ಇಂದಿನ ಇತಿಹಾಸ History Today ಡಿಸೆಂಬರ್ 19

 ಇಂದಿನ ಇತಿಹಾಸ  History Today ಡಿಸೆಂಬರ್ 19

2020: ಕೋಲ್ಕತ: ಮುಂದಿನ ವರ್ಷ ಪಶ್ಚಿಮ ಬಂಗಾಳದಲ್ಲಿ ಚುನಾವಣೆ ನಡೆಯುವ ವೇಳೆಗೆ ದೀದಿಯವರು ಏಕಾಂಗಿಯಾಗಿಯೇ ಬಿಜೆಪಿಯನ್ನು ಎದುರಿಸಬೇಕಾಗುತ್ತದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಮಿಡ್ನಾಪುರದಲ್ಲಿ ನಡೆದ ಸಭೆಯಲ್ಲಿ 2020 ಡಿಸೆಂಬರ್ 19ರ ಶನಿವಾರ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಶನಿವಾರ ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರಿಗೆ ಸವಾಲು ಹಾಕಿ ಎಚ್ಚರಿಕೆ ನೀಡಿದರು. ‘ಬಿಜೆಪಿಯು ಇತರ ರಾಜಕಾರಣಿಗಳನ್ನು ಪಕ್ಷ ಬದಲಾಯಿಸಲು ಮತ್ತು ಬಿಜೆಪಿಗೆ ಸೇರಲು ಒತ್ತಾಯಿಸುತ್ತದೆ ಎಂದು ಮಮತಾ ಬ್ಯಾನರ್ಜಿ ಹೇಳುತ್ತಲೇ ಇರುತ್ತಾರೆ. ತೃಣಮೂಲ ಕಾಂಗ್ರೆಸ್ ರಚಿಸುವ ಮುನ್ನ ತಾವು ಸ್ವತಃ ಕಾಂಗ್ರೆಸ್ ಪಕ್ಷದ ಸದಸ್ಯರಾಗಿದ್ದರು ಎಂಬುದು ಅವರಿಗೆ ನೆನಪಿದೆಯೇ ಎಂದು ನಾನು ಮುಖ್ಯಮಂತ್ರಿಯನ್ನು ಕೇಳಲು ಬಯಸುತ್ತೇನೆ’ ಎಂದು ಶಾ ಹೇಳಿದರು. ’ಇಂದು ಕಾಂಗ್ರೆಸ್, ಸಿಪಿಐ (ಎಂ) ಮತ್ತು ತೃಣಮೂಲ ಕಾಂಗ್ರೆಸ್ಸಿನ ಹಲವಾರು ನಾಯಕರು ಬಿಜೆಪಿಗೆ ಸೇರಿದ್ದಾರೆ ಏಕೆಂದರೆ ಅವರು ಬಿಜೆಪಿಯ ಅಭಿವೃದ್ಧಿ ಕಾರ್ಯಗಳು ಮತ್ತು ಪ್ರಧಾನಿ ನರೇಂದ್ರ ಮೋದಿಯವರ ನಾಯಕತ್ವವನ್ನು ನಂಬಿದ್ದಾರೆ’ ಎಂದು ಶಾ ನುಡಿದರು. "ಇದು ಕೇವಲ ಪ್ರಾರಂಭ, ರಾಜ್ಯವು ಚುನಾವಣೆಗೆ ಹೋಗುವ ಹೊತ್ತಿಗೆ, ನೀವು ಏಕಾಂಗಿಯಾಗಿ ಭಾರತೀಯ ಜನತಾ ಪಕ್ಷವನ್ನು ಮಾತ್ರ ಎದುರಿಸುತ್ತೀರಿ’ ಎಂದು ಅವರು ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ಕೋಲ್ಕತ: ಅಖಿಲ ಭಾರತ ತೃಣಮೂಲ ಕಾಂಗ್ರೆಸ್ (ಎಐಟಿಎಂಸಿ) ಬಂಡಾಯ ನಾಯಕ ಸುವೇಂದು ಅಧಿಕಾರಿ ಅವರು 2020 ಡಿಸೆಂಬರ್ 19ರ ಶನಿವಾರ ಕೇಂದ್ರ ಸಚಿವ ಅಮಿತ್ ಶಾ ಅವರ ಸಮ್ಮುಖದಲ್ಲಿ ಭಾರತೀಯ ಜನತಾ ಪಕ್ಷಕ್ಕೆ (ಬಿಜೆಪಿ) ಸೇರ್ಪಡೆಯಾದರು. ಅಮಿತ್ ಶಾ ಅವರ ನಡೆಸಿದ ಮಿಡ್ನಾಪುರ ರಾಲಿಯ ಸಂದರ್ಭದಲ್ಲಿ ಅಧಿಕಾರಿ ಮತ್ತು ಇತರ ಹಲವರು ಬಿಜೆಪಿಯನ್ನು ಸೇರಿದರು.  ’ಪಕ್ಷವು ಭ್ರಷ್ಟಗೊಂಡಿದೆ ಮತ್ತು ಮತ್ತು ಕೊಳೆತು ನಾರುತ್ತಿದೆ’ ಎಂದು ಆರೋಪಿಸಿ ಅಧಿಕಾರಿಯವರು ತೃಣಮೂಲ  ಕಾಂಗ್ರೆಸ್ ತೊರೆದರು. ಕೇಂದ್ರ ಸಚಿವ ಅಮಿತ್ ಶಾ ಅವರೊಂದಿಗೆ ಬಿಜೆಪಿ ಬಂಗಾಳ ಮುಖ್ಯಸ್ಥ ದಿಲೀಪ್ ಘೋಷ್, ನಾಯಕ ಮುಕುಲ್ ರಾಯ್ ಮತ್ತು ಹಿರಿಯ ನಾಯಕ ಕೈಲಾಶ್ ವಿಜಯವರ್ಗಿಯ ಉಪಸ್ಥಿತರಿದ್ದರು. ಬಿಜೆಪಿ ಸೇರ್ಪಡೆ ಸಮಾರಂಭದಲ್ಲಿ ಪಕ್ಷವನ್ನು ಸೇರಿದ ಬಳಿಕ ಮಾತನಾಡಿದ ಅಧಿಕಾರಿ, ’ದೆಹಲಿಯನ್ನು ಯಾವ ಸರ್ಕಾರ ಆಳುತ್ತಿದೆಯೋ ಅದೇ ಸರ್ಕಾರವು ಬಂಗಾಳವನ್ನು ಆಳದಿದ್ದರೆ, ಅದರಿಂದ ರಾಜ್ಯದ ಆರ್ಥಿಕ ಭವಿಷ್ಯಕ್ಕೆ ಧಕ್ಕೆ ಉಂಟಾಗುತ್ತದೆ’ ಎಂದು ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ಕಳೆದ ವರ್ಷ ಜನವರಿಯಲ್ಲಿ ದಾಖಲಾಗಿದ್ದ ಕ್ರಿಮಿನಲ್ ಮಾನಹಾನಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಅಜಿತ್ ದೋವಲ್ ಅವರ ಪುತ್ರ ವಿವೇಕ್ ದೋವಲ್ ಅವರ ಬಳಿ ದೆಹಲಿ ನ್ಯಾಯಾಲಯದ ಮುಂದೆ ಕಾಂಗ್ರೆಸ್ ನಾಯಕ ಜೈರಾಮ್ ರಮೇಶ್ ಅವರು 2020 ಡಿಸೆಂಬರ್ 19ರ ಶನಿವಾರ ಕ್ಷಮೆ ಯಾಚಿಸಿದರು.  