PARYAYA: ಎಸ್‌ಐಆರ್‌: ಕಪಿಲ್‌ ಸಿಬಲ್‌ ಏನು ಹೇಳುತ್ತಾರೆ?

 ಎಸ್‌ಐಆರ್‌: ಕಪಿಲ್‌ ಸಿಬಲ್‌ ಏನು ಹೇಳುತ್ತಾರೆ?

ಕೇಂದ್ರ ಸಚಿವ ಕಿರಣ್‌ ರಿಜಿಜು ಅವರು ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್‌ ಐಆರ್‌) ವಿವಾದದ ಹಿನ್ನೆಲೆಯಲ್ಲಿ 2013ರಲ್ಲಿ ಕಾನೂನು ಸಚಿವರಾಗಿದ್ದ ಕಪಿಲ್‌ ಸಿಬಲ್‌ ಅವರು ಸಂಸತ್ತಿನಲ್ಲಿ ನೀಡಿದ್ದ ಹೇಳಿಕೆಯ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.

 "ಕಪಿಲ್ ಸಿಬಲ್ ಅವರು ಯಾವಾಗಲೂ ಭ್ರಷ್ಟರು, ಉಗ್ರವಾದಿಗಳು ಮತ್ತು ಸಮಾಜಘಾತುಕ ಶಕ್ತಿಗಳನ್ನು ರಕ್ಷಿಸುತ್ತಿರುವುದು ಕಂಡುಬರುವುದರಿಂದ ನನಗೆ ಅವರನ್ನು ಇಷ್ಟವಿರಲಿಲ್ಲ.

ಆದರೆ ಮೊದಲ ಬಾರಿಗೆ ನನಗೆ ಅವರ ಬಗ್ಗೆ ಮೆಚ್ಚುಗೆಯಾಗಿದೆ; ಏಕೆಂದರೆ ಅವರು ಸಂಸತ್ತಿನಲ್ಲಿ ಕಾನೂನು ಸಚಿವರಾಗಿದ್ದ ತಮ್ಮ ಹಳೆಯ ಭಾಷಣದ ಮೂಲಕ ಕಾಂಗ್ರೆಸ್ ಪಕ್ಷದ ನಕಲಿ ಮತ ಕಳವು (ವೋಟ್ ಚೋರಿ) ನಾಟಕವನ್ನು ಬಯಲು ಮಾಡಿದ್ದಾರೆ!!" ಎಂದು ವಿಡಿಯೋ ಜೊತೆಗೆ ರಿಜಿಜು ಷರಾ ಬರೆದಿದ್ದಾರೆ.
ವಿಡಿಯೋ ನೋಡಿ:

ಕಪಿಲ್ ಸಿಬಲ್ ಅವರ 2013ರ ಸಂಸತ್ ಭಾಷಣದ ಸಾರಾಂಶ

ಕೇಂದ್ರ ಸಚಿವ ಕಿರಣ್‌ ರಿಜಿಜು ಅವರು ಹಂಚಿಕೊಂಡಿರುವ, 2013ರಲ್ಲಿ ಕಪಿಲ್ ಸಿಬಲ್ ಅವರು ಕಾನೂನು ಸಚಿವರಾಗಿ ಸಂಸತ್ತಿನಲ್ಲಿ ನೀಡಿದ್ದ ಭಾಷಣದ ವಿವರ ಹೀಗಿದೆ:

"ಮತದಾರರ ಪಟ್ಟಿಯಿಂದ ಹೆಸರುಗಳನ್ನು ತೆಗೆದುಹಾಕುವ ಅಥವಾ ಸರಿಪಡಿಸುವ ಪ್ರಕ್ರಿಯೆಯು ಸಂಪೂರ್ಣವಾಗಿ ಕಾನೂನುಬದ್ಧವಾದ ಪ್ರಕ್ರಿಯೆಯಾಗಿದೆ. ಯಾವುದೇ ರೀತಿಯ ನಕಲಿ ಅಥವಾ ತಪ್ಪಾದ ನಮೂದುಗಳನ್ನು ತಡೆಯಲು ಮತ್ತು ಚುನಾವಣಾ ವ್ಯವಸ್ಥೆಯ ಪಾವಿತ್ರ್ಯತೆಯನ್ನು ಕಾಪಾಡಲು ಚುನಾವಣಾ ಆಯೋಗಕ್ಕೆ ಹಾಗೂ ಚುನಾವಣಾ ನೋಂದಣಿ ಅಧಿಕಾರಿಗೆ ನಿರ್ದಿಷ್ಟ ನಿಯಮಗಳಡಿ ಅಧಿಕಾರ ನೀಡಲಾಗಿದೆ.

ಅಲ್ಲದೆ, ಮತದಾರರ ಪಟ್ಟಿಯಿಂದ ಯಾರ ಹೆಸರಾದರೂ ತಪ್ಪಾಗಿ ಕೈಬಿಡಲ್ಪಟ್ಟರೆ, ಅಥವಾ ಅರ್ಹ ನಾಗರಿಕರು ತಮ್ಮ ಹೆಸರನ್ನು ಸೇರಿಸಿಕೊಳ್ಳಲು ಬಯಸಿದರೆ, ಅವರು ನಿಗದಿತ ನಿಯಮಗಳ ಪ್ರಕಾರ ಚುನಾವಣಾ ಆಯೋಗವನ್ನು ಅಥವಾ ಸಂಬಂಧಪಟ್ಟ ಅಧಿಕಾರಿಗಳನ್ನು ಸಂಪರ್ಕಿಸಿ ಸೂಕ್ತ ಅರ್ಜಿ ಸಲ್ಲಿಸಲು ಅವಕಾಶವಿರುತ್ತದೆ. ಇದು ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಚುನಾವಣಾ ಪಟ್ಟಿಯನ್ನು ಪಾರದರ್ಶಕವಾಗಿ ಇಡಲು ಇರುವ ಒಂದು ಸಾಂವಿಧಾನಿಕ ಪ್ರಕ್ರಿಯೆಯಾಗಿದೆ."

 2026ರ ಪ್ರಸ್ತುತ ರಾಜಕೀಯ ಬೆಳವಣಿಗೆಗಳಲ್ಲಿ (SIR ಪ್ರಕ್ರಿಯೆ ಮತ್ತು ಮತದಾರರ ಪಟ್ಟಿ ಪರಿಷ್ಕರಣೆ ವಿವಾದದ ಸಂದರ್ಭದಲ್ಲಿ), ಕೇಂದ್ರ ಸಚಿವ ಕಿರಣ್‌ ರಿಜಿಜು ಅವರು 2013ರಲ್ಲಿ ಕಾನೂನು ಸಚಿವರಾಗಿದ್ದ ಕಪಿಲ್ ಸಿಬಲ್ ಆಡಿದ ಈ ಹಳೆಯ ಮಾತುಗಳನ್ನು ಈಗಿನ ವಿರೋಧ ಪಕ್ಷದ ನಿಲುವನ್ನು ಪ್ರಶ್ನಿಸಲು ಉಲ್ಲೇಖಿಸಿದ್ದಾರೆ.

PARYAYA: ಎಸ್‌ಐಆರ್‌: ಕಪಿಲ್‌ ಸಿಬಲ್‌ ಏನು ಹೇಳುತ್ತಾರೆ?:   ಎಸ್‌ಐಆರ್‌: ಕಪಿಲ್‌ ಸಿಬಲ್‌ ಏನು ಹೇಳುತ್ತಾರೆ? ಕೇಂ ದ್ರ ಸಚಿವ ಕಿರಣ್‌ ರಿಜಿಜು ಅವರು ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್‌ ಐಆರ್‌) ವಿವಾದದ ಹಿನ್ನೆಲೆಯ...

