ಇಂದಿನ ಇತಿಹಾಸ History Today ಜುಲೈ 14

ಇಂದಿನ ಇತಿಹಾಸ  History Today ಜುಲೈ 14

2020: ನವದೆಹಲಿ: ಅಶೋಕ ಗೆಹ್ಲೋಟ್ ನೇತೃತ್ವದ ಸರ್ಕಾರದ ವಿರುದ್ಧ ಬಹಿರಂಗವಾಗಿ ಬಂಡಾಯ ಎದ್ದ ಎರಡು ದಿನಗಳ ಬಳಿಕ ರಾಜಸ್ಥಾನದ ಉಪಮುಖ್ಯಮಂತ್ರಿ ಮತ್ತು ಪಕ್ಷದ ರಾಜ್ಯ ಘಟಕದ ಮುಖ್ಯಸ್ಥ ಹುದ್ದೆಗಳಿಂದ ಸಚಿನ್ ಪೈಲಟ್ ಅವರನ್ನು ಕಾಂಗ್ರೆಸ್  2020 ಜುಲೈ 14ರ ಮಂಗಳವಾರ ವಜಾ ಮಾಡಿತು. ಬಂಡಾಯ ನಾಯಕನ ಮೇಲೆ ಚಾಟಿ ಬೀಸಿದ ಪಕ್ಷವು, ಸಚಿನ್ ನಿಷ್ಠಾವಂತರಾದ ವಿಶ್ವವೇಂದ್ರ ಸಿಂಗ್ ಮತ್ತು ರಮೇಶ್ ಮೀನಾ ಅವರನ್ನು ಕೂಡಾ ರಾಜ್ಯ ಸಚಿವ ಸಂಪುಟದಿಂದ ಕಿತ್ತುಹಾಕಿತು. ಪೈಲಟ್ ಮತ್ತು ಗೆಹ್ಲೋಟ್ ನಡುವಿನ ಅಧಿಕಾರದ ಜಗಳದ ನಡುವೆ ಜೈಪುರದಲ್ಲಿ ನಡೆದ ಕಾಂಗ್ರೆಸ್ ಶಾಸಕಾಂಗ ಪಕ್ಷದ ಸಭೆಯ ನಂತರ ಎಐಸಿಸಿ ವಕ್ತಾರ ರಣದೀಪ್ ಸುರ್ಜೆವಾಲಾ ಈ ನಿರ್ಧಾರವನ್ನು ಪ್ರಕಟಿಸಿದರು. "ರಾಜಸ್ಥಾನದಲ್ಲಿ ಕಾಂಗ್ರೆಸ್ ಸರ್ಕಾರವನ್ನು ಉರುಳಿಸಲು ಬಿಜೆಪಿ ಹೂಡಿದ ಸಂಚಿನಲ್ಲಿ ಪೈಲಟ್ ಸಿಕ್ಕಿಹಾಕಿಕೊಂಡಿದ್ದಾರೆ. ನಾವು ಅವರಿಗೆ ಅನೇಕ ಅವಕಾಶಗಳನ್ನು ನೀಡಿದ್ದೇವೆ. ಅವರು ಸಂಸದರು ಮತ್ತು ಸಂಪುಟ ಸಚಿವರು ಹಾಗೂ ಪಕ್ಷದ ರಾಜ್ಯ ಘಟಕದ ಅಧ್ಯಕ್ಷರಾಗಿದ್ದಾರೆ. ಸಚಿನ್ ಪೈಲಟ್ ಮತ್ತು ಅವರ ಕೆಲವು ಸಹೋದ್ಯೋಗಿಗಳು ಪತನಗೊಂಡಿದ್ದಾರೆ ಎಂದು ನನಗೆ ಬೇಸರವಿದೆ. ಬಿಜೆಪಿ ಹಾಕಿದ ಈ ಬಲೆ  ಸ್ವೀಕಾರಾರ್ಹವಲ್ಲ’ ಎಂದು ಸುರ್ಜೆವಾಲಾ ಹೇಳಿದರು. ನಿರ್ಧಾರ ತೆಗೆದುಕೊಂಡ ಕೂಡಲೇ, ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ಅವರು ರಾಜ್ಯಪಾಲ ಕಲರಾಜ್ ಮಿಶ್ರಾ ಅವರನ್ನು ಭೇಟಿಯಾದರು, ಈ ಸಂದರ್ಭದಲ್ಲಿ ಅವರು ಆಡಳಿತಾರೂಢ ಪಕ್ಷದ ಬಲದ ಬಗ್ಗೆ ರಾಜ್ಯಪಾಲರಿಗೆ ಭರವಸೆ ನೀಡಿದ್ದಾರೆಂದು ನಂಬಲಾಗಿದೆ ಮತ್ತು ಪೈಲಟ್ ಮತ್ತು ಅವರ ಇಬ್ಬರು ಸಹಾಯಕರು ಸೇರಿ ಮೂವರನ್ನು ಸಂಪುಟದಿಂದ ಕಿತ್ತು ಹಾಕುವ ಬಗ್ಗೆ ಶಿಫಾರಸು ಮಾಡಿದ್ದಾರೆ ಎಂದು ವರದಿ ತಿಳಿಸಿದೆ. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ಭಾರತದ ಸಂಘಟಿತ ವ್ಯಾಪಾರೀ ಸಂಸ್ಥೆ ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್‌ನ ಡಿಜಿಟಲ್ ವಿಭಾಗಕ್ಕೆ  ಆಲ್ಫಾಬೆಟ್ ಇಂಟರ್‌ನ್ಯಾಷನಲ್ ಕಾರ್ಪೋರೇಷನ್‌ನ (ಐಎನ್‌ಸಿ) ಗೂಗಲ್ ೪ ಶತಕೋಟಿ (೪ ಬಿಲಿಯನ್) ಡಾಲರ್ ಹೂಡಿಕೆ ಮಾಡುವ ನಿಟ್ಟಿನಲ್ಲಿ ಮಾತುಕತೆ ನಡೆಸುತ್ತಿದೆ ಎಂದು ಬ್ಲೂಮ್‌ಬರ್ಗ್ 2020 ಜುಲೈ 14ರ ಮಂಗಳವಾರ ವರದಿ ಮಾಡಿತು. ಮುಂದಿನ ಕೆಲವು ವಾರಗಳಲ್ಲಿ ಈ ಕುರಿತ ಪ್ರಕಟಣೆ ಬರಬಹುದು ಎಂದು ವರದಿ ತಿಳಿಸಿತು. ವರದಿ ಬಗ್ಗೆ ಪ್ರತಿಕ್ರಿಯಿಸಲು ಗೂಗಲ್ ನಿರಾಕರಿಸಿದೆ, ರಿಲಯನ್ಸ್ ಪ್ರತಿಕ್ರಿಯೆ ಕೋರಿಕೆಗೆ ತತ್ ಕ್ಷಣ ಪ್ರತಿಕ್ರಿಯಿಸಿಲ್ಲ. ಫೇಸ್‌ಬುಕ್ ಮತ್ತು ಕೆಕೆಆರ್ ಅಂಡ್ ಕೋ ಸೇರಿದಂತೆ ಹಲವಾರು ಹೂಡಿಕೆದಾರರು ಈಗಾಗಲೇ ಕೇವಲ ಶೇಕಡಾ ೨೫ರಷ್ಟು ಜಿಯೋ ವೇದಿಕೆUಳಿಗೆ ಒಟ್ಟು ೧೫.೬೪ ಬಿಲಿಯನ್ (೧೫೬೪ ಕೋಟಿ) ಡಾಲರುಗಳನ್ನು ಸುರಿದಿದ್ದಾರೆ. ಏಪ್ರಿಲ್ ಅಂತ್ಯದಲ್ಲಿ ಪ್ರಾರಂಭವಾದ ಧನಸಹಾಯ ಪ್ರಕ್ರಿಯೆ ಮತ್ತು ರಿಲಯನ್ಸ್‌ನ ಷೇರು ಮಾರಾಟವು ಮಾರುಕಟ್ಟೆ ಮೌಲ್ಯದ ನಿವ್ವಳ-ಸಾಲದಿಂದ ಮುಕ್ತಗೊಳಿಸಿ ಭಾರತದ ಅತಿದೊಡ್ಡ ಕಂಪನಿಯಾಗಲು ರಿಲಯನ್ಸ್‌ಗೆ ಸಹಾಯ ಮಾಡಿದೆ. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ವಿಶ್ವಸಂಸ್ಥೆ: ಭಾರತದಲ್ಲಿ ಅಪೌಷ್ಟಿಕತೆಯಿಂದ ಬಳಲುತ್ತಿರುವವರ ಸಂಖ್ಯೆ ೬೦ ದಶಲಕ್ಷದಷ್ಟು (ಮಿಲಿಯನ್) ಇಳಿಕೆಯಾಗಿದೆ.  ೨೦೦೪-೦೬ರಲ್ಲಿ ಶೇಕಡಾ ೨೧.