ವಿವೇಕ್ ದೋವಲ್ ಅವರು ರಮೇಶ್ ಮತ್ತು ತಮ್ಮ ವಿರುದ್ಧ ಲೇಖನ ಪ್ರಕಟಿಸಿದ್ದ ಕ್ಯಾರವಾನ್ ನಿಯತಕಾಲಿಕದ ವಿರುದ್ಧ ಮಾನನಷ್ಟ ಮೊಕದ್ದಮೆ ಹೂಡಿದ್ದರು.  ಜೈರಾಮ್ ರಮೇಶ್ ಅವರ ಕ್ಷಮಾಯಾಚನೆಯನ್ನು ವಿವೇಕ ದೋವಲ್ ಸ್ವೀಕರಿಸಿದ್ದಾರೆ. ’ದಿ ಡಿ ಕಂಪೆನೀಸ್’ ಶೀರ್ಷಿಕೆಯ ಲೇಖನ ನಿಯತಕಾಲಿಕದಲ್ಲಿ ಪ್ರಕಟವಾದ ನಂತರ ವಿವೇಕ್ ದೋವಲ್ ಅವರು ಜೈರಾಮ್ ರಮೇಶ್ ಮತ್ತು ದಿ ಕ್ಯಾರವಾನ್ ನಿಯತಕಾಲಿಕ ಮತ್ತು ಪತ್ರಕರ್ತ ಕೌಶಲ್ ಶ್ರಾಫ್ ವಿರುದ್ಧ ಮಾನನಷ್ಟ ಮೊಕದ್ದಮೆ ಹೂಡಿದ್ದರು. ೨೦೧೯ ರ ಜನವರಿಯಲ್ಲಿ ದೋವಲ್ ಅವರ ಕ್ರಿಮಿನಲ್ ಮಾನಹಾನಿ ದೂರನ್ನು ನ್ಯಾಯಾಲಯವು ಪರಿಗಣಿಸಿತ್ತು  ಮತ್ತು ರಮೇಶ್ ಅವರಿಗೆ ೨೦೧೯ರ ಮೇ ತಿಂಗಳಲ್ಲಿ ಜಾಮೀನು ನೀಡಲಾಗಿತ್ತು. ದಿ ಕ್ಯಾರವಾನ್ ನಿಯತಕಾಲಿಕ ಮತ್ತು ಶ್ರಾಫ್ ವಿರುದ್ಧ ಮಾನನಷ್ಟ ಮೊಕದ್ದಮೆ ಮುಂದುವರೆಯಲಿದೆ. ತಮ್ಮ ಹೇಳಿಕೆಗಳು ಸುದ್ದಿ ಲೇಖನವೊಂದನ್ನು ಆಧರಿಸಿವೆ ಎಂದು ಕ್ಷಮೆಯಾಚಿಸುವಾಗ ರಮೇಶ್ ಹೇಳಿದರು. "ಬಹುಶಃ ಕೆಲವು ಸ್ವತಂತ್ರ ಪರಿಶೀಲನೆಯ ಅಗತ್ಯವಿದ್ದಿರಬಹುದು’ ಎಂದು ರಮೇಶ್ ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ಪಕ್ಷದ ಮುಂದಿನ ದಾರಿ ಬಗ್ಗೆ ಚರ್ಚಿಸಲು ’ಚಿಂತನ ಶಿಬಿರ’ ನಡೆಸುವ ತೀರ್ಮಾನವನ್ನು 2020 ಡಿಸೆಂಬರ್ 19ರ ಶನಿವಾರ ಇಲ್ಲಿ ನಡೆದ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಮತ್ತು ಭಿನ್ನಮತೀಯರ ನಡುವಣ ನಿರ್ಣಾಯಕ ಸಭೆ ಕೈಗೊಂಡಿದೆ. ನಾಲ್ಕು ಗಂಟೆಗಳ ಕಾಲ ನಡೆದ ಮ್ಯಾರಥಾನ್ ಸಭೆಯ ನಂತರ ಮಾಧ್ಯಮಗಳನ್ನುದ್ದೇಶಿಸಿ ಮಾತನಾಡಿದ ಕಾಂಗ್ರೆಸ್ ಪಕ್ಷದ ಹಿರಿಯ ಮುಖಂಡ ಪವನ್ ಕುಮಾರ್ ಬನ್ಸಲ್ ಅವರು ’ಚರ್ಚೆಗಳು ಮುಖ್ಯವಾಗಿ ಪಕ್ಷವನ್ನು ಬಲಪಡಿಸುವುದರ ಮೇಲೆ ಕೇಂದ್ರೀಕೃತವಾಗಿದ್ದವು’ ಎಂದು ಹೇಳಿದರು. ಅಧ್ಯಕ್ಷರ ಹುದ್ದೆ ಮತ್ತು ಕಾಂಗ್ರೆಸ್ ಕಾರ್ಯಕಾರಿ ಸಮಿತಿ (ಸಿಡಬ್ಲ್ಯುಸಿ) ಸೇರಿದಂತೆ ಪಕ್ಷದ ಸಾಂಸ್ಥಿಕ ಚುನಾವಣೆಗಳನ್ನು ನಡೆಸುವ ಪ್ರಕ್ರಿಯೆಯನ್ನು ಈಗಾಗಲೇ ಸಿದ್ಧಪಡಿಸಲಾಗಿದೆ ಮತ್ತು ಕೇಂದ್ರೀಯ ಚುನಾವಣಾ ಪ್ರಾಧಿಕಾರ (ಸಿಇಎ) ಈ ನಿಟ್ಟಿನಲ್ಲಿ ಕಾರ್‍ಯಮಗ್ನವಾಗಿದೆ ಎಂದು ಅವರು ಹೇಳಿದರು. "ಈಗಾಗಲೇ ಚುನಾವಣಾ ಪ್ರಕ್ರಿಯೆ ನಡೆಯುತ್ತಿದೆ. ಪಕ್ಷದ ಮುಂದೆ ಒಂದು ಕಾರ್ಯಸೂಚಿ ಇದೆ. ಸಿಇಎ ಅದರ ಬಗ್ಗೆ ಕಾರ್ಯನಿರ್ವಹಿಸುತ್ತಿದೆ’ ಎಂದು ಬನ್ಸಲ್ ನುಡಿದರು. ’ನೀವೆಲ್ಲರೂ ಬಹಳ ದೊಡ್ಡ ಕುಟುಂಬವಾಗಿದ್ದೀರಿ ಮತ್ತು ಎಲ್ಲರೂ ಪಕ್ಷವನ್ನು ಬಲಪಡಿಸಲು ಶ್ರಮಿಸಬೇಕು ಎಂದು ಸೋನಿಯಾ ಗಾಂಧಿ ನಾಯಕರಿಗೆ ತಿಳಿಸಿದರು’ ಎಂದು ಬನ್ಸಲ್ ಹೇಳಿದರು. ರಾಹುಲ್ ಗಾಂಧಿ ಕೂಡ ಇದೇ ಮಾದರಿಯಲ್ಲಿ ಮಾತನಾಡಿದ್ದಾರೆ ಎಂದು ಅವರು ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ಹೈದರಾಬಾದ್: ಭಾರತವು ಈಗ ದುರ್ಬಲ ರಾಷ್ಟ್ರವಾಗಿ ಉಳಿದಿಲ್ಲ, ಯಾವುದೇ ರೀತಿಯ ಆಕ್ರಮಣವನ್ನು ನಡೆಸುವ ಶತ್ರುಗಳಿಗೆ ಸೂಕ್ತ ಉತ್ತರ ನೀಡುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ 2020 ಡಿಸೆಂಬರ್ 19ರ ಶನಿವಾರ ಹೇಳಿದರು.  "ಇದು ಹೊಸ ಭಾರತವಾಗಿದ್ದು, ಯಾವುದೇ ಆಕ್ರಮಣವನ್ನು ಸಹಿಸುವುದಿಲ್ಲ, ಆದರೂ ಯಾವುದೇ ಸಮಸ್ಯೆಯನ್ನು ಸಂಘರ್ಷದ ಬದಲು ಸಂವಾದದ ಮೂಲಕ ಪರಿಹರಿಸುವುದು ನಮ್ಮ ಉದ್ದೇಶ’ ಎಂದು ರಾಜನಾಥ್ ಸಿಂಗ್ ಹೇಳಿದರು.  ಹೈದರಾಬಾದಿನ ಹೊರವಲಯದಲ್ಲಿರುವ ದುಂಡಿಗಲ್ ವಾಯುಪಡೆಯ ನಿಲ್ದಾಣದಲ್ಲಿ ನಡೆದ ಸಂಯೋಜಿತ ಪದವಿ ಪ್ರದಾನ ಸಮಾರಂಭದಲ್ಲಿ ಭಾರತೀಯ ವಾಯುಪಡೆಯ ತರಬೇತಿಯಲ್ಲಿ ಹೊಸದಾಗಿ ಪದವಿ ಪಡೆದ ಕೆಡೆಟ್‌ಗಳನ್ನು ಉದ್ದೇಶಿಸಿ ಅವರು ಮಾತನಾಡಿದರು. ಕೊರೋನವೈರಸ್ ಸಾಂಕ್ರಾಮಿಕ ರೋಗದ ಹೊರತಾಗಿಯೂ ಚೀನಾ ಇತ್ತೀಚೆಗೆ ನಡೆಸಿದ ಆಕ್ರಮಣವನ್ನು ರಕ್ಷಣಾ ಸಚಿವರು ನೆನಪಿಸಿಕೊಂಡರು. "ದೇಶವು ಕೋವಿಡ್ -೧೯ ಸಾಂಕ್ರಾಮಿಕ ರೋಗದ ಕಷ್ಟದ ಸಮಯವನ್ನು ಎದುರಿಸುತ್ತಿದ್ದಾಗ, ಚೀನಾ ತನ್ನ ಕೊಳಕು ಉದ್ದೇಶಗಳನ್ನು ಗಡಿಯಲ್ಲಿ ಪ್ರದರ್ಶಿಸಿತು. ಆದರೆ ಭಾರತವು ದುರ್ಬಲ ರಾಷ್ಟ್ರವಲ್ಲ ಎಂದು ನಾವು ಅವರಿಗೆ ಸಾಬೀತುಪಡಿಸಿದ್ದೇವೆ ಮತ್ತು ಅವರಿಗೆ ಸೂಕ್ತವಾದ ಉತ್ತರವನ್ನು ನೀಡಿದ್ದೇವೆ’ ಎಂದು ಸಿಂಗ್ ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ರೈಲ್ವೆ ಇಲಾಖೆಯು ೨೦೨೪ ರಿಂದ ಕಾಯುವ ಪಟ್ಟಿಗಳನ್ನು (ವೈಟಿಂಗ್ ಲಿಸ್ಟ್) ರದ್ದು ಪಡಿಸಲು ಯೋಜಿಸುತ್ತಿದೆ ಎಂಬ ವರದಿಗಳನ್ನು ರೈಲ್ವೇ ಸಚಿವಾಲಯವು 2020 ಡಿಸೆಂಬರ್ 19ರ ಶನಿವಾರ ತಳ್ಳಿಹಾಕಿದೆ. ಕಾಯುವ ಪಟ್ಟಿಗಳನ್ನು  (ವೈಟಿಂಗ್ ಲಿಸ್ಟ್) ತೆಗೆದುಹಾಕುತ್ತಿಲ್ಲ, ಇದಕ್ಕೆ ತದ್ವಿರುದ್ಧವಾಗಿ, ಕಾಯುವ ಪಟ್ಟಿಗೆ ಯಾವುದೇ ಪ್ರಯಾಣಿಕರನ್ನು ನಿಯೋಜಿಸದಂತೆ ಕ್ರಮಗಳನ್ನು ತೆಗೆದುಕೊಳ್ಳುತ್ತಿದೆ ಎಂದು ರೈಲ್ವೇ ಸಚಿವಾಲಯ ಸ್ಪಷ್ಟ ಪಡಿಸಿದೆ. ’ಲಭ್ಯತೆಯ ನಿರ್ಬಂಧಗಳನ್ನು