PARYAYA: ರಂಗಸ್ಥಳದಲ್ಲಿ ದೇವಿಯಾಗಿ ಮಿಂಚಲಿರುವ ಅರ್ಷಿಯಾ ಖಾನ್

 ರಂಗಸ್ಥಳದಲ್ಲಿ ದೇವಿಯಾಗಿ ಮಿಂಚಲಿರುವ ಅರ್ಷಿಯಾ ಖಾನ್

ಕರಾವಳಿಯ ಗಂಡುಕಲೆ ಯಕ್ಷಗಾನ ರಂಗದಲ್ಲಿ ಮತ್ತೊಂದು ಐತಿಹಾಸಿಕ ಹಾಗೂ ಸೌಹಾರ್ದತೆಯ ಸುಂದರ ಅಧ್ಯಾಯ ಅನಾವರಣಗೊಳ್ಳಲು ಸಜ್ಜಾಗಿದೆ. ಯಕ್ಷಗಾನ ಲೋಕ ಪ್ರವೇಶಿಸಿದ ಮೊಟ್ಟಮೊದಲ ಮುಸ್ಲಿಂ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿರುವ ಅರ್ಷಿಯಾ ಖಾನ್ (ತನು ವಿಟ್ಲ), ಇದೀಗ ಕರಾವಳಿಯ ಪ್ರತಿಷ್ಠಿತ ಧಾರ್ಮಿಕ ವೇದಿಕೆಯಲ್ಲಿ ಸಾಕ್ಷಾತ್ 'ಶ್ರೀದೇವಿ'ಯಾಗಿ ಅಭಿನಯಿಸುವ ಮೂಲಕ ಕಲಾ ಲೋಕದಲ್ಲಿ ಹೊಸ ಇತಿಹಾಸ ಬರೆಯಲಿದ್ದಾರೆ.

ಮಂಗಳೂರಿನ ಐತಿಹಾಸಿಕ ಕದ್ರಿ ಶ್ರೀ ಮಂಜುನಾಥ ದೇವಸ್ಥಾನದ ರಾಜಾಂಗಣದಲ್ಲಿ ಅಕ್ಟೋಬರ್ 20 ರಂದು ನಡೆಯಲಿರುವ 'ಸಂಪೂರ್ಣ ಶ್ರೀ ದೇವಿ ಮಹಾತ್ಮೆ' ಪ್ರಸಂಗದಲ್ಲಿ ಅವರು ಈ ಪವಿತ್ರ ಪಾತ್ರ ನಿರ್ವಹಿಸಲಿದ್ದಾರೆ.

• ಅಪೂರ್ವ ಮೈಲಿಗಲ್ಲು: ಯಕ್ಷಗಾನ ಕ್ಷೇತ್ರಕ್ಕೆ ಮುಸ್ಲಿಂ ಸಮುದಾಯದ ಹೆಣ್ಣುಮಗಳೊಬ್ಬರು ಕಾಲಿಟ್ಟಿರುವುದೇ ಅಪರೂಪ. ಅದರಲ್ಲಿಯೂ ದೇವಿಯಂತಹ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಕಲಾಪ್ರೇಮಿಗಳಲ್ಲಿ ಭಾರೀ ಹರ್ಷ ಹಾಗೂ ಮೆಚ್ಚುಗೆ ಮೂಡಿಸಿದೆ.
• ಕಟ್ಟುನಿಟ್ಟಿನ ವ್ರತಾಚರಣೆ: ದೇವಿಯ ಪವಿತ್ರ ಪಾತ್ರದ ನಿರ್ವಹಣೆಗಾಗಿ ಕಲಾ ಧರ್ಮಕ್ಕೆ ತಕ್ಕಂತೆ, ಅರ್ಷಿಯಾ ಪ್ರಸ್ತುತ ಸಾತ್ವಿಕ ಸಸ್ಯಾಹಾರಿ ಆಹಾರ ಪದ್ಧತಿಯೊಂದಿಗೆ ಕಟ್ಟುನಿಟ್ಟಿನ ವ್ರತಾಚರಣೆಯನ್ನು ಕಾಯ್ದುಕೊಂಡಿದ್ದಾರೆ.
• ಗುರುಗಳ ಮಾರ್ಗದರ್ಶನ: ಕಳೆದ 12 ವರ್ಷಗಳಿಂದ ಯಕ್ಷಗಾನ ರಂಗದಲ್ಲಿ ತೊಡಗಿಸಿಕೊಂಡಿರುವ ಇವರು, ಖ್ಯಾತ ಗುರು ಕದ್ರಿ ರಮೇಶ್ ಭಟ್ ಅವರ ಬಳಿ ತರಬೇತಿ ಪಡೆದಿದ್ದಾರೆ.
• ತಂದೆ ತಾಯಿ ರಕ್ಷಾ ಕವಚ: ತನು ವಿಟ್ಲ ಎಂದೇ ಖ್ಯಾತರಾಗಿರುವ ದಕ್ಷಿಣ ಕನ್ನಡ ಜಿಲ್ಲೆ ಬಂಟ್ವಾಳ ತಾಲೂಕಿನ ವಿಟ್ಲ ಸಮೀಪದ ಮಾಡ ಮೂಲದವರಾದ ಆರ್ಷಿಯಾ ಖಾನ್ 4ನೇ ತರಗತಿಯಲ್ಲಿದ್ದಾಗಲೇ ಯಕ್ಷಗಾನ ಕಲಿಯಲು ಆರಂಭಿಸಿದ್ದರು. ತಂದೆ ಅಬ್ದುಲ್ ಖಾದರ್ ಹಾಗೂ ತಾಯಿ ಮುಮ್ತಾಜ್ ಅವರ ಪೂರ್ಣ ಬೆಂಬಲವೇ ಆಕೆಗೆ ರಕ್ಷಾ ಕವಚ.
• ಕದಳಿ ದಶಾಹ ದಸರಾ ಸಂಭ್ರಮ: ಕದ್ರಿ ಮಂಜುನಾಥ ದೇವಾಲಯದ ರಾಜಾಂಗಣದಲ್ಲಿ 'ಕದಳಿ ಕಲಾ ಕೇಂದ್ರ'ವು ಆಯೋಜಿಸಿರುವ 14ನೇ ವರ್ಷದ 10 ದಿನಗಳ 'ಕದಳಿ ದಶಾಹ' ಯಕ್ಷಗಾನ ಸಂಭ್ರಮದ (ಅಕ್ಟೋಬರ್ 11 ರಿಂದ 20) ಸಮಾರೋಪ ದಿನದಂದು ಈ ಪ್ರದರ್ಶನ ನಡೆಯಲಿದೆ. ಕಟೀಲು, ಪಾವಂಜೆ ಮೇಳಗಳ ಖ್ಯಾತ ಕಲಾವಿದರೊಂದಿಗೆ ಅರ್ಷಿಯಾ ಖಾನ್ ರಂಗಸ್ಥಳದಲ್ಲಿ ಶ್ರೀದೇವಿಯಾಗಿ ಪ್ರತ್ಯಕ್ಷರಾಗಲಿದ್ದಾರೆ.

