ಗೊತ್ತಾ ನಿಮಗೆ ಮೋರ್ಸ್ ಕೋಡ್?
ಈಗಿನ ಮೊಬೈಲ್‌ ಯುಗದ ಯುವಕರು, ಬಾಲಕ, ಬಾಲಕಿಯರಿಗೆ ಇದು ತಮಾಷೆಯಾಗಿ ಕಾಣಬಹುದು. ಆದರೆ ಸುಮಾರು ನೂರೈವತ್ತು ವರ್ಷಗಳ ಹಿಂದೆ ಈ ಸಂವಹನ ಮಾಧ್ಯಮ ಕ್ರಾಂತಿಕಾರಿ ಸಂವಹನ ವಿಧಾನವಾಗಿ ಎಲ್ಲರ ಗಮನ ಸೆಳೆದಿತ್ತು. ಅಲ್ಲಿಯವರೆಗೆ ಸಂದೇಶಗಳನ್ನು ಕಳುಹಿಸಲು ವಾರಗಳೇ ಬೇಕಾಗುತ್ತಿದ್ದವು. ಆದರೆ ಸ್ಯಾಮ್ಯುಯೆಲ್‌ ಮೋರ್ಸ್ ಅವರು ಆಲ್ಫ್ರೆಡ್ ವೈಲ್ ಮತ್ತು ಜೋಸೆಫ್ ಹೆನ್ರಿ ಅವರ ಜೊತೆಗೂಡಿ 1836ರಲ್ಲಿ ವಿದ್ಯುತ್ ಟೆಲಿಗ್ರಾಫ್‌ ಮೂಲಕ ಸಂವಹನದಲ್ಲಿ ಕ್ರಾಂತಿಯನ್ನು ಉಂಟುಮಾಡಿದರು.
ಮೊದಲಿಗೆ, ಮೋರ್ಸ್ ಕೋಡ್ ಮೂಲಕ ಸಂಖ್ಯೆಗಳನ್ನು ಮಾತ್ರ ಸಂದೇಶವಾಗಿ ರವಾನಿಸಲಾಗುತ್ತಿತ್ತು. ಆದರೆ 1840 ರ ಹೊತ್ತಿಗೆ, ವೈಲ್ ಅದನ್ನು ಅಕ್ಷರಗಳು ಮತ್ತು ವಿಶೇಷ ಅಕ್ಷರಗಳನ್ನು ಸೇರಿಸಲು ಸಾಧ್ಯವಾಗುವಂತೆ ಪರಿಷ್ಕರಿಸಿದರು. ಕ್ರಮೇಣ ಇದರ ಬಳಕೆ ಹೆಚ್ಚಿತು. 1851ರಲ್ಲಿ ಐರೋಪ್ಯ ರಾಷ್ಟ್ರಗಳು ಅಂತಾರಾಷ್ಟ್ರೀಯವಾಗಿ ವಿವಿಧ ಭಾಷೆಗಳಲ್ಲಿ ಬಳಸಲು ಸಾಧ್ಯವಾಗುವಂತೆ ಮೋರ್ಸ್ ಕೋಡನ್ನು ಅಭಿವೃದ್ಧಿ ಪಡಿಸಿದವು. ಅದಕ್ಕೊಂದು ಜಾಗತಿಕ ಮಾನದಂಡವನ್ನು ರೂಪಿಸಿದವು.
ಇದಿಷ್ಟು ಮೋರ್ಸ್ ಕೋಡಿನ ಕಥೆ. ಈಗಲೂ ಈ ಟಕ್‌ ಟಕ್‌ ಟಕ್‌ ಟಕ್‌ ಸಂಜ್ಞಾ ಸಂವಹನವನ್ನು ಬಳಸಲು ಸಾಧ್ಯವಿದೆ. ಈಗ ಇದನ್ನು ಆನ್‌ ಲೈನ್‌ ಕೋರ್ಸುಗಳ ಮೂಲಕ ಕಲಿಯಬಹುದು. ಅಥವಾ ವಿಡಿಯೋಗಳ ಮೂಲಕವೂ ಕಲಿಯಬಹುದು.
ನೀವು ಮೋರ್ಸ್ ಸಂಜ್ಞೆ ಬಳಸುವ ಮೂಲಕ ಇತರರ ಗಮನ ಸೆಳೆಯಬಹುದು. ವಿನೋದಕ್ಕಾಗಿ ಮೋರ್ಸ್ ಸಂಜ್ಞಾ ಸಂದೇಶ ಕಳುಹಿಸಿ ಸ್ನೇಹಿತರನ್ನು ಚಕಿತಗೊಳಿಸಬಹುದು. ಆನ್‌ ಲೈನ್‌ ಪರಿಕರಗಳನ್ನು ಬಳಸಿ ಈ ಸಂಕೇತಗಳನ್ನು ಗಟ್ಟಿಯಾಗಿ ಹೇಳುವಂತೆ ಸವಾಲು ಹಾಕಬಹುದು.
ಕಲಿಯುವ ಮೂಲಕ ಇರಬಹುದು, ಸಂಜ್ಞೆಯನ್ನು ಬಿಡಿಸುವ ಮೂಲಕ ಇರಬಹುದು ಅಥವಾ ಈ ಸಂಜ್ಞಾ ಭಾಷೆಯನ್ನು ಪ್ರಯೋಗಿಸುವ ಮೂಲಕ ಇರಬಹುದು- ಹೀಗೇ ಯಾವುದೇ ರೀತಿಯಲ್ಲೂ ಇದನ್ನು ಬಳಸುವ ಮೂಲಕ ಒಂದೂವರೆ ಶತಕದ ಹಿಂದೆ ಇತಿಹಾಸ ಸೃಷ್ಟಿಸಿದ್ದ ಈ ಚಾರಿತ್ರಿಕ ಆವಿಷ್ಕಾರವನ್ನು ನೀವು ಮೆಚ್ಚಬಹುದು, ಪ್ರಶಂಸಿಸಬಹುದು.
ವಿಡಿಯೋ ನೋಡಲು ಕೆಳಗಿನ ಚಿತ್ರ ಕ್ಲಿಕ್‌ ಮಾಡಿ ಅಥವಾ ಯೂ ಟ್ಯೂಬ್‌ ಲಿಂಕ್‌ ಕ್ಲಿಕ್‌ ಮಾಡಿರಿ.
No comments:
Post a Comment