ಪರಿಹರಿಸಿ, ಬೇಡಿಕೆಯ ಮೇರೆಗೆ ರೈಲುಗಳನ್ನು ಲಭ್ಯಗೊಳಿಸುವ ಸಾಮರ್ಥ್ಯವನ್ನು ಹೆಚ್ಚಿಸಲು ಪ್ರಯತ್ನಿಸಲಾಗುತ್ತಿದೆ, ಅದು "ಪ್ರಯಾಣಿಕರನ್ನು ವೈಟ್‌ಲಿಸ್ಟ್ ಮಾಡುವ ಸಾಧ್ಯತೆಯನ್ನು ಕಡಿಮೆ ಮಾಡುತ್ತದೆ. ಆದರೆ ಕಾಯುವ ಪಟ್ಟಿಗಳಿಲ್ಲ ಎಂಬುದು ಇದರ ಅರ್ಥವಲ್ಲ’ ಎಂದು ರೈಲ್ವೇ ಸಚಿವಾಲಯ ಹೇಳಿದೆ. ನಿರ್ದಿಷ್ಟ ರೈಲಿಗೆ ಪ್ರಯಾಣಿಕರ ಬೇಡಿಕೆಯು ರೈಲಿನಲ್ಲಿ ಲಭ್ಯವಿರುವ ಬರ್ತ್‌ಗಳು ಅಥವಾ ಆಸನಗಳ ಸಂಖ್ಯೆಯನ್ನು ಮೀರಿದಾಗ ವೈಟಿಂಗ್ ಲಿಸ್ಟ್‌ಗೆ ಅವಕಾಶವಿದೆ ಎಂದು ಸಚಿವಾಲಯದ ದಾಖಲೆ ವಿವರಿಸಿದೆ. "ನಿಬಂಧನೆಯನ್ನು ದೂರ ಮಾಡಲಾಗುತ್ತಿಲ್ಲ. ವೈಟ್ ಲಿಸ್ಟ್ ಎಂಬುದು ಬೇಡಿಕೆ ಮತ್ತು ಲಭ್ಯತೆಯ ಏರಿಳಿತಗಳನ್ನು ತಗ್ಗಿಸಲು ಬಫರ್ ಆಗಿ ಕಾರ್ಯನಿರ್ವಹಿಸುತ್ತದೆ’ ಎಂದು ಸರ್ಕಾರದ ಸ್ಪಷ್ಟೀಕರಣ ಹೇಳಿದೆ. ರಾಷ್ಟ್ರೀಯ ರೈಲು ಯೋಜನೆ ರೈಲ್ವೆಯ ಮೂಲಸೌಕರ್ಯ ಸಾಮರ್ಥ್ಯವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿರುವ ದೀರ್ಘಕಾಲೀನ ಕಾರ್ಯತಂತ್ರದ ಯೋಜನೆಯಾಗಿದೆ. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ನವದೆಹಲಿ: ದೇಶದಲ್ಲಿ ಕೋವಿಡ್ -೧೯ರ ಎರಡನೇ ಅಲೆ ಇಲ್ಲದಿರಬಹುದು, ಆದರೆ ಅದು ಸಂಭವಿಸಿದರೂ ಸಹ, ಮೊದಲನೆಯದಕ್ಕಿಂತ ಬಲವಾಗಿರುವುದು ಅಸಂಭವವಾಗಿದೆ ಎಂದು ಆರೋಗ್ಯ ತಜ್ಞರು 2020 ಡಿಸೆಂಬರ್ 19ರ ಶನಿವಾರ ಹೇಳಿದ್ದಾರೆ. ಲಸಿಕೆ ನೀಡಲು ಸಾಧ್ಯವಾದರೆ ಮಾರ್ಚ್ ೨೫ರ ಒಳಗೆ ದೇಶದಲ್ಲಿ ಕೊರೋನಾ ಸಂಪೂರ್ಣ ನಿಯಂತ್ರಣಕ್ಕೆ ಬರಬಲ್ಲುದು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ದೇಶದ ಕೋವಿಡ್ -೧೯ ಪ್ರಕರಣಗಳು ೧ ಕೋಟಿ ಗಡಿ ದಾಟಿದ ಹಿನ್ನೆಲೆಯಲ್ಲಿ ಈ ಹೇಳಿಕೆ ಬಂದಿದೆ. ದೈನಂದಿನ ಪ್ರಕರಣಗಳ ಸಂಖ್ಯೆ ಮತ್ತು ದೈನಂದಿನ ಸಾವುನೋವುಗಳು ನಿರಂತರವಾಗಿ ಕಡಿಮೆಯಾಗುತ್ತಿರುವುದೂ ಈ ಹೇಳಿಕೆಗೆ ಕಾರಣವಾಗಿವೆ. ಖ್ಯಾತ ವೈರಾಣು ತಜ್ಞ ಡಾ.ಶಾಹಿದ್ ಜಮೀಲ್ ಅವರು, ’ಸೆಪ್ಟೆಂಬರ್ ಮಧ್ಯದಲ್ಲಿ ಗರಿಷ್ಠ ಮಟ್ಟಕ್ಕೇರಿದ ಕೊರೋನಾ  ದೈನಂದಿನ ಪ್ರಕರಣಗಳ ವಕ್ರರೇಖೆಯು ಭಾರತದಲಿ ಇಳಿಮುಖವಾಗಿದೆ. ಸೆಪ್ಟೆಂಬರ್ ಮಧ್ಯದಲ್ಲಿ ಅತ್ಯಂತ ಕೆಟ್ಟದ್ದಾಗಿದ್ದ ದೈನಂದಿನ ೯೩,೦೦೦ ಕ್ಕೂ ಹೆಚ್ಚು ಪ್ರಕರಣಗಳಿಗೆ ಹೋಲಿಸಿದರೆ, ಈಗ ನಾವು ಪ್ರತಿದಿನ ಸುಮಾರು ೨೫,೫೦೦ ಪ್ರಕರಣಗಳನ್ನು ಕಾಣುತ್ತಿದ್ದೇವೆ. ಆದರೆ ನವೆಂಬರ್ ಅಂತ್ಯದಲ್ಲಿ ನಾವು ಸಾಕ್ಷಿಯಾದಂತೆಯೇ ಭವಿಷ್ಯದಲ್ಲಿ ಸಣ್ಣ ಉತ್ತುಂಗದ ಅಲೆಗಳು ಕಂಡುಬರುತ್ತವೆ" ಎಂದು ಅವರು ಹೇಳಿದರು. "ನಾವು ಹಬ್ಬದ ಋತುವಿನಲ್ಲಿ (ದಸರಾ- ದೀಪಾವಳಿಯವರೆಗೆ) ಮತ್ತು ರಾಜ್ಯ ಚುನಾವಣೆಯಲ್ಲಿ ಮಹತ್ವದ ಜಿಗಿತವಿಲ್ಲದೆ ಹೋಗಿರುವುದರಿಂದ ಎರಡನೇ ಅಲೆಯ ಉತ್ತುಂಗ ಇರುತ್ತದೆ ಎಂದು ನಾನು ಭಾವಿಸುವುದಿಲ್ಲ. ಏಕೆಂದರೆ, ನಾವು ಎರಡನೇ ರಾಷ್ಟ್ರೀಯ ಸಿರೊ ಗಮನಿಸಿದರೆ ಸಮೀಕ್ಷೆ, ಪ್ರಕರಣಗಳು ೧೬ ಬಾರಿ ದೃಢ ಪಟ್ಟ ಪ್ರಕರಣಗಳಾಗಿವೆ. ಭಾರತದಲ್ಲಿ ಈಗ ೧೬ ಕೋಟಿ (೧೬೦ ಮಿಲಿಯನ್) ಪ್ರಕರಣಗಳಿವೆ’ ಎಂದು ಅವರು ಹೇಳಿದರು. (ವಿವರಗಳಿಗೆ ಇಲ್ಲಿ ಕ್ಲಿಕ್  ಮಾಡಿರಿ)