ಕಲೆಯು ಯಾವುದೇ ಗಡಿಗಳು ಅಥವಾ ಧರ್ಮಗಳನ್ನು ಮೀರಿ ನಿಲ್ಲಬಲ್ಲದು ಎಂಬುದಕ್ಕೆ ಈ ಅಪೂರ್ವ ಘಟನೆ ಮತ್ತೊಮ್ಮೆ ಸಾಕ್ಷಿಯಾಗಿದ್ದು, ಯಕ್ಷಗಾನ ಪ್ರೇಮಿಗಳು ಈ ಐತಿಹಾಸಿಕ ಬೆಳವಣಿಗೆಯನ್ನು ತುಂಬು ಹೃದಯದಿಂದ ಸ್ವಾಗತಿಸಿದ್ದಾರೆ.

ಅರ್ಷಿಯಾ ಖಾನ್‌ ಅವರ ಇತ್ತೀಚಿನ ಸಂದರ್ಶನವನ್ನು ಈ ಕೆಳಗಿನ ಚಿತ್ರ ಕ್ಲಿಕ್‌ ಮಾಡಿ ನೋಡಿ.

PARYAYA: ರಂಗಸ್ಥಳದಲ್ಲಿ ದೇವಿಯಾಗಿ ಮಿಂಚಲಿರುವ ಅರ್ಷಿಯಾ ಖಾನ್:   ರಂಗಸ್ಥಳದಲ್ಲಿ ದೇವಿಯಾಗಿ ಮಿಂಚಲಿರುವ ಅರ್ಷಿಯಾ ಖಾನ್ ಕ ರಾವಳಿಯ ಗಂಡುಕಲೆ ಯಕ್ಷಗಾನ ರಂಗದಲ್ಲಿ ಮತ್ತೊಂದು ಐತಿಹಾಸಿಕ ಹಾಗೂ ಸೌಹಾರ್ದತೆಯ ಸುಂದರ ಅಧ್ಯಾಯ ಅನಾವರಣಗೊಳ್ಳಲ...

PARYAYA: ಸಮಯದ ಬೆಲೆ: ಚಿತ್ರಮಂದಿರಕ್ಕೆ ಪಾಠ ಕಲಿಸಿದ ವಕೀಲ!

ಸಮಯದ ಬೆಲೆ: ಚಿತ್ರಮಂದಿರಕ್ಕೆ ಪಾಠ ಕಲಿಸಿದ ವಕೀಲ!

ಅದು ಹೈದರಾಬಾದಿನ ತಡ ರಾತ್ರಿ. ಕೆಲಸದ ಒತ್ತಡದಿಂದ ಕೊಂಚ ನಿರಾಳರಾಗಲು ವಕೀಲರೊಬ್ಬರು ಪಿವಿಆರ್‌  (PVR) ಸಿನಿಮಾದಲ್ಲಿ ರಾತ್ರಿ 10:35 ರ ಪ್ರದರ್ಶನಕ್ಕೆ ಟಿಕೆಟ್‌ ಬುಕ್ ಮಾಡಿದ್ದರು. ನಿಗದಿತ ಸಮಯಕ್ಕಿಂತ ಮುಂಚಿತವಾಗಿಯೇ ಚಿತ್ರಮಂದಿರ ತಲುಪಿದ ಅವರು, ಸಿನಿಮಾ ಸರಿಯಾದ ಸಮಯಕ್ಕೆ ಶುರುವಾಗುತ್ತದೆ ಎಂದು ಭಾವಿಸಿದ್ದರು.

ಆದರೆ, ಪರದೆಯ ಮೇಲೆ ಸಿನಿಮಾ ಬರುವ ಬದಲು ಒಂದರ ಮೇಲೊಂದರಂತೆ ವಾಣಿಜ್ಯ ಜಾಹೀರಾತುಗಳು ಮತ್ತು ಮುಂಬರುವ ಸಿನಿಮಾಗಳ ಟ್ರೇಲರ್‌ಗಳು ಪ್ರಸಾರವಾಗತೊಡಗಿದವು. ರಾತ್ರಿ 10:35 ಕ್ಕೆ ಪ್ರಾರಂಭವಾಗಬೇಕಿದ್ದ ಸಿನಿಮಾ ಸುಮಾರು 17 ನಿಮಿಷ ತಡವಾಗಿ ಪ್ರಾರಂಭವಾಯಿತು!

ಇದರಿಂದಾಗಿ, ರಾತ್ರಿ 2 ಗಂಟೆಗೆ ಮನೆ ತಲುಪಬೇಕಿದ್ದ ವಕೀಲರು, ಮನೆಗೆ ತಲುಪುವಷ್ಟರಲ್ಲಿ ಸಮಯ ರಾತ್ರಿ 3 ಗಂಟೆಯಾಗಿತ್ತು. ತಡರಾತ್ರಿ ಪ್ರಯಾಣಿಸುವುದು ಸುರಕ್ಷತೆಯ ದೃಷ್ಟಿಯಿಂದ ಅಪಾಯಕಾರಿ. ಜೊತೆಗೆ ಅವರ ಮರುದಿನದ ಕೆಲಸಗಳೆಲ್ಲವೂ ಏರುಪೇರಾದವು.

"ಇದು ಸಣ್ಣ ಅಡಚಣೆಯಲ್ಲ. ಪ್ರೇಕ್ಷಕರನ್ನು ಬಂದಿಗಳನ್ನಾಗಿ ಮಾಡಿ, ಅವರ ಅಮೂಲ್ಯ ಸಮಯವನ್ನು ಸಿನಿಮಾ ಮಂದಿರ ತನ್ನ ಸ್ವಂತ ಲಾಭಕ್ಕಾಗಿ ದುರುಪಯೋಗಪಡಿಸಿಕೊಂಡಿದೆ!" ಎಂದು ನಿರ್ಧರಿಸಿದ ವಕೀಲರು, ಜಿಲ್ಲಾ ಗ್ರಾಹಕ ನ್ಯಾಯಾಲಯದ (District Consumer Disputes Redressal Commission) ಬಾಗಿಲು ಬಡಿದರು.

ಪಿವಿಆರ್‌ (PVR) ಮುಂದಿಟ್ಟ ವಾದಗಳೇನು?

ನ್ಯಾಯಾಲಯದಲ್ಲಿ ಪಿವಿಆರ್‌ (PVR) ಆಡಳಿತ ಮಂಡಳಿಯು ತನ್ನನ್ನು ಸಮರ್ಥಿಸಿಕೊಳ್ಳಲು ಈ ಕೆಳಗಿನ ಕಾನೂನು ವಾದಗಳನ್ನು ಮಂಡಿಸಿತು:

1. ಸಂವಿಧಾನದ ವಿಧಿ 19(1)(g): ವ್ಯಾಪಾರ ಮತ್ತು ವಹಿವಾಟು ನಡೆಸುವ ಮೂಲಭೂತ ಹಕ್ಕು ನಮಗಿದೆ.
2. ಮಾಲೀಕತ್ವದ ಹಕ್ಕು: ಸಿನಿಮಾ ಮಂದಿರಗಳು ಖಾಸಗಿ ಸ್ವತ್ತು, ಸಾರ್ವಜನಿಕ ಹಿತಾಸಕ್ತಿಗೆ ಧಕ್ಕೆಯಾಗದಂತೆ ತಮ್ಮ ನಿಯಮಗಳನ್ನು ರೂಪಿಸುವ ಹಕ್ಕು ನಮಗಿದೆ ಎಂದು ಸುಪ್ರೀಂ ಕೋರ್ಟ್ ತೀರ್ಪನ್ನು ಉಲ್ಲೇಖಿಸಿತು.
3. ಸಾರ್ವಜನಿಕ ಹಿತಾಸಕ್ತಿ: ನಾವು ಪ್ರಸಾರ ಮಾಡಿದ ಜಾಹೀರಾತುಗಳಲ್ಲಿ ಸಾಕ್ಷರತೆ, ಕೃಷಿ, ನಾರಿಯರ ಕಲ್ಯಾಣ ಮತ್ತು ಸ್ವಚ್ಛತೆಯಂತಹ ಸಮಾಜಮುಖಿ ವಿಷಯಗಳಿದ್ದವು. ಆದ್ದರಿಂದ ಸೇವೆಯಲ್ಲಿ ಯಾವುದೇ ಕೊರತೆಯಾಗಿಲ್ಲ ಎಂಬ ವಾದವನ್ನು ಅದು ಮುಂದಿಟ್ಟಿತು.