೭ ರಷ್ಟಿದ್ದ ಅಪೌಷ್ಟಿಕ ಜನರ ಪ್ರಮಾಣ ೨೦೧೭-೧೯ರಲ್ಲಿ ಶೇಕಡಾ ೧೪ ಕ್ಕೆ ಇಳಿದಿದೆ ಎಂದು ವಿಶ್ವಸಂಸ್ಥೆ ವರದಿಯೊಂದು 2020 ಜುಲೈ 14ರ ಮಂಗಳವಾರ ತಿಳಿಸಿತು. 2020 ಜುಲೈ 13ರ ಸೋಮವಾರ ಬಿಡುಗಡೆಯಾದ ರಾಜ್ಯ ಆಹಾರ ಭದ್ರತೆ ಮತ್ತು ಪೋಷಣೆಯ ವರದಿಯು, ಭಾರತದಲ್ಲಿ ಕಡಿಮೆ ಕುಂಠಿತ ಮಕ್ಕಳು ಆದರೆ ಹೆಚ್ಚು ಬೊಜ್ಜು ವಯಸ್ಕರು ಇದ್ದಾರೆ ಎಂದು ಹೇಳಿತು. ಹಸಿವು ಮತ್ತು ಅಪೌಷ್ಟಿಕತೆಯನ್ನು ಕೊನೆಗೊಳಿಸುವ ಅತ್ಯಂತ ಅಧಿಕೃತ ಜಾಗತಿಕ ಅಧ್ಯಯನ  ಎಂಬುದಾಗಿ ಪರಿಗಣಿಸಲಾಗಿರುವ ಈ ವರದಿಯು ಭಾರತದಲ್ಲಿ ಅಪೌಷ್ಟಿಕತೆಯಿಂದ ಬಳಲುತ್ತಿರುವವರ ಸಂಖ್ಯೆ ೨೦೦೪ ರಲ್ಲಿ ೨೪.೯೪ ಕೋಟಿಯಷ್ಟು (೨೪೯.೪ ಮಿಲಿಯನ್) ಇದ್ದುದು ೨೦೧೭ರ ವೇಳೆಗೆ ೧೯.೯೨ ಕೋಟಿಗೆ (೧೯೯.೨ ಮಿಲಿಯನ್) ಇಳಿದಿದೆ ಎಂದು ಹೇಳಿತು. ಶೇಕಡಾವಾರು ಪ್ರಕಾರ, ಭಾರತದ ಒಟ್ಟು ಜನಸಂಖ್ಯೆಯಲ್ಲಿ ಅಪೌಷ್ಟಿಕತೆಯ ಹರಡುವಿಕೆಯು ೨೦೦೪-೦೬ರಲ್ಲಿ ಇದ್ದ ೨೧.೭ ಶೇಕಡಾದಿಂದ ೨೦೧೭-೧೯ರಲ್ಲಿ ೧೪ ಕ್ಕೆ ಇಳಿದಿದೆ ಎಂದು ಅದು ಹೇಳಿತು. ಅಪೌಷ್ಟಿಕತೆಯ ಕಡಿತವನ್ನು ತೋರಿಸುವ ಪೂರ್ವ ಮತ್ತು ದಕ್ಷಿಣ ಏಷ್ಯಾ ಖಂಡದ ಎರಡು ಉಪಪ್ರದೇಶಗಳಲ್ಲಿ  ಎರಡು ದೊಡ್ಡ ಆರ್ಥಿಕತೆಗಳಾದ ಚೀನಾ ಮತ್ತು ಭಾರತ ಪ್ರಾಬಲ್ಯ ಹೊಂದಿವೆ. ವಿಭಿನ್ನ ಪರಿಸ್ಥಿತಿಗಳು, ಇತಿಹಾಸಗಳು ಮತ್ತು ಪ್ರಗತಿಯ ಪ್ರಮಾಣಗಳ ಹೊರತಾಗಿಯೂ, ದೀರ್ಘಕಾಲೀನ ಆರ್ಥಿಕ ಬೆಳವಣಿಗೆ, ಕುಸಿದ ಅಸಮಾನತೆ ಮತ್ತು ಮೂಲ ಸರಕು ಮತ್ತು ಸೇವೆಗಳಿಗೆ ಸುಧಾರಣೆಯ ಪ್ರವೇಶದಿಂದ ಉಭಯ ದೇಶಗಳಲ್ಲಿನ ಹಸಿವು ಕಡಿಮೆಯಾಗಿದೆ ಎಂದು ವರದಿ ಹೇಳಿದೆ. