್ ೧ ರಿಂದ ಬ್ಯಾಂಕ್ ಆಫ್ ಬರೋಡಾ ಕೆಲವು ಬದಲಾವಣೆಗಳನ್ನು ಮಾಡಿತ್ತು. ಅದರಂತೆ ಉಚಿತ ನಗದು ಠೇವಣಿ ಮತ್ತು ಹಣ ವಾಪಸ್ ಪಡೆಯುವ ವಹಿವಾಟಿನ ಸಂಖ್ಯೆಯನ್ನು ತಿಂಗಳಿಗೆ ಐದರಿಂದ ತಿಂಗಳಿಗೆ ಮೂರಕ್ಕೆ ಇಳಿಸಲಾಗಿದೆ. ಈ ಉಚಿತ ವಹಿವಾಟುಗಳಿಗಿಂತ ಹೆಚ್ಚಿನ ವಹಿವಾಟಿನ ಶುಲ್ಕಗಳಲ್ಲಿ ಯಾವುದೇ ಬದಲಾವಣೆಯಿಲ್ಲ ಎಂದು ವಿತ್ತ ಸಚಿವಾಲಯದ ಹೇಳಿಕೆ ತಿಳಿಸಿದೆ. "ಪ್ರಸ್ತುತ ಕೋವಿಡ್  ಸಂಬಂಧಿತ ಪರಿಸ್ಥಿತಿಯ ಹಿನ್ನೆಲೆಯಲ್ಲಿ, ಬದಲಾವಣೆಗಳನ್ನು ಹಿಂಪಡೆಯಲು ನಿರ್ಧರಿಸಲಾಗಿದೆ ಎಂದು ಬ್ಯಾಂಕ್ ಆಫ್ ಬರೋಡಾ ತಿಳಿಸಿದೆ. ಇದಲ್ಲದೆ, ಬೇರೆ ಯಾವುದೇ ಸಾರ್ವಜನಿಕ ವಲಯದ ಬ್ಯಾಂಕು ಕೂಡಾ ಇತ್ತೀಚೆಗೆ ಇಂತಹ ಶುಲ್ಕಗಳನ್ನು ಹೆಚ್ಚಿಸಿಲ್ಲ’ ಎಂದು ವಿತ್ತ ಸಚಿವಾಲಯದ ಹೇಳಿಕೆ ತಿಳಿಸಿದೆ. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ಬಿಹಾರ ವಿಧಾನಸಭೆಗಾಗಿ 2020 ನವೆಂಬರ್ 03ರ ಮಂಗಳವಾರ ನಡೆದ ಎರಡನೇ ಹಂತದ ಚುನಾವಣೆಯಲ್ಲಿ ಶೇಕಡಾ ೫೩.೫೧ರಷ್ಟು ಮತದಾನವಾಗಿದೆ ಎಂದು ಚುನಾವಣಾ ಆಯೋಗ ಪ್ರಕಟಿಸಿದೆ. ಮತದಾನ ಬಹುತೇಕ ಶಾಂತಿಯುತವಾಗಿ ನಡೆದಿದೆ ಎಂದು ವರದಿಗಳು ಹೇಳಿವೆ. ಸಂಜೆ ೫ ರವರೆಗೆ ಶೇಕಡಾ ೫೧ರಷ್ಟು ಮತದಾನವಾಗಿರುವ ವರದಿಗಳು ಬಂದಿವೆ ಎಂದು ಇದಕ್ಕೆ ಮುನ್ನ ಚುನಾವಣಾ ಆಯೋಗದ ಮೂಲಗಳು ಹೇಳಿದ್ದವು. ಚುನಾವಣಾ ಆಯೋಗದ ಅಂಕಿಅಂಶಗಳ ಪ್ರಕಾರ, ಬಿಹಾರದ ೯೪ ಕ್ಷೇತ್ರಗಳಲ್ಲಿ ಒಟ್ಟು ೨.೮೫ ಕೋಟಿ ಮತದಾರರ ಪೈಕಿ ೫೩.೫೧ರಷ್ಟು ಜನರು ಮಂಗಳವಾರ ಎರಡನೇ ಹಂತದ ಮತದಾನದಲ್ಲಿ ಸಂಜೆ ೫ ಗಂಟೆಯವರೆಗೆ ತಮ್ಮ ಮತದಾನವನ್ನು ಚಲಾಯಿಸಿದ್ದಾರೆ. ಅಂಕಿ ಸಂಖ್ಯೆಗಳ ಪ್ರಕಾರ, ಮಂಗಳವಾರ ಮಧ್ಯಾಹ್ನದವರೆಗೆ ೧೭ ಜಿಲ್ಲೆಗಳ ೯೪ ಬಿಹಾರ ವಿಧಾನಸಭಾ ವಿಭಾಗಗಳಲ್ಲಿ ಸರಾಸರಿ ೩೨.೮೨ ರಷ್ಟು ಮತದಾನ ದಾಖಲಾಗಿತ್ತು. ಮುಜಾಫರ್‌ಪುರದಲ್ಲಿ ಶೇಕಡಾ ೪೧.೨೫ರಷ್ಟು ಮತದಾನವಾದರೆ ಆಗಿದ್ದರೆ, ಪಶ್ಚಿಮ ಚಂಪಾರನ್‌ನಲ್ಲಿ ಶೇಕಡಾ ೩೯.