ಗ್ರಾಹಕ ನ್ಯಾಯಾಲಯದ ಏನು ಹೇಳಿತು?

ಪಿವಿಅರ್‌ (PVR) ಮಂಡಿಸಿದ ವಾದಗಳನ್ನು ಸಂಪೂರ್ಣವಾಗಿ ಗ್ರಾಹಕ ನ್ಯಾಯಾಲಯ ತಳ್ಳಿಹಾಕಿತು.

·         ಸಾರ್ವಜನಿಕ ಹಿತಾಸಕ್ತಿ ಪ್ರದರ್ಶನದ ಮಿತಿ: ಸಮಾಜಮುಖಿ ಮಾಹಿತಿಯ ಚಿತ್ರಗಳು ಗರಿಷ್ಠ 2 ನಿಮಿಷಗಳಷ್ಟು ಮಾತ್ರ ಇರಬೇಕು ಹಾಗೂ ಸಿನಿಮಾ ಪ್ರಾರಂಭವಾಗುವ 10 ನಿಮಿಷಗಳ ಒಳಗಾಗಿ ಪ್ರಸಾರವಾಗಬೇಕು.

·         ಅನುಚಿತ ವ್ಯಾಪಾರ ಪ್ರಕ್ರಿಯೆ: ಚಿತ್ರಮಂದಿರಕ್ಕೆ ಬಂದ ಪ್ರೇಕ್ಷಕರನ್ನು ಬಲವಂತವಾಗಿ ಜಾಹೀರಾತು ನೋಡುವಂತೆ ಮಾಡಿ ವಾಣಿಜ್ಯ ಲಾಭಗಳಿಸುವುದು ಅನುಚಿತ ವ್ಯಾಪಾರ (Unfair Trade Practice) ಆಗುತ್ತದೆ-

ಎಂಬ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯದ (Ministry of Information and Broadcasting) ನಿಯಮಾವಳಿಗಳನ್ನು ನ್ಯಾಯಾಲಯ ಎತ್ತಿಹಿಡಿಯಿತು.

ನ್ಯಾಯಾಲಯದ ಆದೇಶ

ಅಂತಿಮವಾಗಿ ನ್ಯಾಯಾಲಯವು ಈ ಕೆಳಗಿನ ಆದೇಶವನ್ನು ನೀಡಿತು:

• ₹20,000 - ದೂರುದಾರರಿಗೆ ಅನುಭವಿಸಿದ ಕಿರುಕುಳ ಮತ್ತು ತೊಂದರೆಗಾಗಿ ಪರಿಹಾರ.
• ₹5,000 - ದೂರಿನ ಕಾನೂನು ವೆಚ್ಚವಾಗಿ ವಕೀಲರಿಗೆ ನೀಡಬೇಕು.
• ₹50,000 - ದಂಡದ ರೂಪದಲ್ಲಿ (Punitive Damages) ಜಿಲ್ಲಾ ಗ್ರಾಹಕ ಕಲ್ಯಾಣ ನಿಧಿಗೆ (District Consumer Welfare Fund) ಪಾವತಿಸಬೇಕು.
• ಶಾಶ್ವತ ತಡೆ: ನಿಯಮ ಮೀರಿದ ಸುದೀರ್ಘ ಜಾಹೀರಾತು ಪ್ರದರ್ಶನವನ್ನು ತಕ್ಷಣವೇ ಸ್ಥಗಿತಗೊಳಿಸಬೇಕು.

ಬೆಂಗಳೂರಿನಲ್ಲೂ ನಡೆದಿತ್ತು ಇಂತಹುದೇ ಘಟನೆ!

ಇದೇ ರೀತಿಯ ಘಟನೆ 2023 ರಲ್ಲಿ ಬೆಂಗಳೂರಿನಲ್ಲಿ  ಕೂಡಾ ನಡೆದಿತ್ತು. ಅಭಿಷೇಕ್ ಎಂಬ ಗ್ರಾಹಕರು 'ಸಾಮ್ ಬಹಾದ್ದೂರ್' ಸಿನಿಮಾ ನೋಡಲು ಹೋದಾಗ ಸುಮಾರು 25 ನಿಮಿಷಗಳ ಕಾಲ ಸುದೀರ್ಘ ಜಾಹೀರಾತುಗಳನ್ನು ಹಾಕಲಾಗಿತ್ತು. ಇದರಿಂದ ಅವರ ಕೆಲಸದ ವೇಳಾಪಟ್ಟಿ ಹಾಳಾಗಿತ್ತು.

2025 ರ ಫೆಬ್ರವರಿಯಲ್ಲಿ ತೀರ್ಪು ನೀಡಿದ್ದ ಬೆಂಗಳೂರು ಗ್ರಾಹಕ ನ್ಯಾಯಾಲಯವು PVR ಮತ್ತು Inox ಸಂಸ್ಥೆಗಳಿಗೆ ₹20,000 ಪರಿಹಾರ, ₹8,000 ಕಾನೂನು ವೆಚ್ಚ ಹಾಗೂ ₹1 ಲಕ್ಷ ರೂಪಾಯಿಗಳನ್ನು ಗ್ರಾಹಕ ಕಲ್ಯಾಣ ನಿಧಿಗೆ ದಂಡವಾಗಿ ಪಾವತಿಸಬೇಕು ಎಂದು ಆದೇಶಿಸಿತ್ತು. ಆದರೆ, ಟಿ ಕೆ ಟ್ ಬುಕಿಂಗ್ ಆ್ಯಪ್ 'BookMyShow' ಗೆ ಸಿನಿಮಾ ಪ್ರದರ್ಶನದ ಸಮಯದ ಮೇಲೆ ನಿಯಂತ್ರಣವಿಲ್ಲದ ಕಾರಣ ಅದನ್ನು ಈ ಪ್ರಕರಣದಿಂದ ಖುಲಾಸೆಗೊಳಿಸಲಾಗಿತ್ತು.