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ಟೆಹರಾನ್/ ನವದೆಹಲಿ: ಛಬಹಾರ್ ಬಂದರಿನಿಂದ ಅಫ್ಘಾನಿಸ್ಥಾನದ ಗಡಿಯಲ್ಲಿನ ಜಹೇದಾನ್‌ಗೆ ರೈಲುಮಾರ್ಗ ನಿರ್ಮಿಸುವ ಯೋಜನೆಯನ್ನು ಭಾರತದ ನೆರವನ್ನು ಕೈಬಿಟ್ಟು ಸ್ವತಃ ಮುಂದುವರೆಸಲು ಇರಾನ್ ಮುಂದಾಗಿದೆ. ಯೋಜನೆಗೆ ನೆರವು ಪಡೆಯುವುದಕ್ಕೆ ಸಂಬಂಧಿಸಿದಂತೆ ಭಾರತದ ಜೊತೆಗೆ ಒಪ್ಪಂದಕ್ಕೆ ಸಹಿ ಹಾಕಿದ್ದ ಇರಾನ್ ನಾಲ್ಕು ವರ್ಷಗಳ ಬಳಿಕ ಹಣ ಬಿಡುಗಡೆಯಲ್ಲಿ ವಿಳಂಬವಾಗುತ್ತಿದೆ ಎಂಬ ನೆಪ ಒಡ್ಡಿ, ಭಾರತವನ್ನು ಕೈಬಿಟ್ಟು ೨೦೨೨ರ ವೇಳೆಗೆ ಯೋಜನೆಯನ್ನು ಸ್ವತಃ ಪೂರ್ಣಗೊಳಿಸಲು ಹೊರಟಿದೆ. ಮಾರ್ಚ್ ೨೦೨೨ ರ ವೇಳೆಗೆ ಸಂಪೂರ್ಣ ಯೋಜನೆ ಪೂರ್ಣಗೊಳ್ಳಲಿದೆ, ಮತ್ತು ಇರಾನಿನ ರೈಲ್ವೆ ಭಾರತದ ಸಹಾಯವಿಲ್ಲದೆ ಮುಂದುವರಿಯುತ್ತದೆ ಮತ್ತು ಇರಾನಿನ ರಾಷ್ಟ್ರೀಯ ಅಭಿವೃದ್ಧಿ ನಿಧಿಯಿಂದ ಸುಮಾರು ೪೦೦ ಮಿಲಿಯನ್ (೪೦ ಕೋಟಿ) ಡಾಲರ್ ಹಣವನ್ನು ಬಳಸಿಕೊಳ್ಳಲಿದೆ ಎಂದು ಪತ್ರಿಕಾ ವರದಿಯೊಂದು 2020 ಜುಲೈ 14ರ ಮಂಗಳವಾರ ತಿಳಿಸಿದೆ. ಚೀನಾದ ಜೊತೆಗೆ ೪೦ ಕೋಟಿ (೪೦೦ ಬಿಲಿಯನ್) ಡಾಲರ್ ಮೌಲ್ಯದ ೨೫ ವರ್ಷಗಳ ಆರ್ಥಿಕ ಮತ್ತು ಭದ್ರತಾ ಸಹಭಾಗಿತ್ವವನ್ನು ಅಂತಿಮಗೊಳಿಸಿದ ಹಿನ್ನೆಲೆಯಲ್ಲಿ ಭಾರತದ ಜೊತೆಗಿನ ಪಾಲುದಾರಿಕೆಯನ್ನು ಕೈಬಿಡುವ ಕ್ರಮವನ್ನು ಇರಾನ್ ಕೈಗೊಂಡಿದೆ. ಚೀನಾ ಜೊತೆಗಿನ ಸಹಭಾಗಿತ್ವವು ಬ್ಯಾಂಕಿಂಗ್, ದೂರಸಂಪರ್ಕ, ಬಂದರುಗಳು, ರೈಲ್ವೆ ಮತ್ತು ಇತರ ಡಜನ್ ಗಟ್ಟಲೆ ಯೋಜನೆಗಳಲ್ಲಿ ಚೀನಾದ ಉಪಸ್ಥಿತಿಯನ್ನು ವಿಸ್ತರಿಸುತ್ತದೆ. ಇದಕ್ಕೆ ಪ್ರತಿಯಾಗಿ, ಮುಂದಿನ ೨೫ ವರ್ಷಗಳಲ್ಲಿ ಚೀನಾವು ನಿಯಮಿತವಾಗಿ, ತೈಲ ಖರೀದಿಯಲ್ಲಿ ಅಪಾರವಾದ ರಿಯಾಯ್ತಿಯನ್ನು ಇರಾನಿನಿಂದ ಪಡೆಯಲಿದೆ ಎಂದು ಇರಾನಿನ ಅಧಿಕಾರಿ ಮತ್ತು ತೈಲ ವ್ಯಾಪಾರಿಯೊಬ್ಬರು ತಿಳಿಸಿದ್ದಾರೆ. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ಕೋವಿಡ್-೧೯ ಸಾಂಕ್ರಾಮಿಕ ಸೋಂಕಿಗೆ ಲಸಿಕೆ ನೀಡಲು ಮಾನವ ಸ್ವಯಂಸೇವಕರನ್ನು ಒಳಗೊಂಡ ಕ್ಲಿನಿಕಲ್ ಅಧ್ಯಯನವು ಪ್ರಸ್ತುತ ಭಾರತದಲ್ಲಿ ನಡೆಯುತ್ತಿದೆ ಎಂದು ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿಯ (ಐಸಿಎಂಆರ್) ಮಹಾನಿರ್ದೇಶಕ ಬಲರಾಮ್ ಭಾರ್ಗವ 2020 ಜುಲೈ 14ರ ಮಂಗಳವಾರ ತಿಳಿಸಿದರು. ಪ್ರಾಣಿಗಳಲ್ಲಿ ಯಶಸ್ವಿ ವಿಷತ್ವ ಅಧ್ಯಯನಗಳ ನಂತರ, ಕಣದಲ್ಲಿದ್ದ ಎರಡು ಲಸಿಕೆಗಳನ್ನು ಮಾನವರ ಮೇಲೆ ಕ್ಲಿನಿಕಲ್ ಅಧ್ಯಯನಕ್ಕೆ ಆಯ್ಕೆ ಮಾಡಲಾಗಿದೆ. ಭಾರತದಲ್ಲಿ ಮಂಗಳವಾರ ಕೋವಿಡ್ ಸೋಂಕಿತರ ಸಂಖ್ಯೆ ಸುಮಾರು ೯ ಲಕ್ಷ ದಾಟಿದೆ. ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಅಂಕಿಸಂಖ್ಯೆಗಳ ಪ್ರಕಾರ ದೇಶದ ಒಟ್ಟು ಕೊರೋನಾ ಪ್ರಕರಣಗಳ ಸಂಖ್ಯೆ ೯,೧೧,೬೨೯ ಆಗಿದ್ದು, ಸಾವನ್ನಪ್ಪಿದವರ ಸಂಖ್ಯೆ ೨೩,೭೮೮ಕ್ಕೆ ಏರಿದೆ. ಇದೇ ವೇಳೆಗೆ ಸಂಪೂರ್ಣ ಗುಣಮುಖರಾಗಿ ಚೇತರಿಸಿದವರ ಸಂಖ್ಯೆ ೫,೭೩,೯೫೩ಕ್ಕೆ ಏರಿದೆ. ‘ಭಾರತದಲ್ಲಿ ದೇಶೀಯವಾಗಿ ನಿರ್ಮಿಸಲಾಗಿರುವ ಎರಡು ಲಸಿಕೆಗಳು ಇವೆ. ಇಲಿಗಳು, ಹೆಗ್ಗಣಗಳು ಮತ್ತು  ಮೊಲಗಳಲ್ಲಿ ಯಶಸ್ವಿ ವಿಷತ್ವ ಅಧ್ಯಯನ ನಡೆಸಲಾಗಿದೆ. ಭಾರತದ ಔಷಧ ನಿಯಂತ್ರಕ ಮಹಾ ನಿರ್ದೇಶಕರಿಗೆ (ಭಾರತದ ಡ್ರಗ್ಸ್ ಕಂಟ್ರೋಲರ್ ಜನರಲ್) ಈ ಬಗ್ಗೆ ಮಾಹಿತಿಯನ್ನು ಸಲ್ಲಿಸಲಾಗಿದೆ, ಈ ತಿಂಗಳ ಆರಂಭದಲ್ಲಿ ಈ ಎರಡು ಲಸಿಕೆಗಳ ಆರಂಭಿಕ ಹಂತದ ಮಾನವ ಪ್ರಯೋಗಗಳನ್ನು ಪ್ರಾರಂಭಿಸಲು ಅನುಮತಿ ನೀಡಲಾಗಿದೆ’ ಎಂದು ಭಾರ್ಗವ ಅವರು ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

ಇಂದಿನ ಇತಿಹಾಸ  History Today ಜುಲೈ 14 (2019+ ಹಿಂದಿನವುಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)

-ಸಂಗ್ರಹ: ನೆತ್ರಕೆರೆ ಉದಯಶಂಕರ