2020: ಬೆಂಗಳೂರು/ ಮಂಗಳೂರು: ರಾಜ್ಯ ರಾಜಧಾನಿ ಬೆಂಗಳೂರು ಮತ್ತು ಕರಾವಳಿ ನಗರ ಮಂಗಳೂರನ್ನು ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ ೭೫ರ ಶಿರಾಡಿ ಘಾಟಿಯಲ್ಲಿ ಸುರಂಗ ಮಾರ್ಗ ನಿರ್ಮಿಸುವ  ವಿಸ್ತೃತ ಯೋಜನಾ ವರದಿಗೆ ಕೇಂದ್ರ ಸರಕಾರ ಹಸಿರು ನಿಶಾನೆ ತೋರಿಸಿದೆ. ಅಂದಾಜು ೧೦ ಸಾವಿರ ಕೋಟಿ ರೂ. ಮೊತ್ತದ ಯೋಜನೆಗೆ ಒಪ್ಪಿಗೆ ನೀಡಲಾಗಿದ್ದು, ಶೀಘ್ರದಲ್ಲಿ ಇದರ ಟೆಂಡರ್ ಸಹಿತ ಇತರ ಪ್ರಕ್ರಿಯೆಗಳು ಪೂರ್ಣಗೊಳ್ಳಲಿವೆ ಎಂದು ಕೇಂದ್ರ ಹೆದ್ದಾರಿ ಮತ್ತು ಭೂ ಸಾರಿಗೆ ಸಚಿವ ನಿತಿನ್ ಗಡ್ಕರಿ  2020 ಡಿಸೆಂಬರ್ 19ರ ಶನಿವಾರ ತಿಳಿಸಿದರು. ಕೂಳೂರು ಫಲ್ಗುಣಿ ನದಿಗೆ ನೂತನ ಸೇತುವೆ ನಿರ್ಮಾಣ ಕಾಮಗಾರಿ ಸೇರಿದಂತೆ ದಕ್ಷಿಣ ಕನ್ನಡ ಜಿಲ್ಲಾವ್ಯಾಪ್ತಿಯ ಐದು ಹಾಗೂ ರಾಜ್ಯಾದ್ಯಂತ ೧೦,೯೦೮ ಕೋಟಿ ರೂ. ಮೊತ್ತದ ವಿವಿಧ ಕಾಮಗಾರಿಗಳಿಗೆ ಶಿಲಾನ್ಯಾಸ ಹಾಗೂ ಪೂರ್ಣಗೊಂಡ ಕಾಮಗಾರಿಗಳ ಉದ್ಘಾಟನೆಯನ್ನು ಅಂತರ್ಜಾಲ (ಆನ್ ಲೈನ್) ಮೂಲಕ ನೆರೆವೇರಿಸಿ ಅವರು ಮಾತನಾಡಿದರು. ಕಳೆದ ಏಳೆಂಟು ವರ್ಷಗಳಿಂದ ರಾಷ್ಟ್ರೀಯ ಹೆದ್ದಾರಿ ೭೫ರ ಶಿರಾಡಿ ಘಾಟಿ ರಸ್ತೆಗೆ ಸುರಂಗ ಮಾರ್ಗ ನಿರ್ಮಿಸುವ ಯೋಜನೆ ಚರ್ಚೆಯಲ್ಲಿತ್ತು. ಪಶ್ಚಿಮ ಘಟ್ಟ ವ್ಯಾಪ್ತಿಯಲ್ಲಿ ಈ ಯೋಜನೆ ಬರುವುದರಿಂದ ಹಲವು ಕಾನೂನು ಸಮಸ್ಯೆಗಳಿಂದ ಈ ಯೋಜನೆ ಕಾರ್ಯಗತಗೊಳ್ಳಲು ವಿಳಂಬ ಆಗಿತ್ತು. ಇದೀಗ ಎಲ್ಲ ಸಮಸ್ಯೆಗಳು ಬಗೆಹರಿದಿದ್ದು, ಕೆಲವೇ ವರ್ಷಗಳಲ್ಲಿ ಯೋಜನೆ ಕಾರ್ಯಗತಗೊಳ್ಳುವ ನಿರೀಕ್ಷೆ ಇದೆ. (ವಿವರಗಳಿಗೆ  ಇಲ್ಲಿ  ಕ್ಲಿಕ್  ಮಾಡಿರಿ)

ಇಂದಿನ ಇತಿಹಾಸ  History Today ಡಿಸೆಂಬರ್ 19 (2019+ ಹಿಂದಿನವುಗಳಿಗೆ ಇಲ್ಲಿ ಕ್ಲಿಕ್ ಮಾಡಿರಿ)

-ಸಂಗ್ರಹ: ನೆತ್ರಕೆರೆ ಉದಯಶಂಕರ