ಈ ಕಥೆಯಿಂದ ತಿಳಿಯಬೇಕಾದ ಕಾನೂನು ಅರಿವು:

1. ಗ್ರಾಹಕರ ಸಮಯವೂ ಅಮೂಲ್ಯ: ನೀವು ಹಣ ನೀಡಿ ಖರೀದಿಸುವುದು 'ಸಿನಿಮಾ ನೋಡಲು' ಹೊರತು 'ಜಾಹೀರಾತು ವೀಕ್ಷಿಸಲು' ಅಲ್ಲ.
2. ಸೇವೆಯ ಕೊರತೆ (Deficiency of Service): ನಿಯಮಿತ ಸಮಯಕ್ಕೆ ಸೇವೆ ನೀಡದಿರುವುದು ಅಥವಾ ಭರವಸೆ ನೀಡಿದ ಸಮಯವನ್ನು ಉಲ್ಲಂಘಿಸುವುದು ಗ್ರಾಹಕ ರಕ್ಷಣೆ ಕಾಯ್ದೆ-2019 ರ ಪ್ರಕಾರ ಶಿಕ್ಷಾರ್ಹ ಅಪರಾಧ.
3. ಗ್ರಾಹಕರ ಹಕ್ಕು ಚಲಾಯಿಸಿ: ಸಿನಿಮಾ ಮಂದಿರಗಳು ಅಥವಾ ಯಾವುದೇ ಸಂಸ್ಥೆಗಳು ನಿಮ್ಮ ಹಕ್ಕುಗಳನ್ನು ಉಲ್ಲಂಘಿಸಿದರೆ, ಟಿಕೆಟ್, ಸಮಯದ ವಿಡಿಯೋ/ಫೋಟೋ ಇತ್ಯಾದಿ ನಿಯಮಿತ ದಾಖಲೆಗಳೊಂದಿಗೆ ಗ್ರಾಹಕ ನ್ಯಾಯಾಲಯವನ್ನು ಉಚಿತವಾಗಿ ಅಥವಾ ಕಡಿಮೆ ವೆಚ್ಚದಲ್ಲಿ ಸುಲಭವಾಗಿ ಸಂಪರ್ಕಿಸಬಹುದು.

-          ನೆತ್ರಕೆರೆ ಉದಯಶಂಕರ

PARYAYA: ಸಮಯದ ಬೆಲೆ: ಚಿತ್ರಮಂದಿರಕ್ಕೆ ಪಾಠ ಕಲಿಸಿದ ವಕೀಲ!:   ಸಮಯ ದ ಬೆಲೆ : ಚಿತ್ರಮಂದಿರಕ್ಕೆ ಪಾಠ ಕಲಿಸಿದ ವಕೀಲ! ಅ ದು ಹೈದರಾಬಾ ದಿನ ತಡ ರಾತ್ರಿ. ಕೆಲಸದ ಒತ್ತಡದಿಂದ ಕೊಂಚ ನಿರಾಳರಾಗಲು ವಕೀಲರೊಬ್ಬರು ಪಿವಿಆರ್‌  (PVR) ಸ...

PARYAYA: ಸತ್ಯನಾರಾಯಣ -ಸಂಕಷ್ಟಿ ಪೂಜಾ

 ಸತ್ಯನಾರಾಯಣ -ಸಂಕಷ್ಟಿ ಪೂಜಾ

ಬೆಂಗಳೂರು ರಾಮಕೃಷ್ಣ ಹೆಗಡೆ ನಗರದ ಶ್ರೀ ಬಾಲಾಜಿ ಕೃಪಾ ಬಡಾವಣೆಯ ಶ್ರೀ ಬಾಲಾಜಿ ಮಹಾಗಣಪತಿ, ವೆಂಕಟೇಶ್ವರ, ಅಭಯ ಆಂಜನೇಯ ಸ್ವಾಮಿ ದೇವಸ್ಥಾನದಲ್ಲಿ ೨೦೨೬ ಸೆಪ್ಟೆಂಬರ್‌ ೨೬ರ ಶನಿವಾರ ಪೌರ್ಣಮಿಯ ದಿನ ಭಾದ್ರಪದ ಮಾಸದ ಶ್ರೀ ಸತ್ಯನಾರಾಯಣ ಪೂಜೆ ಹಾಗೂ ಸೆಪ್ಟೆಂಬರ್‌ ೨೯ರ ಮಂಗಳವಾರ ಭಾದ್ರಪದ ಮಾಸದ ಸಂಕಷ್ಟಿ ಪೂಜೆಯನ್ನು ಶ್ರದ್ಧಾ ಭಕ್ತಿಯೊಂದಿಗೆ ನೆರವೇರಿಸಲಾಯಿತು.

ಈ ಬಾರಿಯ ಸಂಕಷ್ಟಿ ಪೂಜೆ ಮಂಗಳವಾರ ಬಂದ ಕಾರಣ ಬಹಳಷ್ಟು ಭಕ್ತರು ಅಂಗಾರಕ ಸಂಕಷ್ಟಿ ಪೂಜೆಯಲ್ಲಿ ವಿಶೇಷಾಗಿ ಪಾಲ್ಗೊಂಡಿದ್ದರು.

ಈ ಸಂದರ್ಭದ ಕೆಲವು ಚಿತ್ರಗಳು ಹಾಗೂ ವಿಡಿಯೋಗಳು ಇಲ್ಲಿವೆ. ಚಿತ್ರಗಳ ಸಮೀಪ ನೋಟಕ್ಕೆ, ವಿಡಿಯೋ ನೋಡಲು ಚಿತ್ರಗಳನ್ನು ಕ್ಲಿಕ್‌ ಮಾಡಿರಿ.

PARYAYA: ಸತ್ಯನಾರಾಯಣ -ಸಂಕಷ್ಟಿ ಪೂಜಾ:   ಸತ್ಯನಾರಾಯಣ -ಸಂಕಷ್ಟಿ ಪೂಜಾ ಬೆಂ ಗಳೂರು ರಾಮಕೃಷ್ಣ ಹೆಗಡೆ ನಗರದ ಶ್ರೀ ಬಾಲಾಜಿ ಕೃಪಾ ಬಡಾವಣೆಯ ಶ್ರೀ ಬಾಲಾಜಿ ಮಹಾಗಣಪತಿ, ವೆಂಕಟೇಶ್ವರ, ಅಭಯ ಆಂಜನೇಯ ಸ್ವಾಮಿ ದೇವಸ...

PARYAYA: ಮುದ ನೀಡಿದ ಭರತನಾಟ್ಯ

ಮುದ ನೀಡಿದ ಭರತನಾಟ್ಯ

ಬೆಂಗಳೂರು ರಾಮಕೃಷ್ಣ ಹೆಗಡೆ ನಗರದ ಶ್ರೀ ಬಾಲಾಜಿ ಕೃಪಾ ಬಡಾವಣೆಯ ಶ್ರೀ ಬಾಲಾಜಿ ಮಹಾಗಣಪತಿ, ವೆಂಕಟೇಶ್ವರ ಅಭಯ ಆಂಜನೇಯ ಸ್ವಾಮಿ ದೇವಸ್ಥಾನದಲ್ಲಿ ನಡೆದ ಮೂರು ದಿನಗಳ ಗಣೇಶೋತ್ಸವ ಸಂದರ್ಭದಲ್ಲಿ ವಿದುಷಿ ಸುಮಾ ಶ್ರೀಧರ್‌ ನೇತೃತ್ವದ ನೂಪುರ ಕಲಾ ನಿಕೇತನ ತಂಡದ ಬಾಲ ಕಲಾವಿದೆಯರು ತಮ್ಮ ಭರತನಾಟ್ಯದಿಂದ ಗಮನ ಸೆಳೆದರು.

ಈ ಸಂದರ್ಭದಲ್ಲಿ ಬಾಲಕಿ ಆದ್ಯ ಕಶ್ಯಪ್‌ ತಾನು ಕಲಿತಿದ್ದ ಯಕ್ಷಗಾನದ ಹೆಜ್ಜೆಯನ್ನೂ ಅಳವಡಿಸಿಕೊಂಡದ್ದು ಪ್ರೇಕ್ಷಕರ ಮನ ಗೆದ್ದಿತು. ವಿಡಿಯೋ ನೋಡಲು ಮೇಲಿನ ಚಿತ್ರ ಕ್ಲಿಕ್‌ ಮಾಡಿರಿ.