೩೪, ಖಾಗರಿಯಾ ೩೮.೧೧, ಮತ್ತು ಸಮಸ್ತಿಪುರದಲ್ಲಿ ಶೇಕಡಾ ೩೬.೯೯ ಮತದಾನ ೧ ಗಂಟೆಯವರೆಗೆ ದಾಖಲಾಗಿತ್ತು. ವೈಶಾಲಿಯಲ್ಲಿ ಶೇಕಡಾ ೩೨.೯೭, ಸರನ್ ಶೇಕಡಾ ೨೯.೮೮, ಬೆಗುಸರಾಯ್‌ಯಲ್ಲಿ ಶೇಕಡಾ ೩೬.೧೫, ಭಾಗಲ್ಪುರ್‌ದಲ್ಲಿ ಶೇಕಡಾ ೩೪.೯೯, ನಳಂದದಲ್ಲಿ ಶೇಕಡಾ ೩೫.೩೧, ಪಾಟ್ನಾದಲ್ಲಿ ಶೇಕಡಾ ೨೮, ಪೂರ್ವ ಚಂಪಾರನ್ ೩೦.೭೯, ಶಿಯೋಹರ್ ೨೯.೭೫, ಸೀತಾಮಡಿಯಲ್ಲಿ ಶೇಕಡಾ ೩೩.೨೮, ಮಧುಬಾನಿ ೩೦.೭೯, ಗೋಪಾಲ್ಗಂಗ್ ೩೩.೫೦, ಸಿವಾನ್ ೨೯.೮೯ ಮತ ಚಲಾವಣೆಯಾಗಿತ್ತು ಎಂದು ವರದಿಗಳು ಹೇಳಿವೆ. ಏತನ್ಮಧ್ಯೆ, ಮಧುಬಾನಿಯ ಹರ್ಲಾಕಿಯಲ್ಲಿ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರ ಚುನಾವಣಾ ಸಭೆಯಲ್ಲಿ  ಈರುಳ್ಳಿ ಎಸೆದ ಘಟನೆ ಘಟಿಸಿತು. ಎನ್ ಡಿಎ ಅಭ್ಯರ್ಥಿಗಳನ್ನು ಬೆಂಬಲಿಸಿ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಮಹಾಘಟಬಂಧನ್ ಅಭ್ಯರ್ಥಿಗಳನ್ನು ಬೆಂಬಲಿಸಿ ಆರ್‌ಡಿಎ ನಾಯಕ ತೇಜಸ್ವಿ ಯಾದವ್ ಅವರ ಪ್ರಚಾರ ಭಾಷಣಗಳ ಬಳಿಕ ಬಿಹಾರ ವಿಧಾನಸಭಾ ಚುನಾವಣೆಯ ೨ ನೇ ಹಂತದ ಮತದಾನ ಬೆಳಗ್ಗೆ ಆರಂಭವಾಯಿತು. (ವಿವರಗಳಿಗೆಇಲ್ಲಿ ಕ್ಲಿಕ್  ಮಾಡಿರಿ)

2020: ನ್ಯೂಯಾರ್ಕ್: ಡೊನಾಲ್ಡ್ ಟ್ರಂಪ್ ಅವರ ಅಧ್ಯಕ್ಷತೆಯ ಕುರಿತಾದ ಜನಾಭಿಪ್ರಾಯ ಎಂಬುದಾಗಿಯೇ ಭಾವಿಸಲಾಗಿರುವ ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯ ಅಂತಿಮ ಹಂತದ ಮತದಾನ 2020 ನವೆಂಬರ್ 03ರ ಮಂಗಳವಾರ ವರ್ಜೀನಿಯಾದ ನ್ಯಾಯಾರ್ಕ್ ಮತ್ತು ನ್ಯೂಜೆರ್ಸಿಯಲ್ಲಿ ಪ್ರಾರಂಭವಾಯಿತು. ಅಧ್ಯಕ್ಷೀಯ ಚುನಾವಣೆಗೆ ಸ್ವಲ್ಪ ಮುಂಚೆ ಅನುಮೋದನೆ ರೇಟಿಂಗ್‌ನಲ್ಲಿ ಜೋ ಬಿಡನ್ ಡೊನಾಲ್ಡ್ ಟ್ರಂಪ್‌ಗಿಂತ ಮುಂದಿದ್ದಾರೆ, ಆದರೆ ಇಂಟರ್ನೆಟ್ ಹುಡುಕಾಟದಲ್ಲಿ, ಪ್ರಸ್ತುತ ಅಮೆರಿಕದ ರಿಪಬ್ಲಿಕನ್ ಅಧ್ಯಕ್ಷರು ತಮ್ಮ ಡೆಮೋಕ್ರಾಟ್ ಎದುರಾಳಿಯ ಮೇಲೆ ಸ್ಪಷ್ಟ ಮುನ್ನಡೆ ಸಾಧಿಸಿದ್ದಾರೆ ಎಂದು ವರದಿಗಳು ಹೇಳಿವೆ.  