PARYAYA: ಮುದ ನೀಡಿದ ಭರತನಾಟ್ಯ: ಮುದ ನೀಡಿದ ಭರತನಾಟ್ಯ ಬೆಂ ಗಳೂರು ರಾಮಕೃಷ್ಣ ಹೆಗಡೆ ನಗರದ ಶ್ರೀ ಬಾಲಾಜಿ ಕೃಪಾ ಬಡಾವಣೆಯ ಶ್ರೀ ಬಾಲಾಜಿ ಮಹಾಗಣಪತಿ, ವೆಂಕಟೇಶ್ವರ ಅಭಯ ಆಂಜನೇಯ ಸ್ವಾಮಿ ದೇವಸ್ಥಾನದಲ್ಲಿ ನ...

PARYAYA: ಭರತನಾಟ್ಯ, ಲವಕುಶ ಕಾಳಗ, ಕೇರಳ ಚೆಂಡೆ, ಭಜನೆ

 ಭರತನಾಟ್ಯ, ಲವಕುಶ ಕಾಳಗ, ಕೇರಳ ಚೆಂಡೆ, ಭಜನೆ

ಬೆಂಗಳೂರಿನ ರಾಮಕೃಷ್ಣ ಹೆಗಡೆ ನಗರದ ಶ್ರೀ ಬಾಲಾಜಿ ಕೃಪಾ ಬಡಾವಣೆಯಲ್ಲಿ ೨೦೨೬ ಸೆಪ್ಟೆಂಬರ್‌ ೧೮, ೧೯ ಮತ್ತು ೨೦ರಂದು ಸಾಂಸ್ಕೃತಿಕ ಕಾರ್ಯಕ್ರಮಗಳ ರಸದೌತಣ.

ಬಡಾವಣೆಯ ಶ್ರೀ ಬಾಲಾಜಿ ಮಹಾಗಣಪತಿ, ವೆಂಕಟೇಶ್ವರ, ಅಭಯ ಆಂಜನೇಯ ದೇವಸ್ಥಾನದಲ್ಲಿ ಬಡಾವಣೆಯ ೨೬ನೇ ಹಾಗೂ ಶ್ರೀ ಬಾಲಾಜಿ ಮಹಾಗಣಪತಿ ದೇವಸ್ಥಾನ ಸೇವಾ ಸಮಿತಿಯ ಮೂರನೇ ವರ್ಷದ ಗಣೇಶೋತ್ಸವ ಸಡಗರ.

ವಿದುಷಿ ಸುಮಾ ಶ್ರೀಧರ್‌ ನೇತೃತ್ವದ ನೂಪುರ ಕಲಾನಿಕೇತನ ತಂಡದ ೪೫ ಮಂದಿ ಬಾಲ ಕಲಾವಿದೆಯರು ಅತ್ಯಾಕರ್ಷಕ ನೃತ್ಯಗಳನ್ನು ನೀಡಿ ಭಾರತದ ಸಾಂಸ್ಕೃತಿ ವೈಭವವನ್ನು ಉಣಬಡಿಸಿದರು.

ಬಡಾವಣೆಯ ದೇವಸ್ಥಾನದಲ್ಲೇ ಕಳೆದ ಒಂದು ವರ್ಷದಿಂದ ಯಕ್ಷಗಾನ ಅಭ್ಯಾಸ ನಿರತರಾಗಿದ್ದ ಮಕ್ಕಳು ಮತ್ತು ಅಮ್ಮಂದಿರು ʼಲವ ಕುಶ ಕಾಳಗʼ ಯಕ್ಷಗಾನವನ್ನು ಪ್ರದರ್ಶಿಸಿ ಎಲ್ಲರ ಮನ ಗೆದ್ದರು. ಯಕ್ಷಗುರು ಉಮೇಶರಾಜ್‌ ಮಂದಾರ್ತಿ ನೇತೃತ್ವದ ʼಯಕ್ಷ ಕಲಾ ಕೌಸ್ತುಭ ಬೆಂಗಳೂರುʼ ತಂಡ ಈ ಕಾರ್ಯಕ್ರಮವನ್ನು ನಡೆಸಿಕೊಟ್ಟಿತು.

ಹಿಮ್ಮೆಳದಲ್ಲಿ ಭಾಗವತರಾಗಿ ಉಮೇಶ್‌ ರಾಜ್‌ ಮಂದಾರ್ತಿ, ಮದ್ದಳೆ ಮತ್ತು ಚೆಂಡೆವಾದನದಲ್ಲಿ ಕ್ರಮವಾಗಿ ವೆಂಕಟೇಶ ಪ್ರಭು ಮತ್ತು ಸುಬ್ರಹ್ಮಣ್ಯ ಗಾಣಿಗ ಸಾಸ್ತಾನ ಮನರಂಜಿಸಿದರು. ಪಾತ್ರಧಾರಿಗಳಾಗಿ ಪುಟ್ಟ ಮಕ್ಕಳಾದ ಆದ್ರಿತಾ ರೈ, ಬ್ರಿತಿ ಮತ್ತು ಕನೀರಾ ಅವರ ಬಾಲಗೋಪಾಲ ಪ್ರೇಕ್ಷಕರೆಲ್ಲದ ಮನ ಗೆದ್ದಿತು. ʼಲವಕುಶ ಕಾಳಗʼದಲ್ಲಿ ಶತ್ರುಘ್ನನಾಗಿ ಆದ್ಯಭಟ್‌, ಲವನಾಗಿ ಆಧ್ಯ ಆದ್ಯ ಶ್ರೀವಲ್ಲಿ, ಕುಶನಾಗಿ ಆದ್ಯ ಕಶ್ಯಪ್‌, ಶ್ರೀರಾಮನಾಗಿ ಡಾ. ಉಮಾದೇವಿ ಎನ್‌, ಲಕ್ಷ್ಮಿನಿಧಿಯಾಗಿ ಕಾರ್ತಿಕ್‌, ಸೀತೆಯಾಗಿ ಅರ್ಚನಾ ಬಂಗೇರ, ವಾಲ್ಮೀಕಿಯಾಗಿ ಪ್ರಣೀತಾ ರೈ, ದಮನನಾಗಿ ಶಿವಾಂಶ್‌ ವಿ ಕೆ, ಪುಷ್ಕಳನಾಗಿ ಅಭ್ಯುದಯ ಪೂಜಾ ಯಾವುದೇ ವೃತ್ತಿ ಕಲಾವಿದರಿಗೆ ಕಡಿಮೆ ಇಲ್ಲದಂತೆ ಪ್ರದರ್ಶನ ನೀಡಿ ಮನರಂಜಿಸಿದರು. ಪ್ರಸನ್ನ ಮಯ್ಯ, ವರುಣ್‌ ತೀರ್ಥಹಳ್ಳಿ, ಉದಯ ಮಂದಾರ್ತಿ ಅವರ ಮೇಕಪ್‌ ಯಕ್ಷಗಾನ ಕಲಾವಿದರ ಸೊಬಗನ್ನು ಹೆಚ್ಚಿಸಿತು.

ಮೂರನೇ ದಿನ ಬೆಂಗಳೂರಿನ ಬಾಣಸವಾಡಿಯ ಶ್ರೀ ಧರ್ಮಶಾಸ್ತಾ ವಾದ್ಯ ಕಲಾ ಕೇಂದ್ರದ ಆನಿಲ್‌ ಕುಮಾರ್‌ ಎಎಸ್‌, ಶರತ್‌ ಗೋಪಾಲ್‌, ನಿಹಾಲ್‌ ಮಣಿಕಂದನ್‌, ಪ್ರಶಾಂತ ರಾಘವನ್‌, ಸಿಜಿಮೋನ್‌ ಎಲ್‌, ಜಯಕುಮಾರ್‌ ಆರ್‌, ಅಖಿಲ್‌ ಆರ್.‌ ಆಚಾರ್ಯ, ಆದಿತ್ಯನ್‌, ಪ್ರದೀಪ ಕುಮಾರ್‌, ರತುಲ್‌, ವೈಶಾಖ್‌ ಅವರನ್ನು ಒಳಗೊಂಡ ತಂಡ ಒಂದು ಗಂಟೆಗೂ ಅಧಿಕ ಅವಧಿಯ ನಿರಂತರ ಕೇರಳ ಚೆಂಡೆವಾದನದ ಮೂಲಕ ಭಕ್ತಾದಿಗಳ ರೋಮ ನಿಮಿರಿಸಿದ್ದಲ್ಲದೆ, ಮಹಾಮಂಗಳಾರತಿ, ಬಡಾವಣೆಯ ಪ್ರಮುಖ ರಸ್ತೆಗಳಲ್ಲಿ ನಡೆದ ಗಣೇಶ ಶೋಭಾ ಯಾತ್ರೆಯಲ್ಲಿ (ಪುರ ಮೆರವಣಿಗೆ) ಪಾಲ್ಗೊಂಡರು ಭಕ್ತರು ತನ್ಮಯತೆಯಿಂದ ನಲಿದಾಡುವಂತೆ ಮಾಡಿದರು.

ಎಂಸಿಎಚ್‌ಎಸ್‌ ಬಡಾವಣೆಯ ಭಕ್ತಿ ಸಂಗಮ ಭಜನಾ ಮಂಡಳಿಯ ಸದಸ್ಯೆಯರು ತಮ್ಮ ಭಜನೆಯ ಮೂಲಕ ಗಮನ ಸೆಳೆದರು.

ಮಹಿಳೆಯರು ಮತ್ತು ಮಕ್ಕಳಿಗಾಗಿ ಎರಡು ದಿನಗಳ ಕಾಲ ನಡೆದ ವಿವಿಧ ಆಟೋಟ ಸ್ಪರ್ಧೆಗಳಲ್ಲಿ ವಿಜೇತರಾದವರಿಗೆ ಬಿಜೆಪಿ ಧುರೀಣ ತಮ್ಮೇಶ್‌ ಗೌಡ ಮತ್ತು ಕಾಂಗ್ರೆಸ್‌ ಯುವ ಮುಖಂಡ ಶಿವಕುಮಾರ್‌ ಬಹುಮಾನಗಳನ್ನು ವಿತರಿಸಿದರು.

ಪುರಮೆರವಣಿಗೆಯ ಬಳಿಕ ರಾಚೇನ ಹಳ್ಳಿ ಕೆರೆಯಲ್ಲಿ ಗಣಪ ವಿಸರ್ಜನೆ ನಡೆಯಿತು.

ಈ ಸಂದರ್ಭದ ಕೆಲವು ಚಿತ್ರಗಳು ಹಾಗೂ ವಿಡಿಯೋಗಳು ಇಲ್ಲಿವೆ. ಚಿತ್ರಗಳ ಸಮೀಪ ನೋಟ ಹಾಗೂ ವಿಡಿಯೋ ನೋಡಲು ಚಿತ್ರಗಳನ್ನು ಕ್ಲಿಕ್‌ ಮಾಡಿರಿ.

ಈ ಸುದ್ದಿಯನ್ನೂ ಓದಿರಿ:

ಗಣೇಶೋತ್ಸವ ೨೦೨೬

PARYAYA: ಭರತನಾಟ್ಯ, ಲವಕುಶ ಕಾಳಗ, ಕೇರಳ ಚೆಂಡೆ, ಭಜನೆ:   ಭರತನಾಟ್ಯ, ಲವಕುಶ ಕಾಳಗ, ಕೇರಳ ಚೆಂಡೆ, ಭಜನೆ ಬೆಂ ಗಳೂರಿನ ರಾಮಕೃಷ್ಣ ಹೆಗಡೆ ನಗರದ ಶ್ರೀ ಬಾಲಾಜಿ ಕೃಪಾ ಬಡಾವಣೆಯಲ್ಲಿ ೨೦೨೬ ಸೆಪ್ಟೆಂಬರ್‌ ೧೮, ೧೯ ಮತ್ತು ೨೦ರಂದು ಸಾ...

PARYAYA: ಗಣೇಶೋತ್ಸವ ೨೦೨೬

 ಗಣೇಶೋತ್ಸವ ೨೦೨೬

ಬೆಂಗಳೂರು ರಾಮಕೃಷ್ಣ ಹೆಗಡೆ ನಗರದ ಶ್ರೀ ಬಾಲಾಜಿ ಕೃಪಾ ಬಡಾವಣೆಯ ಶ್ರೀ ಬಾಲಾಜಿ ಮಹಾಗಣಪತಿ, ವೆಂಕಟೇಶ್ವರ ಅಭಯ ಆಂಜನೇಯಸ್ವಾಮಿ ದೇವಸ್ಥಾನದಲ್ಲಿ ೨೦೨೬ ಸೆಪ್ಟೆಂಬರ್‌ ೧೮ರ ಶುಕ್ರವಾರ ಬೆಳಗ್ಗೆ ಬಡಾವಣೆಯ ೨೬ನೇ ಹಾಗೂ ದೇವಸ್ಥಾನದ ಮೂರನೇ ಗಣೇಶೋತ್ಸವ ವಿಧಿವತ್ತಾಗಿ ಆರಂಭವಾಯಿತು.

ಮೂರು ದಿನಗಳ ನಡೆಯುವ ಈ ಗಣೇಶೋತ್ಸವದಲ್ಲಿ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳು, ಮಕ್ಕಳು, ಮಹಿಳೆಯರು ಪುರುಷರಿಗೆ ವಿವಿಧ ಆಟೋಟ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿದೆ.

ಶುಕ್ರವಾರ ಮಧ್ಯಾಹ್ನ ಮಹಿಳೆಯರು ಮತ್ತು ಪುರುಷರಿಗೆ ಬಡಾವಣೆಯ ನಿವಾಸಿಗಳು ಹಾಗೂ ಮಹಿಳಾ ತಂಡದ ಸದಸ್ಯೆಯರಾದ ಹೇಮಾ ಮತ್ತು ದೇವಕಿ ಅವರು ಆಟೋಟಗಳನ್ನು ನಡೆಸಿಕೊಡಲಿದ್ದು, ಬ್ಯಾಟರಾಯನಪುರ ಕ್ಷೇತ್ರದ ಬಿಜೆಪಿ ನಾಯಕ ಉಮೇಶ ಕೆ ಬಹುಮಾನ ಪ್ರಾಯೋಜನೆ ಮಾಡಿದ್ದಾರೆ.

ಸಂಜೆ ೬ ಗಂಟೆಗೆ ವಿದುಷಿ ಶ್ರೀಮತಿ ಸುಮಾ ಶ್ರೀಧರ್‌ ನೇತೃತ್ವದಲ್ಲಿ ನೂಪುರ ಕಲಾನಿಕೇತನ ತಂಡದಿಂದ ಭರತನಾಟ್ಯ ಕಾರ್ಯಕ್ರಮ ನಡೆಯಲಿದ್ದು, ಈ ಕಾರ್ಯಕ್ರಮವನ್ನು ಪ್ರದೀಪ ಶಾಸ್ತ್ರಿ ಮತ್ತು ಕುಟುಂಬದವರು ಪ್ರಾಯೋಜಿಸಿದ್ದಾರೆ.