ಪ್ರಮುಖ ಮತದಾನ ಸಂಸ್ಥೆಗಳ ಅನೇಕ ಸಮೀಕ್ಷೆಗಳು ಅಧ್ಯಕ್ಷೀಯ ಚುನಾವಣೆಗೆ ಮುಂಚಿತವಾಗಿ ಬಿಡೆನ್‌ಗೆ ಟ್ರಂಪ್‌ಗಿಂತ ಎಂಟು ಅಂಕಗಳ ಮುನ್ನಡೆ ನೀಡಿವೆ. ಆದರೆ ಗೂಗಲ್‌ನ ಹುಡುಕಾಟ ಡೇಟಾದ ವಿಶ್ಲೇಷಣೆಯು ಡೊನಾಲ್ಡ್ ಟ್ರಂಪ್‌ನಲ್ಲಿ ಆಸಕ್ತಿ ಹೆಚ್ಚುತ್ತಿದೆ ಎಂದು ತೋರಿಸಿದೆ. ವಾಸ್ತವವಾಗಿ, ಅಮೆರಿಕದ ಅಧ್ಯಕ್ಷೀಯ ಚುನಾವಣೆಗೆ ಒಂದು ದಿನ ಮೊದಲು, ಅಂತರವು ಹೆಚ್ಚಾಗಲು ಪ್ರಾರಂಭಿಸಿತು ಮತ್ತು ಜೋ ಬಿಡನ್ ಅವರ ಮೇಲಿನ ಆಸಕ್ತಿಯು ಮುಳುಗಲಾರಂಭಿಸಿತು. ಸರಾಸರಿ, ಶೇಕಡಾ ೪೫ ರಷ್ಟು ಇಂಟರ್ನೆಟ್ ಬಳಕೆದಾರರು ಟ್ರಂಪ್‌ಗಾಗಿ ೨೩ ರಷ್ಟನ್ನು ಬಿಡೆನ್‌ಗಾಗಿ ಹುಡುಕಿದ್ದಾರೆ. ಡೊನಾಲ್ಡ್ ಟ್ರಂಪ್ ಅವರ ಎದುರಾಳಿ ಪಕ್ಷದ ಜೋ ಬಿಡನ್ ಅಮೆರಿಕನ್ನರನ್ನು "ನಮ್ಮ ಪ್ರಜಾಪ್ರಭುತ್ವವನ್ನು" ಪುನಃಸ್ಥಾಪಿಸಲು ಟ್ರಂಪ್ ಆಡಳಿತವನ್ನು ಕೊನೆಗೊಳಿಸಬೇಕೆಂದು ಪ್ರಚಾರದ ಅಂತ್ಯದಲ್ಲಿ ಅಮೆರಿಕನ್ನರನ್ನು ಒತ್ತಾಯಿಸಿದರು. ೧೯೭೦ ರ ವಿಯೆಟ್ನಾಂ ಯುದ್ಧದ ಯುಗದ ನಂತರದ ಯಾವುದೇ ಕಾಲಕ್ಕಿಂತಲೂ ಹೆಚ್ಚಾಗಿ ಈಗ ದೇಶವು ವಿಭಜನೆಗೊಂಡಿದ್ದು, ಉದ್ವಿಗ್ನಗೊಂಡಿದೆ. ಜೊತೆಗೆ ಚುನಾವಣೆಯ ಫಲಿತಾಂಶವನ್ನು ಟ್ರಂಪ್ ಅವರು ವಿವಾದಕ್ಕೀಡು ಮಾಡಬಹುದು ಎಂಬ ಆತಂಕಗಳು ಆ ಉದ್ವಿಗ್ನತೆಯನ್ನು ಹೆಚ್ಚಿಸಿದವು. ಟ್ರಂಪ್ ಎದುರಾಳಿ ೭೭ ರ ಹರೆಯದ ಬಿಡೆನ್, ಅಮೆರಿಕವು ತನ್ನ "ಆತ್ಮ" ವನ್ನು ಪುನಃಸ್ಥಾಪಿಸಬೇಕಾಗಿದೆ ಮತ್ತು ಕೊರೊನಾವೈರಸ್ ಸಾಂಕ್ರಾಮಿಕದ ಮಧ್ಯೆ ಹೊಸ ನಾಯಕತ್ವವನ್ನು ಪಡೆಯಬೇಕು ಎಂಬುದಾಗಿ ೨೩೧,೦೦೦ ಮತದಾರರನ್ನು ಆಗ್ರಹಿಸಿದರು. (ವಿವರಗಳಿಗೆಇಲ್ಲಿ ಕ್ಲಿಕ್  ಮಾಡಿರಿ)

ಇಂದಿನ ಇತಿಹಾಸ  History Today ನವೆಂಬರ್ 03 (2019+ ಹಿಂದಿನವುಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)

-ಸಂಗ್ರಹ: ನೆತ್ರಕೆರೆ ಉದಯಶಂಕರ