ಸೆಪ್ಟೆಂಬರ್‌ ೧೯ರ ಶನಿವಾರ ಬೆಳಗ್ಗೆ ೧೦ ಗಂಟೆಗೆ ದೇವಸ್ಥಾನದ ಅರ್ಚಕ ನಾಗೇಂದ್ರ ಭಟ್‌ ನೇತೃತ್ವದಲ್ಲಿ ಗಣಹವನ ಕಾರ್ಯಕ್ರಮ, ಮಧ್ಯಾಹ್ನ ೨ ಗಂಟೆಗೆ ಶಬನಮ್‌ ನೇತೃತ್ವದಲ್ಲಿ ಬಡಾವಣೆಯ ಮಹಿಳಾ ತಂಡದಿಂದ ಮಕ್ಕಳು, ಮಹಿಳೆಯರು, ಪುರುಷರಿಗೆ ಆಟೋಟ ಸ್ಪರ್ಧೆ ನಡೆಯಲಿದ್ದು ಯುವ ಮುಖಂಡ ಶಿವಕುಮಾರ್‌ ಬಹುಮಾನ ಪ್ರಾಯೋಜನೆ ಮಾಡಿದ್ದಾರೆ. ಸಾಯಂಕಾಲ ೬.೩೦ ಗಂಟೆಗೆ ದೇವಸ್ಥಾನದಲ್ಲೇ ಯಕ್ಷಗಾನ ಕಲಿಯುತ್ತಿರುವ ಮಕ್ಕಳು, ಮಹಿಳೆಯರಿಂದ ʼಲವ-ಕುಶ ಕಾಳಗʼ ಯಕ್ಷಗಾನ. ಯಕ್ಷಗುರು ಉಮೇಶರಾಜ್‌ ಮಂದಾರ್ತಿ ನೇತೃತ್ವದ ಯಕ್ಷ ಕಲಾ ಕೌಸ್ತುಭ ತಂಡ ಈ ಕಾರ್ಯಕ್ರಮವನ್ನು ನಡೆಸಿಕೊಡಲಿದೆ.

ಸೆಪ್ಟೆಂಬರ್‌ ೨೦ರ ಭಾನುವಾರ ಬೆಳಗ್ಗೆ ೯.೩೦ಗಂಟೆಗೆ ಗಣಪತಿ ಉಪನಿಷತ್‌ ಸಹಿತ ಪೂಜೆ, ಸಂಜೆ ೪ ಗಂಟೆಗೆ ಎಂಸಿಎಚ್‌ ಬಡಾವಣೆಯ ಭಕ್ತಿ ಸಂಗಮ ಭಜನಾ ಮಂಡಳಿಯಿಂದ ಭಜನೆ, ಸಂಜೆ ೬ಕ್ಕೆ ಬಾಣಸವಾಡಿಯ ಶ್ರೀ ಧರ್ಮ ಶಾಸ್ತಾ ವಾದ್ಯ ಕಲಾಕೇಂದ್ರ ತಂಡದಿಂದ ಕೇರಳ ಚೆಂಡೆವಾದನ ನಡೆಯಲಿದೆ. ಬಳಿಕ ಬಡಾವಣೆಯ ಪ್ರಮುಖ ರಸ್ತೆಗಳಲ್ಲಿ ಗಣಪನ ಶೋಭಾಯಾತ್ರೆಯೊಂದಿಗೆ ಗಣಪತಿ ವಿಸರ್ಜನೆ ನಡೆಯಲಿದೆ. ಶ್ರೀ ಸುಗುಣನ್‌ ಮತ್ತು ಬಡಾವಣೆಯ ಮಲಯಾಳಿ ಮಿತ್ರರು ಕೇರಳ ಚೆಂಡೆಯನ್ನು ಪ್ರಾಯೋಜಿಸಿದ್ದಾರೆ.

ಗಣೇಶೋತ್ಸವಕ್ಕೆ ಭಕ್ತರು ದೇಣಿಗೆಯೊಂದಿಗೆ ಸಹಕರಿಸಿದ್ದಲ್ಲದೆ, ಶ್ರೀ ಮುನಿರಾಜು ಮತ್ತು ಕುಟುಂಬ, ಶ್ರೀ ರಾಜೇಶ್‌ ಮತ್ತು ಕುಟುಂಬ, ಹೇಮಾವತಿ, ಶಾರದಮ್ಮ, ದೇವಕಿ, ಶಬನಮ್ ಮತ್ತು ಲತಾ  ನೇತೃತ್ವದ ಮಹಿಳಾ ತಂಡ, ಶ್ರೀ ಗುಣವರ್ಧನ್‌ ಶೆಟ್ಟಿ, ಲಂಡನ್ನಿನಲ್ಲಿ ಇರುವ ಅನೂಪ್‌ ಶೆಟ್ಟಿ, ಶೋಭನಾ ಶೆಟ್ಟಿ, ವಿಹಾ ಶೆಟ್ಟಿ ಮತ್ತು ಕುಟುಂಬ, ಶ್ರೀಮತಿ ಪ್ರಮೀಳಾನಾಥನ್‌, ಶ್ರೀಮತಿ ಪ್ರಭಾವತಿ, ಪ್ರಶಾಂತ್‌, ಚರಣ್‌ - ಶ್ವೇತಾ ನೇತೃತ್ವದಲ್ಲಿ ಬಡಾವಣೆಯ ೮ನೇ ಅಡ್ಡರಸ್ತೆಯ ಭಕ್ತರು, ಶ್ರೀ ನಾಗೇಶ್‌ ಮತ್ತು ಸರಸ್ವತಿ ಕುಟುಂಬ, ಮತ್ತಿತರರು ವಿವಿಧ ದಿನಗಳಂದು ಅನ್ನದಾನ, ಪ್ರಸಾದ, ಗಣಹವನ, ಟ್ರ್ಯಾಕ್ಟರ್‌ ಇತ್ಯಾದಿಗಳ ವ್ಯವಸ್ಥೆ ಮಾಡಿದ್ದರು. ಶ್ರೀ ಸಿರಾಜ್‌ ಸಾಗರ್‌  ಅವರು ವೇದಿಕೆ ಮತ್ತು ಪೆಂಡಾಲ್‌ ವ್ಯವಸ್ಥೆಯನ್ನು ಪ್ರಾಯೋಜಿಸಿದ್ದರು.

ಈ ಸಂದರ್ಭದ ಕೆಲವು ಚಿತ್ರಗಳು ಹಾಗೂ ವಿಡಿಯೋಗಳು ಇಲ್ಲಿವೆ. ಚಿತ್ರಗಳ ಸಮೀಪ ನೋಟಕ್ಕಾಗಿ ಅವುಗಳನ್ನು ಕ್ಲಿಕ್‌ ಮಾಡಿರಿ.

PARYAYA: ಗಣೇಶೋತ್ಸವ ೨೦೨೬:   ಗಣೇಶೋತ್ಸವ ೨೦೨೬ ಬೆಂ ಗಳೂರು ರಾಮಕೃಷ್ಣ ಹೆಗಡೆ ನಗರದ ಶ್ರೀ ಬಾಲಾಜಿ ಕೃಪಾ ಬಡಾವಣೆಯ ಶ್ರೀ ಬಾಲಾಜಿ ಮಹಾಗಣಪತಿ, ವೆಂಕಟೇಶ್ವರ ಅಭಯ ಆಂಜನೇಯಸ್ವಾಮಿ ದೇವಸ್ಥಾನದಲ್ಲಿ ೨೦೨೬...